រស់ ភក្តី នៅចាំរូបរាងរ៉ូបដំបូងបង្អស់ដែលគាត់បានរចនាឡើង។ ភក្តីរចនារ៉ូបខ្មៅសាមញ្ញមួយ ក្រោយពីបានប្រទះឃើញរ៉ូបស្រដៀងគ្នាមួយនៅលើប្រព័ន្ធផ្សព្វផ្សាយ Instagram នៅឆ្នាំ២០១៣។ ភក្តីបានប្រើប្រាស់ក្រណាត់ និងសម្ភារៈដែលមានស្រាប់នៅក្នុងផ្ទះ និងម៉ាស៊ីនដេរចាស់មួយរបស់ម្តាយខ្លួនដើម្បីដេររ៉ូបមួយនេះឡើង ទាំងមិនបានចាប់អារម្មណ៍ថា ខ្លួនកំពុងតែចាប់ផ្តើមដើរឆ្ពោះទៅកាន់អាជីពមួយក្នុងវិស័យរចនាម៉ូតសម្លៀកបំពាក់។
មួយថ្ងៃក្រោយមក ភក្តីអង្គុយពីមុខរ៉ូបខ្មៅវាលខ្នងគ្របដោយក្រណាត់ស្បៃពីក្រៅដែលខ្លួនបានរចនារួចរាល់នោះ។ ភក្តីមានអារម្មណ៍ថា មានមោទនភាពជាក្រៃលែង។ ចាប់ផ្តើមនៅក្នុងបន្ទប់តូចមួយ ជាមួយនឹងម៉ាស៊ីនដេរចាស់មួយ សព្វថ្ងៃសម្លៀកបំពាក់របស់ភក្តីទទួលបានការចាប់អារម្មណ៍យ៉ាងខ្លាំងពីអតិថិជន ហើយសម្លៀកបំពាក់ទាំងនោះត្រូវបានបេក្ខជនបវរកញ្ញាឯកកម្ពុជា និងអ្នកចម្រៀងដែលកំពុងមានឈ្មោះបោះសំឡេងផ្សេងទៀតដូចជាកញ្ញា សួន សុជាតា ដែលគេនិយមហៅថា Nikki Nikki ជ្រើសរើសយកមកស្លៀកពាក់ទៀតផង។
ភក្តីប្រាប់វីអូអេថា៖ «ការណ៍ដែលខ្ញុំត្រូវបានទទួលស្គាល់ដោយសិល្បករ និងអ្នកដទៃនៅក្នុងវិស័យកម្សាន្តគឺជាការផ្តល់នូវសុពលភាពមួយដល់ខ្ញុំ។ វាជាកម្លាំងចិត្តដែលជម្រុញខ្ញុំទៅមុខ ដោយសារម៉ាកសញ្ញារបស់ខ្ញុំត្រូវបានគេឲ្យតម្លៃនិងទទួលស្គាល់»។
ជាអ្នករចនាម៉ូតសម្លៀកបំពាក់វ័យ ២៥ ឆ្នាំ ភក្តីកត់សម្គាល់ខ្លួនថា ជាមនុស្សដែលមានភេទបត់បែន ឬ fluid ហើយមានឈ្មោះហៅក្រៅថា ស្កាយឡឺ (Skyler)។ ភក្តីបានយកឈ្មោះនេះដាក់ជាម៉ាកសម្លៀកបំពាក់របស់ខ្លួនថា “Skyleros Fashion”។ ភក្តីសម្រេចបានការងារជាច្រើនទាំងវ័យក្មេង ដែលរាប់បញ្ចូលទាំងការដើរតួគម្រូដល់សហគមន៍អ្នកស្រឡាញ់ភេទដូចគ្នាផងដែរ។
ភក្តីនៅតែចងចាំពីអតីតកាលរបស់ខ្លួន។ ភក្តីនៅចាំថា កាលពីគាត់នៅវ័យក្មេង គាត់ចូលចិត្តលេងជាមួយនឹងសាច់ក្រណាត់ផ្សេងៗ ហើយក្នុងឆ្នាំ ២០១៥ នៅពេល ភក្តីនៅរៀនថ្នាក់វិទ្យាល័យនៅឡើយ ភក្តីចាប់ផ្តើមហ្វឹកហាត់ដេរ ប៉ះ និងរចនាម៉ូតសម្លៀកបំពាក់សម្រាប់ក្រុមរាំរបស់ខ្លួនបណ្តើរៗទៅហើយ ទាំងមិនដែលធ្លាប់បានចូលសាលារចនាម៉ូតសោះក៏ដោយ។
ភក្តីហាត់រៀនដោយខ្លួនឯងតាមរយៈការមើលវីឌីអូគម្រូជាច្រើនលើបណ្ដាញ YouTube អានទស្សនាវដ្តីរចនាម៉ូតសម្លៀកបំពាក់ដូចជា Vogue ជាដើម ដើម្បីបំផុសគំនិត និងរៀនពីរបៀបរចនាម៉ូតសម្លៀកបំពាក់ចាំបាច់មួយចំនួន ដូចជាការដេរអាវ និងការប្រើអំបោះជាដើម។
