ប្រទេសវៀតណាមបានបើកការត្រួតពិនិត្យទៅលើគេហទំព័ររបស់ភ្នាក់ងាររៀបចំដំណើរកំសាន្តរបស់ក្រុមតន្ត្រី Blackpink នៃប្រទេសកូរ៉េខាងត្បូង នៅមុនការប្រគុំតន្ត្រីរបស់ក្រុមនេះនៅក្នុងរដ្ឋធានីហាណូយរបស់វៀតណាម ដោយសារអ្នកគាំទ្របានរិះគន់ចំពោះផែនទីដែលបង្ហាញព្រំដែនមានជម្លោះនៅសមុទ្រចិនខាងត្បូង។
ភាពចម្រូងចម្រាសនេះកើតមានឡើងក្រោយពីវៀតណាមថ្មីៗនេះ បានសម្រេចហាមការបញ្ចាំងភាពយន្តឈ្មោះ "Barbie" ដែលគេទន្ទឹងរង់ចាំខ្លាំងរបស់ក្រុមហ៊ុនអាមេរិ កាំង Warner Bros' ដោយសារភាពយន្តនេះត្រូវគេចោទថា មានឈុតដែលបង្ហាញ«ខ្សែបន្ទាត់៩ចំណុច» ឬ «Nine-Dash Line» ដែលចិនប្រើក្នុងផែនទីរបស់ខ្លួន ដើម្បីអះ អាងទាមទារអធិបតេយ្យភាពលើតំបន់ដ៏ធំធេងនៃសមុទ្រចិនខាងត្បូង ដែលក្នុងនោះក៏មានដែនទឹកនិងកោះដែលវៀតណាមអះអាងថាស្ថិតនៅក្នុងខ្ពង់រាបបាតសមុទ្ររបស់ខ្លួន។
ក្រសួងវប្បធម៌វៀតណាមបាននិយាយកាលពីយប់ថ្ងៃពុធថា ខ្លួនបានបញ្ជាឱ្យមានការត្រួតពិនិត្យគេហទំព័រទីភ្នាក់ងារ iME ដើម្បី «បញ្ជាក់ពីការសង្ស័យថា ក្រុមហ៊ុនរៀបចំការប្រគុំតន្ត្រីពេលរាត្រីរបស់ក្រុម Blackpink បានលើកតម្កើងបន្ទាត់អណ្តាតគោ» ដោយក្រសួងនេះបានប្រើពាក្យរបស់វៀតណាមសម្រាប់ពណ៌នាខ្សែបន្ទាត់ទម្រង់អក្សរ U នេះ។ ក្រសួងវប្បធម៌វៀតណាមមិនបានឆ្លើយតបភ្លាមៗចំពោះសំណួរអំពីថាតើ នឹងអាចមានលទ្ធផលអ្វីពីការត្រួតពិនិត្យនេះ។ ហើយគេក៏មិនដឹងថាតើលទ្ធផលនេះនឹងត្រូវប្រកាសនៅពេលណាដែរ។
កាលពីយប់ថ្ងៃព្រហស្បតិ៍ នាយកប្រតិបត្តិរបស់ក្រុមហ៊ុន iME បានចេញសេចក្តីថ្លែង ការណ៍មួយថាឧប្បទ្ទវហេតុនេះជា«ការយល់ច្រឡំដ៏គួរឱ្យសោកស្តាយមួយ»។
លោក Chow បាននិយាយក្នុងសេចក្តីថ្លែងការណ៍នោះថា៖ «ក្រុមហ៊ុន iME បានពិនិត្យសើរើភ្លាមៗនិងប្តេជ្ញាដកចេញរូបភាពណាដែលមិនសមស្របចំពោះវៀតណាម» ដោយលោកបន្ថែមថាក្រុមហ៊ុន iME បានដឹងពីការគោរពចំពោះអធិបតេយ្យភាពនិងវប្បធម៌របស់ប្រទេសទាំងអស់ដែលក្រុមហ៊ុននេះមានវត្តមាន។
គេនៅអាចចូលមើលគេហទំព័រ iME នៅឡើយនៅក្រោយការចេញសេចក្តីថ្លែងការណ៍នេះ ប៉ុន្តែទម្រង់មុនមួយនៃគេហទំព័រនេះដែលត្រូវបានធ្វើបច្ចុប្បន្នភាពកាលពីថ្ងៃទី៤ ខែកក្កដា ហើយដែលទីភ្នាក់ងារសារព័ត៌មាន Reuters បានឃើញ បានបង្ហាញ «ខ្សែបន្ទាត់៩ចំណុច» មិនច្បាស់ ដែលបន្ទាត់នេះហ៊ុំព័ទ្ធសមុទ្រចិនភាគខាងត្បូងស្ទើរទាំងស្រុង។
ប្រទេសវៀតណាមនិងប្រទេសចិន មានប្រវត្តិជាយូរមករឿងទាមទារដែនទឹកត្រួតស៊ីគ្នា នៅសមុទ្រចិនខាងត្បូង ជាពិសេសក្នុងតំបន់ខ្លះដែលអាចមានធនធានប្រេងច្រើន។ ប្រទេសនៅតំបន់អាស៊ីអាគ្នេយ៍មួយនេះតែងបានចោទនានាចិនថាបានរំលោភលើដែនអធិបតេយ្យភាពរបស់ខ្លួន។
ក្រុមហ៊ុន Blackpink ដែលតំណាងឱ្យវិស័យកម្សាន្តរាប់ពាន់លានដុល្លាររបស់កូរ៉េខាងត្បូង ជាក្រុមហ៊ុនចុងក្រោយបំផុតដែលជួបនឹងរឿងបញ្ហាក្នុងប្រទេសវៀតណាម ដោយសារការបង្ហាញផែនទី «ខ្សែបន្ទាត់៩ចំណុច» ដ៏ចម្រូងចម្រាសរបស់ចិន។ តុលាការអាជ្ញាកណ្តាលមួយនៅក្រុងឡាអេកាលពីឆ្នាំ២០១៦ បានសម្រេចបដិសេធខ្សែបន្ទាត់នេះ ប៉ុន្តែចិនមិនបានទទួលស្គាល់សេចក្តីសម្រេចរបស់តុលាការនេះទេ។
ចំណាត់ការរបស់ក្រសួងវប្បធម៌វៀតណាមកើតមានឡើងក្រោយពីមានការតវ៉ាពីអ្នកប្រើប្រាស់អ៊ីនធឺណិតវៀតណាមដែលបានកត់សម្គាល់ឃើញ«ខ្សែបន្ទាត់៩ចំណុច»នេះនៅលើគេហទំព័រអ្នករៀបចំកាលប្រគុំតន្រ្តី Blankpink៕
ប្រែសម្រួលដោយ សឹង សុផាត
