នៅខណៈដែលមានស្ថានភាពអាប់អួរនៅក្នុងពិភពលោកដោយសារមានភេរវកម្មសាកលនិងវិបត្តិសុខភាពដ៏ប្រល័យមួយ ក្រុមមេដឹកនាំក្នុងពិភពលោកនឹងប្រជុំគ្នានៅក្នុងបូរីញូវយ៉ក(New York) ក្នុងសប្តាហ៍នេះនៅក្នុងមហាសន្និបាតប្រចាំឆ្នាំនៃអង្គការសហប្រជាជាតិ (អ.ស.ប.)។ គេរំពឹងថា បញ្ហាក្រុមភេរវជនហៅខ្លួនឯងថាពួករដ្ឋអ៊ីស្លាម (Islamic State) និងបញ្ហាការខិតខំប្រឹងប្រែងត្រួតត្រាការរាតត្បាតមេរោគវីរុសជំងឺ Ebola ជាបញ្ហាសំខាន់ជាងគេនៅក្នុងការពិភាក្សាគ្នា។
លោកអគ្គលេខាធិការអ.ស.ប. បាន គីមូន មានប្រសាសន៍ថា អំពើហិង្សានៅក្នុងប្រទេសអ៊ីរ៉ាក់ និងប្រទេស ស៊ីរី ដែលបានក្លាយទៅជាកន្លែងបណ្តាលឱ្យមានពួកនិយមជ្រុល ដែលលេចធ្លោជាងគេគឺពួករដ្ឋអ៊ីស្លាមនឹងត្រូវដោះស្រាយដោយសហគមន៍អន្តរជាតិ។
«ខ្ញុំស្វាគមន៍ការមូលមតិគ្នាដែលកើនទ្បើងជាងមុនដើម្បីធ្វើសកម្មភាពប្រឆាំងនឹងការគំរាមកំហែងធ្ងន់ធ្ងរនេះដល់សន្តិភាពនិងសន្តិសុខក្នុងសាកលលោកនិងក្នុងតំបន់»។
ផ្នែកសំខាន់មួយនៃកិច្ចខិតខំប្រឹងប្រែងនេះគឺការប្រជុំមួយនៃក្រុមប្រឹក្សាសន្តិសុខ អ.ស.ប.អំពីការលេចទ្បើងនៃពួកយុទ្ធជនភេរវជនបរទេសដែលមានលោកប្រធានាធិបតី បារ៉ាក់ អូបាម៉ា ជាប្រធាននៃអង្គប្រជុំ។
លោកសាស្ត្រាចារ្យ Richard Gowan នៃសាកលវិទ្យាល័យ New York និយាយថា ការប្រជុំនេះបញ្ជូនសារនយោបាយសំខាន់មួយ។
«លោកប្រធានាធិបតីអូបាម៉ាបានបង្កើតក្រុមចម្រុះមួយនៃប្រទេស៤០ដើម្បីប្រយុទ្ធប្រឆាំងនឹងពួក ISIS។ នៅឯអ.ស.ប.លោកនឹងបញ្ជាក់ជាថ្មី អំពីការតស៊ូនោះ។ ជាការពិត ភាគច្រើននៃការងារពិបាកបានត្រូវធ្វើរួចស្រេចហើយ ក៏ប៉ុន្តែអ.ស.ប.ជាឆាកល្អមួយសម្រាប់និយាយអំពីសេចក្តីត្រូវការប្រយុទ្ធប្រឆាំងនឹងពួកអ៊ីស្លាមនិយម»។
នៅលើរបៀបវារៈអន្តរជាតិខ្ពស់ដែរ គឺការទប់ទល់នឹងការរាតត្បាតកាលពីពេលថ្មីៗនេះនៃមេរោគវីរុសជំងឺ Ebola ដែលបានសម្លាប់ជិតពាក់កណ្តាលនៃមនុស្សប្រមាណ៥.០០០នាក់ដែលមានជំងឺនេះនៅក្នុងផ្នែកខាងលិចនៃទ្វីបអាហ្វ្រិក។
លោកអគ្គលេខាធិការអ.ស.ប. បាន គីមូន មានប្រសាសន៍ថា៖ «នេះមិនមែនគ្រាន់តែជាវិបត្តិសុខភាពមួយទេ វាមានផលវិបាកធ្ងន់ធ្ងរខាងមនុស្សធម៌ ខាងសេដ្ឋកិច្ចនិងខាងសង្គមដែលអាចរាលដាលហួសពីប្រទេសមានជំងឺនេះ»។
