នាយករដ្ឋមន្ត្រីវៀតណាម ដែលគាំទ្រវិស័យជំនួញ បានវិលត្រឡប់មកវិញនៅនាទីចុងក្រោយ បន្ទាប់ពីលោក ហាក់បីដូចជាបានចាញ់ក្នុងការប្រជែងអំណាចនៅក្នុងបក្សកុម្មុយនិស្ត ដែលកំពុងគ្រប់គ្រងប្រទេស កាលពីសប្តាហ៍មុននោះ។
លោកនាយករដ្ឋមន្ត្រី ង្វៀន តាន់ស៊ុង (Nguyen Tan Dung) នឹងដឹងនៅថ្ងៃច័ន្ទនេះ ថាតើលោកនឹងអាចចូលប្រឡូកក្នុងការប្រកួតប្រជែងដើម្បីតំណែងកំពូលរបស់ប្រទេសនោះម្តងទៀតបានដែរឬអត់។
ដោយប្រើចន្លោះប្រហោងមួយដែលមាននៅក្នុងបទប្បញ្ញត្តិបក្ស អ្នកគាំទ្រលោក នាយករដ្ឋមន្ត្រី ង្វៀន តាន់ស៊ុង កាលពីថ្ងៃអាទិត្យ បានស្នើឲ្យបញ្ចូលឈ្មោះរបស់លោក ទៅក្នុងបញ្ជីឈ្មោះបេក្ខជន ដែលប្រកួតប្រជែងសម្រាប់មុខតំណែងជាសមាជិកនៃគណៈកម្មាធិការមជ្ឈិមបក្ស ដែលជាសសរមួយក្នុងចំណោមសសរស្ដម្ភពីរនៃស្ថាប័នគ្រប់គ្រងប្រទេសវៀតណាម។
បើសិនជា លោក ស៊ុង អាចឆ្លងផុត លោកនឹងមានឱកាសដ៏ល្អមួយ ក្នុងការដែលត្រូវគេបោះឆ្នោត ឲ្យក្លាយជាសមាជិកនៃគណៈកម្មាធិការមជ្ឈិមបក្សនោះ ហើយបន្ទាប់ពីនោះ លោក នឹងមានកន្លែងមួយ ដើម្បីប្រកួតជាមួយគូប្រជែងរបស់លោក គឺលោក អគ្គលេខាធិការបក្ស ង្វៀន ភូចុង (Nguyen Phu Trong) ដើម្បីតំណែងជាអគ្គលេខាធិការបក្សកុម្មុយនិស្តនេះ។
អគ្គលេខាធិការបក្ស តាមពិតទៅ គឺជាមេដឹកនាំទី១នៅក្នុងថ្នាក់ដឹកនាំបែបសមូហភាពដែលគ្រប់គ្រងប្រទេសវៀតណាម។
លោក Murray Hiebert អ្នកជំនាញខាងតំបន់អាស៊ីអាគ្នេយ៍ នៅឯមជ្ឈមណ្ឌលសម្រាប់ការសិក្សាយុទ្ធសាស្ត្រនិងបញ្ហាអន្តរជាតិ (Center for Strategic and Internatioanl Studies) ក្នុងរដ្ឋធានី វ៉ាស៊ីនតោន មានប្រសាសន៍ថា «លោក ស៊ុង គឺជាមនុស្សដែលហ៊ានធ្វើអ្វីមួយខុសពីសមាជិកជាច្រើនទៀតនៅក្នុងក្រុម ហើយលោកជាមនុស្សដែលមានជំនាញនិងមានការប្ដេជ្ញាចិត្តមោះមុត។ មនុស្សជាច្រើន យល់ស្របថា ឱកាស នៅមានតិចតួចណាស់សម្រាប់ឲ្យលោក អាចវិលត្រឡប់មកកាន់តំណែងនេះវិញ»។
លោក ចុង បានព្យាយាមអស់ជាច្រើនឆ្នាំមកហើយ ដើម្បីធ្វើឲ្យលោក ស៊ុង ថយឥទ្ធិពល ប៉ុន្តែការព្យាយាមនេះ មិនទទួលបានជោគជ័យទេ។
ទោះបីជាគេមិនដែលឮអំពីការប្រជែង ដើម្បីមុខតំណែងកំពូលនេះក៏ដោយ ក៏ការប្រជែងគ្នានេះ ជាធម្មតាត្រូវបានកំណត់អ្នកចាញ់ អ្នកឈ្នះរួចជាស្រេច មុនសមាជបក្ស ដែលគេរៀបចំឡើងរៀងរាល់៥ឆ្នាំម្តង។
