កាលពីសប្តាហ៍មុននេះ មានការធ្វើប្រហាររដ្ឋប្រហារមិនបានសម្រេចមួយនៅក្នុងប្រទេសតួកគី។ រដ្ឋប្រហារនេះត្រូវបានបង្ក្រាបដោយរដ្ឋាភិបាលលោកប្រធានាធិបតី Recep Tayyip Erdogan។ នៅរាជធានីភ្នំពេញ ឯកអគ្គរដ្ឋទូតសាធារណរដ្ឋតួកគីបានចាត់ទុក ក្រុម Zaman group ថា បានជាប់ពាក់ព័ន្ធនឹងសកម្មភាពធ្វើរដ្ឋប្រហារនោះ។ ក្រុមនេះបានបង្កើតសាលារៀននៅក្នុងប្រទេសកម្ពុជាចាប់ពីកម្រិតមតេ្តយ្យសិក្សារហូតដល់មហាវិទ្យាល័យ។
មួយថ្ងៃបន្ទាប់ពី លោក Ilhan Kemal Tug ឯកអគ្គរដ្ឋទូតសាធារណរដ្ឋតួកគីប្រចាំនៅកម្ពុជា បានធ្វើការចោទប្រកាន់ថា សាលា Zaman (ហ្សាម៉ាន់)មានជាប់ពាក់ព័ន្ធជាមួយអង្គការភេរវកម្ម Futhullah Gulen Terrorist Organization (FETO) អ្នកចាត់ចែងគ្រឹះស្ថានអប់រំនេះ បានប្រកាសការពារភាពស្របច្បាប់នៃគ្រឹះស្ថានរបស់ខ្លួន នៅក្នុងការផ្តល់សេវាសិក្សាធិការនៅក្នុងប្រទេសកម្ពុជា ដោយមិនមានធ្វើសកម្មភាពបម្រើដល់ចលនាភេរវកម្មណានោះទេ។
ការថ្លែងចោទប្រកាន់របស់ឯកអគ្គរដ្ឋទូតសាធារណរដ្ឋតួកគីនេះបានធ្វើឡើងបន្ទាប់ពីអង្គការភេរវកម្ម FETO នេះព្យាយាមធ្វើរដ្ឋប្រហារដែលមិនជោគជ័យនៅប្រទេសតួកគីកាលពីសប្តាហ៍មុន។ រដ្ឋប្រហារយោធានេះបានធ្វើឲ្យមនុស្សរាប់ពាន់នាក់ត្រូវបានចាប់ឃុំខ្លួនផងដែរ។
លោកបណ្ឌិត ដេត សុខឧត្តម សាកលវិទ្យាធិការរងនៃសាកលវិទ្យាល័យហ្សាម៉ាន់កម្ពុជា បានប្រាប់ VOA នៅរសៀលថ្ងៃអង្គារនេះថា គ្រឹះស្ថានអប់រំ Zaman (ហ្សាម៉ាន់) រាប់ពីកម្រិតបឋមរហូតដល់មហាវិទ្យាល័យ មិនមានបំពេញមុខងារណាមួយបម្រើដល់ផលប្រយោជន៍នយោបាយ ឬសកម្មភាពរដ្ឋប្រហារដែលទើបតែបានកើតឡើងនៅក្នុងប្រទេសតួកគីនោះទេ។
«មែនទែនទៅ សាកលវិទ្យាល័យ Zaman (ហ្សាម៉ាន់) ឬក៏សាលា Zaman (ហ្សាម៉ាន់) ជាទូទៅ អត់មានអ្វីពាក់ព័ន្ធទៅនឹងព្រឹត្តិការណ៍នៅតួគីទេ ព្រោះយើងជាស្ថាប័នឯកជន ជាស្ថាប័នអប់រំ ដែលកំពុងដំណើរការនៅប្រទេសកម្ពុជា ហើយក៏អត់មានអីទាក់ទងជាមួយអ្វីនៅតួកគីដែរបាទ ហើយគោលជំហររបស់យើងគឺថា បើសិនជាលោកឯកអគ្គរដ្ឋទូតគាត់លើកឡើងបែបនេះ វាធ្វើឲ្យប៉ះពាល់ដល់កិត្តិយសរបស់សាលាយើង ហើយយើងសុំឲ្យគាត់បង្ហាញនូវភស្តុតាងអ្វីដែលគាត់លើកឡើង»។