លោកស្រី Samantha Power ឯកអគ្គរដ្ឋទូតស.រ.អ.ប្រចាំអ.ស.ប.បានមានប្រសាសន៍ថា ការប្រជុំប្រចាំឆ្នាំទាំងនេះមានន័យនាំពួកមេដឹកនាំឱ្យមកជួបជុំគ្នាដើម្បីដោះស្រាយឧបសគ្គសាកល។
«ការគំរាមកំហែងទាំងពីរនេះពន្យល់អំពីគោលបំណងនៃការបង្កើតអ.ស.ប.និងគោលបំណងនៃការប្រមូលផ្តុំពួកប្រមុខរដ្ឋរបស់អ.ស.ប.នៅរៀងរាល់រដូវ ដែលចែងអំពីធ្វើបែបណាដើម្បីប្រមូលធនធានរបស់យើងសម្រាប់ធ្វើកិច្ចសហប្រតិបត្តិការជាមួយគ្នា មិនមែនគ្រាន់តែដើម្បីដោះស្រាយការគំរាមកំហែងរួមគ្នាប៉ុណ្ណោះទេ ក៏ប៉ុន្តែដើម្បីដោះស្រាយការគំរាមកំហែងដែលប្រទេសតែមួយមិនអាចធ្វើបាន»។
វិបត្តិនៅក្នុងទ្វីបអាហ្វ្រិក ជម្លោះនៅក្នុងប្រទេសអ៊ុយក្រែននិងរយៈពេលក្រោយសង្គ្រាម៥០ថ្ងៃនៅក្នុងតំបន់ Gaza ជាបញ្ហាឯទៀតៗដែលនឹងត្រូវពិភាក្សាដោយពួកមេដឹកនាំទាំងនេះដែរ។ លោកអគ្គលេខាធិការអ.ស.ប.ក៏នឹងកោះប្រជុំសន្និសីទកំពូលមួយអំពីការប្រែប្រួលអាកាសធាតុដើម្បីនិយាយបញ្ចុះបញ្ចូលពួកប្រទេសនានាឱ្យធ្វើការសន្យាកាត់បន្ថយការបញ្ចេញឧស្ម័នផ្ទះកញ្ចក់។
លោក Richard Gowan នៃសាកលវិទ្យាល័យញូវយ៉កនិយាយថា ឆ្នាំទៅមិញជាឆ្នាំពិបាកមួយសម្រាប់សហគមន៍អន្តរជាតិ។
«នេះជាឆ្នាំមួយមានការឈឺចាប់ពិតប្រាកដនៅក្នុងការទូតអ.ស.ប. ជាមួយការប្រយុទ្ធគ្នាក្នុងប្រទេសស៊ីរី ការប្រយុទ្ធគ្នាក្នុងប្រទេសអ៊ុយក្រែន។ បញ្ហាកើតទ្បើងដោយពួក ISIS និងបញ្ហាជំងឺ Ebola ជាបញ្ហាពីរដែលរដ្ឋាភិបាលទាំងអស់អាចយល់ស្របគ្នាបាន។ ហើយនឹងមានការជំរុញខ្លាំងមួយដើម្បីធ្វើឱ្យមានឯកភាពខ្លះនៅអ.ស.ប.នៅក្រោយឆ្នាំមួយមានការបែកបាក់គ្នាខ្លាំង»។
កិច្ចការទូតខ្លះនឹងមានធ្វើនៅក្នុងមហាសាលមហាសន្និបាតដែលបានត្រូវជួសជុលជាថ្មីដែលជាផ្នែកចុងក្រោយនៃការជួសជុលជាថ្មីនូវមជ្ឈមណ្ឌលអ.ស.ប.មានរយៈពេលជិត៦ឆ្នាំនិងអស់ប្រាក់២.២០០លានដុល្លារសម្រាប់ធ្វើអគារនេះដែលមានរយៈពេលជិត៧០ឆ្នាំមកហើយនេះឱ្យមានសុវត្ថិភាពជាងមុននិងប្រើថាមពលតិចជាងមុនផងដែរ៕
ប្រែសម្រួលដោយ ឈឹម សុមេធ
