ព្រះសង្ឃខ្មែរនិងពុទ្ធបរិស័ទខ្មែរមកពីប្រទេសមួយចំនួន និង តាមបណ្តារដ្ឋនានាក្នុងសហរដ្ឋអាមេរិក បានចូលរួមជាមួយពលរដ្ឋខ្មែរនិងពលរដ្ឋប្រទេសនានាក្នុងពិភព លោក ដើម្បីប្រារព្ធពិធីបុណ្យវិសាខបូជាដែលក្លាយជាពិធីបុណ្យសកល និងប្រាព្ធពិធី បុណ្យសូត្រព្រះត្រៃបិដក រួមគ្នា ក្នុងវត្តមុនីសុតារាម រដ្ឋមីនីសូតា កាលពីសប្តាហ៍ទី៣ នៃខែ ឧសភា ដើម្បីគោរពប្រពៃណី ទំនៀមទម្លាប់ ពង្រឹងពុទ្ធសាសនា ថែរក្សាកេរមរតក ហើយនឹងរក្សាតម្លៃ ព្រះពុទ្ធសាសនា ។
ពិធីបុណ្យនេះត្រូវបានគេប្រារព្ធឡើងដើម្បីរំឭកដល់ព្រឹត្តិការណ៍ធំៗ៣ គឺថ្ងៃដែលព្រះពុទ្ធទ្រង់ប្រសូត ទ្រង់បានត្រាស់ដឹង និងការចូលបរិនិព្វានរបស់ព្រះសម្មាសម្ពុទ្ធ ឬ ព្រះពុទ្ធ ដែលកើតឡើងនៅថ្ងៃពេញបរមី ខែវិសាខដូចគ្នា ដោយខុសតែឆ្នាំ ហើយដែលព្រឹត្តិការណ៍ដ៏អស្ចារ្យទាំងនេះ ត្រូវពលរដ្ឋខ្មែរនិងពលរដ្ឋក្នុងប្រទេសមួយចំនួន ទៀតគោរពដឹងគុណចំពោះការប្រៀនប្រដៅ គោលលទ្ធិដ៏អស្ចារ្យ និងអច្ឆរិយភាព ទាំងឡាយ។
ព្រះគ្រូចៅអធិការវត្តខ្មែរនៅទីក្រុងម៉ុងរ៉េអាល់ ប្រទេសកាណាដាគឺព្រះតេជគុណបណ្ឌិតហុក សាវណ្ណដែលចូលរួមក្នុងពិធីបុណ្យនៅវត្តមុនីសូតារាមផងនោះ បានបញ្ជាក់ត្រួសៗពីអត្តន័យនៃពិធីបុណ្យវិសាខបូជា ដោយមានថេរដីកាថា៖
«ប្រទេសខ្មែរយើងជាអ្នកកាន់ព្រះពុទ្ធសាសនាថេរវាទ គ្រប់វត្តអារាមទាំងអស់តែងតែ ប្រារព្ធធ្វើពិធីបុណ្យវិសាខបូជាទាំងក្នុងប្រទេស ទាំងក្រៅប្រទេស ដែលជាបុណ្យ សំខាន់របស់ព្រះពុទ្ធសាសនាយើង គឺយើងគោរពព្រះអង្គប្រសូត្រ ត្រាស់ដឹង និង បរិនិញ្វន។ ការរម្លឹកនេះ គឺដើម្បីរម្លឹកពាក្យប្រៀនប្រដៅរបស់ព្រះពុទ្ធទ្រង់ធ្វើឲ្យពិភពលោក រួមទាំងប្រទេសខ្មែរយើងផង អនុវត្តតាមព្រះអង្គនឹងបានសុខសន្តិភាព»។
ព្រះតេជគុណបណ្ឌិតហុក សាវណ្ណ បានបញ្ជាក់ដោយថេរដីកាថា ពិធីបុណ្យវិសាខ បូជាត្រូវបានប្រទេសជិត២០០ ដែលជាសមាជិកអង្គការសហប្រជាជាតិបានអនុម័ត ទទួលស្គាល់កាលពីចុងឆ្នាំ១៩៩៩ ចំពោះការប្រារព្ធពិធីបុណ្យជាអន្តរជាតិ របស់ ប្រទេសអាស៊ីមួយចំនួនដែលគោរពប្រតិបត្តិតាមព្រះពុទ្ធសាសនា រួមទាំងកម្ពុជា ចិន ស្រីលង្កា ថៃ វៀតណាម ឡាវ ភូមាផងដែរ។