ភក្តីនិយាយថា៖ «ខ្ញុំទទួលស្គាល់ថាវាមិនមែនជាកន្លែងត្រឹមត្រូវជាងគេដើម្បីរៀនរចនាម៉ូតសម្លៀកបំពាក់នោះទេ ពីព្រោះយើងអាចធ្វើត្រាប់តាមគេ ប៉ុន្តែយើងមិនមានអ្នកណាមកប្រាប់យើងថា យើងធ្វើត្រូវឬខុសនោះទេ។ និយាយរួមទៅយើងមិនមានការណែនាំដែលចាំបាច់គ្រប់គ្រាន់ដែលអ្នករចនាត្រូវការនោះឡើយ»។
ទាំងមិនទាន់មានបទពិសោធន៍ប្រឡូកក្នុងវិស័យរចនាម៉ូតបានប៉ុន្មានផង រួមទាំងការខ្វះការហ្វឹកហាត់ត្រឹមត្រូវ ភក្តីនៅតែសម្រេចចិត្តបើកដំណើរការម៉ាក Skyleros Fashion ក្នុងឆ្នាំ ២០១៥ ក្រោយពីទទួលបានការជួយជ្រោមជ្រែងពីមិត្តភក្តិ។ ពេលនោះភក្តីមានអាយុ១៩ ឆ្នាំ។
ភក្តីនិយាយថា៖ «ខ្ញុំគ្រាន់តែដឹងថា ខ្ញុំចូលចិត្តរចនាម៉ូតខោអាវ ប៉ុន្តែខ្ញុំមិនដែលយកចិត្តទុកដាក់ពីវាពេកនោះទេ។ ក្រោយពីខោអាវទាំងអស់របស់ខ្ញុំត្រូវបានគេទិញអស់ ទើបខ្ញុំដឹងថា វាបានក្លាយជាអាជីពរបស់ខ្ញុំពិតមែន»។
ដោយមានការគាំទ្រពីគ្រួសារ និងមិត្តភក្តិ ភក្តីបានក្លាយខ្លួនជាបុគ្គលដែលគួរអោយកត់សម្គាល់មួយរូបនៅក្នុងវិស័យរចនាម៉ូតនៅកម្ពុជា។ ភក្តីបានចូលរួមក្នុងសហគមន៍អ្នករចនាម៉ូតដែលទទួលបានជោគជ័យដទៃទៀត ដូចជា លោក គង់ សុធាដែលជាបេក្ខជនប្រកួតការរចនាសម្លៀកបំពាក់ Runway Ready Designer ក្នុងឆ្នាំ ២០១៧ របស់ក្រុមហ៊ុន AirAsia លោក សុខ ណាន់ ដែលជាអ្នករចនាម៉ូតមានឈ្មោះបោះសំឡេងក្នុងផ្នែករចនាម៉ូតសហសម័យខ្មែរ និងកញ្ញា ណា ម៉ារីយ៉ា ដែលជាម្ចាស់ម៉ាក PRIVE។
លោក ពៅ ស៊ីថាន ជាអ្នករចនាម៉ូតសម្លៀកបំពាក់ម្នាក់ ដែលកំពុងទទួលបានការចាប់អារម្មណ៍នៅក្នុងវិស័យនេះនិយាយថា ភក្តីបានក្លាយជានិមិត្តរូបគម្រូម្នាក់នៅក្នុងវិស័យរចនាម៉ូត ដោយសារគាត់ធ្វើអ្វីដែលខ្លួនស្រឡាញ់ បើទោះបីជាមិនមានការហ្វឹកហាត់ផ្លូវការក្តី។
លោក ស៊ីថាន បន្ថែមថា ប្រជាប្រិយភាព និងបុគ្គលិកលក្ខណៈរបស់ភក្តីបានជំរុញឲ្យមានការទទួលស្គាល់ពីសំណាក់សាធារណជន ហើយបានបើកឱកាសឲ្យអ្នកនៅក្នុងសហគមន៍អ្នកស្រឡាញ់ភេទដូចគ្នាដទៃទៀត ដែលចាប់អារម្មណ៍ក្នុងការរចនាម៉ូតទៀតផងដែរ។