នៅក្នុងអំឡុងពេលធ្វើប្រតិបតិ្តការដោយរដ្ឋអំណាចប្រទេសតួកគីប្រឆាំងនឹងក្រុមភេរវកម្មនេះ មានមនុស្សច្រើនជាង៦០០០នាក់ត្រូវបានចាប់ឃុំខ្លួន និងអ្នករៀបគម្រោងធ្វើប្រហារ១០០នាក់ទៀតបានបាត់បង់ជីវិត។ មានប្រជាពលរដ្ឋ១៩០នាក់ក៏បានស្លាប់ ហើយនិងប្រជាពលរដ្ឋ១៤០០នាក់ផ្សេងទៀតបានរងរបួស។ នេះបើយោងទៅតាមសេចក្តីប្រកាសព័ត៌មានរបស់ក្រសួងការបរទេសនៃសាធារណរដ្ឋតួកគី។
នៅក្នុងស្ថានទូតសាធារណរដ្ឋតួកគីនៅក្នុងរាជធានីភ្នំពេញ កាលពីថ្ងៃច័ន្ទ លោក Ilhan Kemal Tug ឯកអគ្គរដ្ឋទូតសាធារណរដ្ឋតួកគីប្រចាំនៅកម្ពុជាបានថ្លែងថា រដ្ឋាភិបាលលោកបានស្នើឲ្យមានការបញ្ឈប់រាល់សកម្មភាពរបស់ក្រុម Zaman (ហ្សាម៉ាន់) នៅក្នុងប្រទេសកម្ពុជា។ លោកបន្ថែមថា ស្ថានទូតតួកគីមានទំនាក់ទំនងយ៉ាងជិតស្និទ្ធជាមួយរដ្ឋាភិបាលកម្ពុជាទាក់ទិនដំណើរការសាលានេះ។
«យើងបានស្នើឲ្យរាល់បែបផែននៃការគាំទ្រទាំងអស់ត្រូវបានបញ្ឈប់ ហើយជាការណ៍ពិត យើងចង់ឃើញក្រុម Zaman (ហ្សាម៉ាន់) នៅក្នុងប្រទេសកម្ពុជានេះ បញ្ចប់រាល់សកម្មភាពរបស់ខ្លួននាថ្ងៃអនាគតដ៏ខ្លីខាងមុខនេះ»។
យ៉ាងណាក៏ដោយ លោក ជុំ សុន្ទរី អ្នកនាំពាក្យក្រសួងការបរទេសកម្ពុជា បានប្រាប់ VOA នៅរសៀលថ្ងៃអង្គារនេះថា ក្រសួងពុំទាន់ទទួលបានការស្នើសុំណាមួយពីភាគីរដ្ឋាភិបាលសាធារណរដ្ឋតួកគីនៅឡើយ នៅមុន និងក្រោយការធ្វើរដ្ឋប្រហារនោះទេ។
«រហូតមកដល់ពេលនេះគឺក្រសួងការបរទេសពុំទាន់ទទួលបាននូវសំណើផ្លូវការណាមួយពីស្ថានទូតរបស់តួកគីទេ ហើយនៅពេលណាដែលក្រសួងការបរទេសទទួលបាន ក្រសួងការបរទេសនឹងពិនិត្យពិចារណា ដោយយកចិត្តទុកដាក់ ព្រោះនេះជាកាតព្វកិច្ចរបស់ប្រទេសម្ចាស់ផ្ទះ ក្នុងការពិនិត្យពិចារណាដោយយកចិត្តទុកដាក់ចំពោះសំណើផ្លូវការរបស់ស្ថានទូតនៃប្រទេសជាមិត្ត»។
VOA មិនទាន់អាចទាក់ទងលោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃបានទេ នៅថ្ងៃអង្គារនេះ។
នៅក្នុងការថ្លែងរបស់លោកកាលពីថ្ងៃច័ន្ទម្សិលមិញនេះ លោក Ilhan Kemal Tugបានបញ្ជាក់ថា ការធ្វើរដ្ឋប្រហារនោះត្រូវបានធ្វើឡើងដោយគ្មាននរណាក្រៅពីក្រុមអង្គការភេរវកម្ម FETO នេះ ដែលមេដឹកនាំក្រុមនេះគឺលោក Fethullah Gulen។