កម្មវិធីបុណ្យនេះ មានព្រះសង្ឃ ពុទ្ធបរិស័ទជិតឆ្ងាយជាង១៤០ វត្ត មកពីសហរដ្ឋអាមេរិក និងមកពីប្រទេសកម្ពុជា ដែនដីកម្ពុជាក្រោម ហើយនឹងប្រទេសកាណាដា បានប្រារព្ធពិធីបុណ្យវិសាខបូជានិង សូត្រព្រះត្រៃបិដករួមគ្នា សមដូចព្រះគ្រូចៅ អធិការវត្ត មុនីសុតារាម រដ្ឋមីនីសូតា បានបញ្ជាក់ដោយថេរដីកាថា មានការជួបជុំព្រះ សង្ឃ ពុទ្ធបរិស័ទ សូត្រធម៌ នមស្ការ រម្លឹកដល់គុណ បារមី ដែលព្រះអង្គប្រសូត្រ ត្រាស់ដឹង និង បរិនិពា្វន ការដង្ហែក្បួនបង្ហាញនូវភាពអស្ចារ្យទាក់ទងនឹងអត្តន័យ វិសាខបូជា ដង្ហែព្រះបរមសារីរិកធាតុ ព្រះពុទ្ធ ដែលទទួលបានពីប្រទេសស្រីលង្កា ព្រមទាំងរូបភាពផ្សេងៗ ដែលព្រះសង្ឃជាច្រើនរយអង្គ និងបរិស័ទជាច្រើនពាន់នាក់ បានដង្ហែប្រទក្សិណ។
«ពេលនោះគឺថាយើងមានការស្វាធ្យាយធម៌ផង មាននិយាយរៀបរាប់បញ្ជាក់ពីអត្តន័យ នៃព្រះសម្មាសម្ពុទ្ធ ព្រះអង្គត្រាស់ដឹងផង ហើយដោយមានការពន្យល់ បញ្ជាក់នៅក្នុងព្រះវិហារនេះ ដោយមានវាគ្មិនដែលចេះដឹងខ្ពស់ហ្នឹងគឺពន្យល់ពីព្រះអង្គ ប្រសូត្រមានន័យយ៉ាងម៉េច ព្រះអង្គត្រាស់ដឹងហ្នឹង មានប្រយោជន៍យ៉ាងម៉េច ព្រះអង្គ ចូលបរិនិព្វានយ៉ាងម៉េច ហើយក៏មានធម្មកថិកដែលទេសនាល្បីៗហ្នឹង៥ព្រះអង្គ ដែលស្តីអំពីព្រះត្រៃបិដក ព្រះវិន័យ ព្រះសូត្រ ព្រះអភិធម្ម»។
លោក ម៉ីយ សុផល អគ្គលេខាធិការវត្តមុនីសុតារាម បានថ្លែងកោតសរសើរពីការ ចូលរួមរបស់ពុទ្ធបរិស័ទចំពោះការជួយជ្រោមជ្រែងក្នុងពិធីបុណ្យធំៗ។
«ពិសេសនោះគឺវត្តមុនីសុតារាមគឺថាពុទ្ធបរិស័ទមានការគាំទ្រសាសនាយ៉ាងមុតមាំ រាល់ពេលពិធីចូលឆ្នាំឬក៏ពិធីធំៗម្តងៗ គាត់តែងតែបំពេញកុសលនិងជួយកិច្ចការវត្ត មិនថាយប់ឬថ្ងៃ ជាពិសេសអ្នកស័គ្រចិត្តគឺថាគាត់មានការយល់ដឹងពីសាសនាផង ជួយជ្រោមជ្រែងលើកស្ទួយអរិយធម៌ជាតិផង គឺថាទោះបីគាត់មានការរវល់ក្នុងកិច្ច ការងារចញ្ចឹមជីវិតប្រចាំថ្ងៃយ៉ាងណាក៏ដោយក៏គាត់នៅតែឆ្លៀត។ជួនកាលអាចធ្វើដល់ យប់អាធ្រាតក៏មានដែរដើម្បីជួយកិច្ចការវត្តឲ្យចប់ ហើយបានជោគជ័យជាស្ថាពរ។ ហើយជាពិសេសពិធីបុណ្យយើងក្នុងរយៈពេលបីថ្ងៃនេះ ភាគច្រើនគាត់យកថ្ងៃឈប់ គឺថាត្រៀមខ្លួនចាំបំរើកិច្ចការវត្ត និងបំរើសង្គមយើងឲ្យបានល្អបំផុត»។