លោក ស៊ីថាន ថ្លែងដូច្នេះថា៖ «ខ្ញុំស្គាល់មនុស្សជាច្រើនដែលស្គាល់ភក្តី។ ភក្តីមានប្រជាប្រិយភាពណាស់នៅក្នុងប្រព័ន្ធផ្សព្វផ្សាយ ហើយបើកទូលាយចំពោះភេទរបស់ខ្លួនផង ដូច្នេះខ្ញុំគិតថា វាជួយអ្នករចនាម៉ូតដទៃទៀតច្រើន ដោយសារភក្តីបានត្រួសត្រាយផ្លូវឲ្យពួកយើងដែលមកតាមក្រោយ»។
ភក្តីនិយាយថា ការដែលលោករៀនរចនាដោយវិធីមិនផ្លូវការអនុញ្ញាតឲ្យលោកអាចដោះលែងខ្លួនពីគំនិតរចនាម៉ូតបែបប្រពៃណី ប៉ុន្តែវាក៏ជះឥទ្ធិពលដល់ការយល់ដឹងរបស់លោកក្នុងការរចនាសម្លៀកបំពាក់ និងការគ្រប់គ្រងអាជីវកម្មក្នុងវិស័យនេះផងដែរ។ មិត្តភក្តិរបស់លោកបានដើរតួយ៉ាងសំខាន់ក្នុងការអប់រំលោកទាក់ទងនឹងការគ្រប់គ្រងហិរញ្ញវត្ថុផ្សេងៗ។
ភក្តីនិយាយថា៖ «នៅសាលា គេបង្រៀនយើងពីគ្រោងសម្លៀកបំពាក់ យុទ្ធសាស្ត្រអាជីវកម្ម ហើយគ្រូផ្តល់ដំបូន្មានច្រើន យើងមិនចាំបាច់ប្រឹងតែម្នាក់ឯងទេ។ ដូច្នេះហើយសម្រាប់ខ្ញុំ ខ្ញុំត្រូវការពេលច្រើនជាងធម្មតាដើម្បីរចនាសម្លៀកបំពាក់នីមួយៗ»។
ទោះបីជាការចាប់ផ្តើមម៉ាកនេះមានការលំបាកពីដំបូងក្តី ក៏ការតស៊ូក្នុងការហ្វឹកហាត់ និងវិជ្ជាជីវៈក្នុងការទាក់ទងភ្ញៀវដែលភក្តីបានទទួលកន្លងមក បានញាំងឲ្យភក្តីអាចកំណត់គោលដៅទីផ្សារខ្លួនមករកមនុស្សមួយក្រុមតូចគឺអ្នកដែលចូលចិត្តសម្លៀកបំពាក់ដែលកាត់តាមតម្រូវការ ជាពិសេសសម្លៀកបំពាក់សម្រាប់សម្តែងលើឆាក និងរាត្រីស្រមោលស។
អ្នករចនាម៉ូតរូបនេះទទួលស្គាល់ថា វិស័យរចនាម៉ូតសម្លៀកបំពាក់មានការទទួលស្គាល់ច្រើនក្នុងចំណោមសមាជិកអ្នករចនាម៉ូតដែលមកពីសហគមន៍អ្នកស្រឡាញ់ភេទដូចគ្នា។
ភក្ដីលើកឡើងថា៖ «ទាំងអស់គ្នាមិនមែនសុទ្ធតែបើកទូលាយពីភេទគេនោះទេ។ អ្នកខ្លះនៅលាក់បាំងអត្តសញ្ញាណខ្លួននៅឡើយ ជាពិសេសនៅក្នុងវិស័យកំសាន្តពីព្រោះវិស័យនោះចង់បានភាគច្រើនមនុស្សដែលជាភេទប្រុសឬស្រីប៉ុណ្ណោះ។ នេះគឺដោយសារតែគេគិតពីអ្នកទស្សនា និងមុខមាត់ម៉ាកសញ្ញារបស់គេ»។
ភក្តីសង្ឃឹមថា ខ្លួននឹងអាចធ្វើជាឧទាហរណ៍ល្អមួយសម្រាប់សមាជិកអ្នកនៅក្នុងសហគមន៍មនុស្សដែលស្រឡាញ់ភេទដូចគ្នា។ ពួកគេអាចចាប់ផ្តើមបង្កើតអាជីពដែលពួកគេចូលចិត្តបាន។ ទោះបីជាយ៉ាងណាក៏ដោយភក្តីក៏ទទួលស្គាល់ថាវាមិនតែងតែជាផ្លូវដែលងាយស្រួលដើរនោះឡើយ។
ភក្ដីនិយាយថា៖ «ខ្ញុំគិតថានៅពេលណាមួយសង្គមនឹងទទួលយកយើងបានប្រសើរជាងនេះ។ ខ្ញុំមិនដែលទាំងគិតពីរឿងនេះផង ពេលដែលខ្ញុំធ្វើការងាររបស់ខ្ញុំ។ បើសិនជាអ្នកដទៃចង់វាយតម្លៃខ្ញុំ កុំវាយតម្លៃភេទរបស់ខ្ញុំ គួរវាយតម្លៃការងារខ្ញុំវិញ»៕