នៅឆ្នាំនេះ ការប្រជែងគ្នារវាងលោក ស៊ុង និង លោក ចុង បានធ្លាយទៅដល់សមាជបក្ស ដែលបានចាប់ផ្តើមកាលពីថ្ងៃព្រហស្បតិ៍សប្តាហ៍មុន ហើយនឹងបញ្ចប់នៅថ្ងៃព្រហស្បតិ៍សប្តាហ៍នេះ។
ប៉ុន្តែ យោងតាមអ្នកវិភាគ មិនថានរណាឈ្នះនោះទេ ការបង្កើតរដ្ឋាភិបាលនិងគោលនយោបាយរបស់ខ្លួននឹងមិនផ្លាស់ប្តូរធំដុំនោះទេ។
លោក ស៊ុង បានកសាងកេរ្តិ៍ឈ្មោះរបស់លោក ដោយសារការលើកកម្ពស់កំណែទម្រង់សេដ្ឋកិច្ច និងប្រឈមយ៉ាងម៉ឺងម៉ាត់ជាមួយប្រទេសចិន ដែលទាមទារយ៉ាងកម្រោលនូវដែនសមុទ្រចិនខាងត្បូង។
ប៉ុន្តែ ទោះបីជាលោក ចុង ដែលជាមេដឹកនាំបែបការិយាធិបតេយ្យបក្ស ដែលទន់ទោរទៅរកចិនជាង អាចធ្វើឲ្យលោក ស៊ុង នៅក្រៅរង្វង់គណៈកម្មាធិការមជ្ឈិមបក្សក៏ដោយ ក៏នោះ មិនមែនមានន័យថា ការកែទម្រង់សេដ្ឋកិច្ចវៀតណាមនៅទ្រឹងនោះទេ ឬក៏វៀតណាម នឹងចុះចាញ់ការទាមទារដែនសមុទ្ររបស់ចិន ក្នុងដែនទឹកវៀតណាមនោះ ក៏ទេដែរ។ នេះបើយោងតាមអ្នកឃ្លាំមើលការវិវត្តន៍នៅប្រទេសវៀតណាម។
លោក Murray Hiebert បានថ្លែងប្រាប់ទីភ្នាក់ងារសារព័ត៌មាន The Associated Pressថា «ជាលក្ខណៈមនោគមវិជ្ជា មិនមានគម្លាតធំរវាងលោក ចុង និងលោក ស៊ុងទេ ទោះបីជាមនុស្សជាច្រើនជឿថា ល្បឿននៃការកែទម្រង់សេដ្ឋកិច្ច អាចយឺតបន្តិចក៏ដោយ ប្រសិនបើ លោក ចុង នៅតែកាន់តំណែងអគ្គលេខាធិការបក្សនោះហើយលោកស៊ុងត្រូវគេផាត់ចេញនោះ»។
សម្រាប់ពេលនេះ មាគ៌ាឆ្ពោះទៅកាន់តំណែងកំពូល ត្រូវបានក្រាលដោយឧបសគ្គជាច្រើន សម្រាប់លោក ស៊ុង។ លោក ប្រឈមមុខនឹងឧបសគ្គដំបូងគេនៅថ្ងៃច័ន្ទនេះ នៅលើវេទិកានៃសមាជបក្សកុម្មុយនិស្ត ដែលត្រូវបានចូលរួមដោយប្រតិភូចំនួន ១.៥១០នាក់ នៅក្នុងសាល ដែលបិទទ្វារជិត។
គណៈប្រតិភូនៃការប្រជុំសមាជរបស់គណបក្សកុម្មុយនិស្តវៀតណាមនឹងជ្រើសរើសបេក្ខជនចំនួន២៣៤នាក់ សម្រាប់ការបោះឆ្នោតជ្រើសតាំងសមាជិកគណៈកម្មការមជ្ឈិមដែលមានចំនួន១៨០នាក់។ ក្នុងចំណោមបេក្ខជនទាំងអស់នេះ បេក្ខជនចំនួន១៩៩នាក់ដែលត្រូវបានគណៈកម្មាធិការពីមុនគាំទ្រ ត្រូវបានធានាថា នឹងជ្រើសតាំងជាសមាជិកនៃគណៈកម្មាធិការមជ្ឈិមនេះ។ រីឯបេក្ខជនចំនួន៣៥នាក់ផ្សេងទៀត នឹងត្រូវបានជ្រើសរើសពីក្នុងចំណោមអ្នកនយោបាយចំនួន៦២នាក់ដែលគណៈប្រតិភូបានស្នើឡើងនោះ ក្នុងនោះរួមមានឈ្មោះលោក Nguyen Tan Dung ផងដែរ។