អ្នកស្រី សឿ សុខខុម ពុទ្ធបរិស័ទមកពី ទីក្រុងម៉ុងរ៉េអាល់ ប្រទេសកាណាដា បានថ្លែង ពីភាពរីករាយ ដែលបានមកចូលរួមក្នុងព្រះពុទ្ធសាសនាដ៏ធំទូលំទូលាយ ហើយមាន កម្មវិធីជាអធិកអធមសម្រាប់ព្រះពុទ្ធសាសនា ក្នុងពិធីបុណ្យធំៗទាំងបីរួមទាំងវិសាខ បូជា និងសូត្រព្រះត្រៃបិដក។
«ច៎ា អរគុណណាស់គឺថាពួកនាងខ្ញុំមកនេះសំដៅថាសុំសន្សំកុសល អំពើល្អ (នៅក្នុង )ព្រះពុទ្ធសាសនា ហើយនឹងបានត្រឡប់ទៅវិញគឺអំពើល្អ ដើម្បីយកទៅផ្សព្វផ្សាយក្នុង ប្រទេសកម្ពុជាយើងផង និងដើម្បីឲ្យកូនខ្មែរនៅប្រទេសកម្ពុជា កុំឲ្យបំភ្លេចព្រះពុទ្ធ សាសនាយើង ដើម្បីឲ្យកូនខ្មែរយើងចេះគោរពព្រះពុទ្ធសាសនាជារៀងរហូតទៅ»។
អ្នកស្រី បានទទូចដល់ពលរដ្ឋខ្មែរជំនាន់ក្រោយទាំងក្នុងនិងក្រៅប្រទេសឲ្យប្រណិប័តន៍ ព្រះពុទ្ធសាសនាខ្មែរ ថែរក្សាពុទ្ធសាសនាខ្មែរ និងផ្តោតលើការប្រៀនប្រដៅរបស់ព្រះពុទ្ធសាសនាគឺអំពើល្អ។
ថ្លែងប្រាប់ VOA នៅក្នុងវត្តមុនីសូតារាម រដ្ឋមីនីសូតា អ្នកស្រី ព្រីស៊្សីឡា សារុំសាងជាពុទ្ធសាសនិកជនមកពីទីក្រុង ស៊ីអាថុល រដ្ឋ វ៉ាស៊ីនតោនស្តេត បានធ្វើដំណើរមកចូលរួមក្នុងពិធីបុណ្យធំៗ ដូចជាពិធីបុណ្យវិសាខបូជា និងពិធីបុណ្យសូត្រព្រះត្រៃបិដក ដែលអ្នកស្រី អះអាងថាតាំងពីបានចាកចេញពីប្រទេសកំណើតជាជនភៀសខ្លួនមករស់នៅសហរដ្ឋអាមេរិកតាំងពីតូចៗ។ អ្នកស្រី មិនធ្លាប់បានចូលរួមពិធីបុណ្យធំៗបែបនេះ។
«ច៎ា! មកពីខ្ញុំអត់ដែលបានធ្វើបុណ្យវិសាខបូជាធំអីចឹងទេ ដល់ពេលខ្ញុំឮថានៅវត្ត មុនីសុតារាមហ្នឹងធ្វើបុណ្យវិសាខបូជា ដូចខ្ញុំមានសេចក្តីរីករាយនឹងបន្តដើម្បីចង់ដឹងអំពីទំនៀមទម្លាប់ខ្មែរយើងព្រោះថាយើងចេញពីស្រុកខ្មែរនៅតូច អត់សូវដឹងអំពីរឿង វប្បធម៌និងព្រះពុទ្ធសាសនា ម្ល៉ោះហើយខ្ញុំចង់បន្តរៀនសូត្រ ដើម្បីរៀនធ្វើបុណ្យបន្ត កេរដំណែលពីជីដូនជីតាយើង»។
ក្រៅពីពិធីបុណ្យនេះ ព្រះសង្ឃ និង ពុទ្ធបរិស័ទក៏បានចូលរួមសូត្រព្រះត្រៃបិដក ដែលនេះជាគំនិតផ្តួចផ្តើមឲ្យមានការធ្វើការសូត្រនេះជាទៀតទាត់នៅក្នុងពេលបុណ្យធំៗ ដើម្បីឲ្យមានការយល់ដឹងជ្រៅជ្រះផ្នែកធម៌ វិន័យ អច្ឆរិយភាពរបស់ព្រះពុទ្ធ។