លោកថ្លែងថា ក្រុមនេះមានភាពសកម្មនៅក្នុងប្រទេសកម្ពុជាតាំងពីឆ្នាំ១៩៩៣ តាមរយៈក្រុមមួយដែលលោកហៅថាZaman (ហ្សាម៉ាន់) group។ លោកបន្តថា ក្រុមនេះមានសាលាចាប់ពីថ្នាក់មតេ្តយ្យ រហូតដល់សាកលវិទ្យាល័យ។
ការអះអាងរបស់លោក Ilhan Kemal Tug ឯកអគ្គរដ្ឋទូតសាធារណរដ្ឋតួកគីប្រចាំនៅកម្ពុជា បានធ្វើឡើងនៅចំពេលដែលលោក Tom Malinowski ឧបការីរដ្ឋមន្ត្រីការបរទេសសហរដ្ឋអាមេរិកទទួលបន្ទុកសិទ្ធិមនុស្ស ប្រជាធិបតេយ្យ និងការងារ បានមកបំពេញទស្សនកិច្ចរយៈពេលពីរថ្ងៃនៅកម្ពុជា។
កាលពីថ្ងៃច័ន្ទ លោក Ilhan Kemal Tug ថ្លែងថា សហរដ្ឋអាមេរិកនឹងនៅតែជាដៃគូយុទ្ធសាស្ត្ររបស់តួកគី ទោះបីជាលោក Fethullah Gulen ដែលត្រូវគេចោទថា ជាអ្នកនៅពីក្រោយការប៉ុនប៉ងធ្វើរដ្ឋប្រហារនោះ បានធ្វើនិរទេសខ្លួនទៅរស់នៅក្នុងសហរដ្ឋអាមេរិកតាំងពីឆ្នាំ១៩៩៩ក្តី។
សាលាអន្តរជាតិ Zaman (ហ្សាម៉ាន់) នៅល្ងាចថ្ងៃអង្គារនេះ បានចេញសេចក្តីថ្លែងការណ៍ថ្កោលទោសយ៉ាងខ្លាំងចំពោះក្រុមរដ្ឋប្រហារនៅប្រទេសតួកគី ដែលបានកើតឡើងកាលពីថ្ងៃពី១៥ ខែកក្កដា ឆ្នាំ២០១៦។ សេចក្តីថ្លែងការណ៍នោះបន្តថា ក្រុមហ៊ុន Zaman (ហ្សាម៉ាន់) មិនមានការគាំទ្រ ការចូលរារាំងរបស់ក្រុមយោធាណាមួយ ព្រោះអ្នកទាំងអស់គ្នានៅក្នុងប្រទេសតួកគីអាចនឹងទទួលគ្រោះថ្នាក់ជាខ្លាំងចំពោះការប៉ុនប៉ងដ៏សាហាវនេះ។
ស្ថាបនិករបស់សាលាអន្តរជាតិ Zaman (ហ្សាម៉ាន់) បានចាប់ផ្តើមស្ថាបនាសាលានេះដោយផ្អែកលើស្មារតី និងទស្សនៈវិស័យពីលោក Fethullah Gulen។ ប៉ុន្តែ លោក Gulen មិនដែលមានការចូលរួមក្នុងការងាររដ្ឋបាល ឬជាម្ចាស់ស្របច្បាប់ណាមួយរបស់សាលា Zaman (ហ្សាម៉ាន់) ឡើយ គឺគាត់មិនដែលបានផ្តល់ការសម្រេចចិត្តណាមួយក្នុងការបង្កើត ឬដំណើរការសាលានេះទេ។ សរុបមក អ្វីដែលទាក់ទងនឹងលោក Gulen គឺគ្រាន់តែស្មារតី និងទស្សនៈវិស័យតែប៉ុណ្ណោះ។
រហូតមកដល់ពេលនេះ សាលា Zaman (ហ្សាម៉ាន់) មានសិស្សចុះឈ្មោះចំនួនប្រហែល២០០០នាក់ ដែលកំពុងសិក្សាថ្នាក់មតេ្តយ្យ ថ្នាក់បឋមសិក្សា ថ្នាក់វិទ្យាល័យ និងមហាវិទ្យាល័យ៕