បើសិនជាលោក Nguyen Tan Dung ត្រូវបានជ្រើសតាំងជាបេក្ខជនក្តីក៏លោកនៅតែចាំបាច់ត្រូវទទួលការគាំទ្រពីគណៈប្រតិភូនៃការប្រជុំសមាជនេះ ដើម្បីក្លាយជាសមាជិកម្នាក់ក្នុងចំណោម១៨០នាក់ តាមរយៈការបោះឆ្នោតនៅថ្ងៃអង្គារនេះ។ បន្ទាប់ពីនេះ គណៈប្រតិភូនឹងជ្រើសតាំងសមាជិកការិយាល័យនយោបាយចំនួន១៦នាក់ ដែលពួកគេត្រូវបំពេញការងារគ្រប់គ្រងប្រចាំថ្ងៃរបស់ប្រទេសវៀតណាម។ គេរំពឹងថា ការិយាល័យនយោបាយអាចនឹងពង្រីកសមាជិករបស់ខ្លួនរហូតដល់ទៅ១៨នាក់សម្រាប់ឆ្នាំនេះ។
ក្នុងចំណោមសមាជិកនៃការិយាល័យនយោបាយទាំងអស់ សមាជិកម្នាក់នឹងត្រូវបានជ្រើសតាំងជាអគ្គលេខាធិការបក្ស ដែលជាមេដឹកនាំជាន់ខ្ពស់របស់ប្រទេសវៀតណាម។ ហើយសមាជិកបីនាក់ផ្សេងទៀតនឹងត្រូវបានជ្រើសតាំងតាមឋានៈសម្រាប់មុខតំណែងជា នាយករដ្ឋមន្ត្រី ប្រធានាធិបតី និងប្រធានរដ្ឋសភា។
លោក Nguyen Tan Dung ដែលបានឡើងឋានៈជាបន្តបន្ទាប់តាមរយៈបក្សហើយដែលបានកាន់មុខតំណែងខ្ពស់នោះ បានធ្វើជានាយករដ្ឋមន្ត្រីវៀតណាមក្នុងរយៈពេលពីរអណត្តិ។ នេះមានន័យថា លោកមិនអាចធ្វើជានាយករដ្ឋមន្ត្រីក្នុងអណត្តិទី៣បានឡើយ។ ដូច្នេះ មុខតំណែងដែលលោកអាចនឹងទទួលបានតែមួយគត់នោះ គឺតំណែងជាអគ្គលេខាធិការបក្ស។
កំណែទម្រង់សេដ្ឋកិច្ចរបស់លោកបានជួយឲ្យប្រទេសវៀតណាមទាក់ទាញការវិនិយោគទុនពីបរទេសដ៏ច្រើន ហើយជួយឲ្យចំនួនផលិតផលសរុបក្នុងស្រុករបស់វៀតណាមមានចំនួន២.១០០ដុល្លារអាមេរិក ក្នុងអំឡុងពេលជាង១០ឆ្នាំកន្លងទៅនេះ។
ក្រុមអ្នកគាំទ្ររបស់លោក Nguyen Phu Trong បានចោទប្រកាន់លោក Nguyen Tan Dung ពីការគ្រប់គ្រងសេដ្ឋកិច្ចមិនបានល្អ ដែលត្រូវបានចាត់ទុកជាឧទាហរណ៍ដ៏សំខាន់មួយនៃការដួលរលំរបស់ក្រុមហ៊ុនដឹកជញ្ជូន Vinashin របស់រដ្ឋាភិបាលវៀតណាម និងពីការបរាជ័យក្នុងការគ្រប់គ្រងបំណុលដ៏ធំរបស់ពលរដ្ឋ បណ្តែតបណ្តោយឱ្យមានអំពើពុករលួយ និងការបរាជ័យក្នុងការដោះស្រាយបញ្ហាកម្ចីមិនដំណើរការពីធនាគាររបស់រដ្ឋ។
ប្រទេសវៀតណាមគឺជាប្រទេសមួយដែលកាន់របបកុម្មុយនិស្តនៅក្នុងពិភពលោក ដែលមានសមាជិកបក្សសរុបចំនួន៤លាន៥សែននាក់។ ប៉ុន្តែ ដូចគ្នានឹងសម្ព័ន្ធមិត្តចិនរបស់ខ្លួន វៀតណាមជឿលើសេដ្ឋកិច្ចទីផ្សារសេរី និងការគ្រប់គ្រងប្រទេសបែបតឹងរ៉ឹង ដែលបានអនុវត្តប្បញ្ញត្តិហាមឃាត់ជាច្រើនលើប្រជាជនប្រមាណ៩៣លាននាក់៕
ប្រែសម្រួលដោយនាង ទែន សុខស្រីនិត និង លោកសាយ មុន្នី