ព្រះតេជគុណ សែម ចន្ទធីរ៍ អគ្គលេខាធិការនៃពុទ្ធិកសមាគមព្រះសង្ឃខ្មែរ សហរដ្ឋ អាមេរិក ដែលទើបបង្កើតជាផ្លូវការ បានបញ្ជាក់អំពីការរៀបចំការសូត្រគម្ពីរព្រះត្រៃ បិដក ជាសង្ខេប ចេញពីព្រះវិន័យ ព្រះសូត្រ និងព្រះអភិធម្ម។ ព្រះតេជគុណមានថេរដីកាថា៖
«ព្រះវិន័យយើងយក១៥ទំព័រ ទាំងបាលី ទាំងសម្រាយ ពីវិន័យបិដកលេខ១ និយាយអំពីពុទ្ធគុណ គុណរបស់ព្រះពុទ្ធជាម្ចាស់ ហើយនឹងហេតុអីបានជាព្រះពុទ្ធលោក បញ្ញត្តិវិន័យ។នេះគឺជាចំណុចទី១ ហើយ វាមានសារៈសំខាន់ណាស់ដើម្បីរក្សានូវច្បាប់ ទម្លាប់ដល់ពុទ្ធសាសនិកនិងសកលលោកទូទៅ។ ហើយ ព្រះសូត្រ យើងយកព្រះ សូត្រ ទី១ ដែរ នៅក្នុងគម្ពីរទីឃនិកាយ និយាយអំពីទស្សនៈឬក៏សាសនាទាំង៦២ នៅក្នុងប្រទេសឥណ្ឌាសម័យនោះ ហើយនឹងនិយាយពីចំណុចសីល សីលតូច សីលធំ និងសីលកណ្តាល នេះក្នុងព្រះសូត្រទី១។ អភិធម្ម យើងនិយាយពីមាតិកាទាំងអស់ មាន១៦៤ មាតិកា គឺយើងយកមកសូត្រសិន មិនទាន់មានសេចក្តីអត្ថាធិប្បាយទេ»។
ព្រះតេជគុណ បានបន្តថាការរៀនសូត្រព្រះត្រៃបិដក មានផលប្រយោជន៍ដល់ ព្រះសង្ឃ ពុទ្ធបរិស័ទយ៉ាងខ្លាំងចំពោះធម៌វិន័យរបស់ព្រះពុទ្ធ។
«ប្រសិនបើពុទ្ធបរិស័ទ បានសិក្សាដោយយកចិត្តទុកដាក់ ពុទ្ធបរិស័ទ នឹងយល់ជ្រាប អំពី ទី១ គុណរបស់ព្រះពុទ្ធ ទី២ តម្លៃនៃការសិក្សាព្រះត្រៃបីដក សិក្សាព្រះវិន័យរបស់ព្រះពុទ្ធជាម្ចាស់ ហើយមួយទៀតនោះ យើងយល់អំពីទិដ្ឋិខុសនិងទិដ្ឋិត្រូវ គឺសំខាន់ណាស់ការយល់ឃើញ យល់ខុសនិងយល់ត្រូវ គឺជារឿងសំខាន់។ បើយើង សិក្សាដោយយកចិត្តទុកដាក់ យើងយល់ច្បាស់កន្លែងហ្នឹង យកទៅប្រណិប័តន៍ ធ្វើអ្វីៗ មានការគិតរំពឹងទុកមុន ទើបយើងសម្រេចជាក្រោយ។នេះជាចំណុចសំខាន់»។
ពិធីបុណ្យបីក្នុងពេលតែមួយ និងកន្លែងតែមួយ នៅវត្តមុនីសូតារាម រដ្ឋមុនីសូតា ដើម្បី បង្កើតពុទ្ធិកសមាគមព្រះសង្ឃខ្មែរ នៅសហរដ្ឋអាមេរិក បុណ្យវិសាខបូជា ហើយនឹង បុណ្យសូត្រព្រះត្រៃបិដក ចាប់ពីថ្ងៃទី ២៤ ដល់ ថ្ងៃទី២៨ ខែឧសភា ឆ្នាំ២០១៩ នេះ ត្រូវព្រះសង្ឃនិងពុទ្ធបរិស័ទជាច្រើនចាត់ទុកថាជាលើកទី១ ក្នុងប្រវត្តិសាស្ត្រពលរដ្ឋ ខ្មែរ នៅប្រទេសអាមេរិក ដែលមានពិធីបុណ្យព្រះពុទ្ធសាសនាធំៗ ដើម្បីប្រារព្ធរួមគ្នា ក្នុងគោលបំណងជាច្រើនរួមទាំង ថែរក្សាប្រពៃណី ទំនៀមទម្លាប់ សាសនា បន្តទៅ កូនចៅជំនាន់ក្រោយ៕
