នៅថ្ងៃពុធនេះ រដ្ឋសភាសហរដ្ឋអាមេរិកបានគាំងដំណើរការដោយសារការដកតំណែងប្រធាននិងការប្រឈមរបស់សមាជិកសភានឹងកាលបរិច្ឆេទផុតកំណត់ក្នុងរយៈពេល ៦ សប្ដាហ៍ទៀត ដើម្បីអនុម័តច្បាប់ថវិកានិងបញ្ចៀសការបិទរដ្ឋាភិបាល។
ការខ្វះរដ្ឋសភាមួយដែលមានដំណើរការពេញលេញនិងក្ដីរំពឹងនៅក្នុងការបាត់បង់ពេលបន្ថែមទៀតដើម្បីកំណត់និងជ្រើសរើសបេក្ខជនប្រធានរដ្ឋសភាណាដែលអាចទាក់ទាញបានការគាំទ្រគ្រប់គ្រាន់បានធ្វើឱ្យច្បាប់ថវិកាសំខាន់ៗមួយចំនួនស្ថិតក្នុងភាពស្រពិចស្រពិល ដែលក្នុងនោះរួមមានទាំងច្បាប់ថវិកាសម្រាប់ហិរញ្ញប្បទានយោធាបរទេស ជំនួយមនុស្សធម៌អន្តរជាតិ និងកិច្ចប្រឹងប្រែងតតាំងនឹងឥទ្ធិពលរបស់ចិនផងដែរ។
គេមិនរំពឹងថាសមាជិកនៅក្នុងរដ្ឋសភាដែលមានគណបក្សសាធារណរដ្ឋជាគណបក្សសំឡេងភាគច្រើននឹងបោះឆ្នោតបន្ថែមណាមួយទៀតទេនៅក្នុងសប្ដាហ៍នេះ។ ប៉ុន្តែជំនួសមកវិញ សមាជិករដ្ឋសភាទាំងបក្សប្រជាធិបតេយ្យនិងបក្សសាធារណរដ្ឋនឹងពិភាក្សាជ្រើសរើសប្រធានរដ្ឋសភាថ្មី ដែលនឹងដឹកនាំរដ្ឋសភាដែលបក្សទាំងពីរមានសំឡេងប្រកៀកប្រកិតគ្នានេះឆ្លងកាត់ដំណាក់កាលមួយដែលនឹងតម្រូវឱ្យមានការព្រមព្រៀងគ្នាមិនត្រឹមតែក្នុងចំណោមពួកគេផ្ទាល់នោះទេ ប៉ុន្តែថែមទាំងជាមួយនឹងព្រឹទ្ធសភាដែលដឹកនាំដោយគណបក្សប្រជាធិបតេយ្យផងដែរ មុនពេលច្បាប់ថវិកាអាចត្រូវបានអនុម័ត។
ប្រវត្តិសាស្ត្រថ្មីៗបានបង្ហាញថា ការជ្រើសរើសប្រធានរដ្ឋសភាថ្មីប្រហែលជាមិនមែនជាដំណើរការលឿននោះទេ។ លោកអតីតប្រធានរដ្ឋសភា Kevin McCarthy ដែលត្រូវបានដកចេញពីតំណែងកាលពីថ្ងៃអង្គារ ធ្លាប់បានឆ្លងកាត់ការបោះឆ្នោត ១៥ ដងកាលពីខែមករាដើម្បីបានកាន់តំណែងនេះ។
នៅពេលនោះ លោកត្រូវធ្វើសម្បទានជាច្រើនទៅក្រុមសមាជិកសភាអភិរក្សនិយមដែលជំទាស់នឹងលោកនៅក្នុងជួរគណបក្សរបស់លោក ដែលក្នុងនោះរួមមានទាំងបទបញ្ជាផ្ទៃក្នុងមួយដែលតម្រូវឱ្យសមាជិករដ្ឋសភាតែម្នាក់ប៉ុណ្ណោះអាចស្នើឱ្យមានការបោះឆ្នោតដកតំណែងប្រធានរដ្ឋសភារបស់លោកផងដែរ។
សមាជិករដ្ឋសភាខាងបក្សសាធារណរដ្ឋលោក Matt Gaetz បានដាក់ញ្ញត្តិដកតំណែងលោក McCarthy កាលពីថ្ងៃចន្ទ ដោយបានបង្ហាញការខកចិត្តចំពោះការដឹកនាំរបស់លោក McCarthy បន្ទាប់ពីលោក McCarthy បានបរាជ័យនៅក្នុងការអនុម័តច្បាប់ថវិកាដែលផ្ដល់អាទិភាពលើសំណើចំណាយបែបអភិរក្សនិយមកាលពីសប្ដាហ៍មុន។
សំឡេងភាគច្រើនតិចតួចរបស់គណបក្សសាធារណរដ្ឋនៅក្នុងរដ្ឋសភាមានន័យថាលោក Gaetz ត្រូវការសមាជិកគណបក្សសាធារណរដ្ឋតិចតួចប៉ុណ្ណោះដើម្បីបោះឆ្នោតរួមជាមួយនឹងសមាជិកគណបក្សប្រជាធិបតេយ្យដើម្បីដកតំណែងលោក McCarthy ដោយសំឡេង ២១៦ ទល់នឹង ២១០ កាលពីថ្ងៃអង្គារ។ សមាជិកគណបក្សសាធារណរដ្ឋភាគច្រើនបានបោះឆ្នោតគាំទ្រឱ្យលោក McCarthy នៅធ្វើជាប្រធានរដ្ឋសភា។
វាជាលើកដំបូងបង្អស់នៅក្នុងប្រវត្តិសាស្ត្រសហរដ្ឋអាមេរិកដែលសមាជិករដ្ឋសភាបានបោះឆ្នោតដកតំណែងប្រធានរដ្ឋសភា។
បើទោះបីជាមានសិទ្ធិឈរឈ្មោះជាប្រធានរដ្ឋសភាម្ដងទៀតក៏ដោយ ក៏លោក McCarthy បានប្រកាសកាលពីយប់ថ្ងៃអង្គារថាលោកនឹងមិនឈរឈ្មោះម្ដងទៀតនោះទេ៕
