អគ្គលេខាធិការអ.ស.ប.លោក Antonio Guterres បានថ្លែងប្រាប់ក្រុមប្រឹក្សាសន្តិសុខ អ.ស.ប. កាលពីថ្ងៃសុក្រថា ក្នុងរយៈពេលពីរខែនៃសង្គ្រាមរបស់អ៊ីស្រាអែលជាមួយពួកហាម៉ាស់ «យើងកំពុងស្ថិតក្នុងស្ថានភាពមិនអាចទ្រាំទ្របាន» ហើយលោកបានសុំដល់សមាជិកក្រុមប្រឹក្សានេះជំរុញឱ្យមានការឈប់បាញ់គ្នាខាងមនុស្សធម៌ជាបន្ទាន់ ប៉ុន្តែសហរដ្ឋអាមេរិកបានបោះឆ្នោតវ៉េតូដើម្បីរារាំងក្រុមប្រឹក្សាសន្តិសុខមិនឱ្យទាមទារឱ្យមានការឈប់បាញ់គ្នា។
លោក Guterres បានមានប្រសាសន៍ថា៖ «ប្រជារាស្ត្រនៅហ្កាហ្សាធ្លាក់ដល់បាត។ សហគមន៍អន្តរជាតិត្រូវធ្វើអ្វីទាំងអស់ដែលអាចធ្វើបានដើម្បីបញ្ចប់ស្ថានភាពសែនពិបាករបស់ពួកគេ»។
សង្គ្រាមនេះបានកើតឡើងដោយការវាយប្រហាររបស់ក្រុមហាម៉ាស់ កាលពីថ្ងៃទី៧ ខែតុលា ក្នុងអ៊ីស្រាអែលបណ្តាលឱ្យមនុស្ស ១ពាន់ ២រយនាក់ស្លាប់។ ជនជាតិប៉ាឡេស្ទីនរស់ក្នុងតំបន់ហ្កាហ្សាគ្រប់គ្រងដោយពួកហាម៉ាស់រស់នៅក្នុងស្ថានភាពលំបាកធ្ងន់ធ្ងរខ្លាំងឡើងៗ។ ក្រសួងសុខាភិបាលហ្កាហ្សាថា មនុស្សជាង ១ម៉ឺន ៧ពាន់ ភាគច្រើនជាស្ត្រីនិងកុមារ ត្រូវបានសម្លាប់។ មនុស្សរាប់ពាន់នាក់ទៀតរងរបួសឬបាត់ខ្លួនក្រោមកម្ទិចអគារបែកបាក់។
ក្រុមប្រឹក្សាសន្តិសុខ អ.ស.ប. មានប្រទេស ១៥ ជាសមាជិកបានប្រជុំគ្នាកាលពីព្រឹកថ្ងៃសុក្រ ក្រោយលោក Guterres បានផ្ញើសារទៅពួកគេកាលពីថ្ងៃពុធ ដោយយកមាត្រា ៩៩ នៃធម្មនុញ្ញអ.ស.ប. មកប្រើដែលផ្តល់អំណាចជូនលោកឱ្យនាំទៅកាន់ក្រុមប្រឹក្សានូវបញ្ហាណា ដែលលោកមានជំនឿថាអាចគំរាមកំហែងដល់សន្តិភាពនិងសន្តិសុខអន្តរជាតិ។
នេះជាលើកដំបូងហើយដែលលោក Guterres យកមាត្រានេះមកប្រើក្នុងរយៈពេលលោកកាន់តំណែងនេះជិត ៧ឆ្នាំ ដែលមានវិបត្តិជាច្រើន។ កាលពីពេលចុងក្រោយមាត្រានេះត្រូវលើកយកមកប្រើនៅឆ្នាំ ១៩៧១ នៅពេលមានការប្រយុទ្ធគ្នាដែលនាំឱ្យមានការបង្កើតប្រទេសបង់ក្លាដេសនិងការបែកចេញរបស់ប្រទេសនេះពីប៉ាគីស្ថាន។
ទោះជាក្រុមប្រឹក្សាសន្តិសុខបានពិភាក្សាគ្នាអំពីសង្គ្រាមនៅហ្កាហ្សាក៏ដោយ ក៏ការខ្វែងគំនិតផ្ទៃក្នុងបានបញ្ចៀសមិនឱ្យក្រុមប្រឹក្សានេះធ្វើសកម្មភាពសំខាន់ណាមួយបានទេ។ ការណ៍ដែលលោក Guterres លើកយកមាត្រា ៩៩ មកប្រើ ជាវិធីសម្រាប់ឱ្យលោកជំរុញឱ្យមានសកម្មភាពជាបន្ទាន់។
ប្រេសិតរបស់អ៊ីស្រាអែលប្រចាំ អ.ស.ប.បានសាកសួរថា នៅពេលមានសង្គ្រាមជាច្រើនក្នុងពិភពលោក មានរួមសង្គ្រាមនៅអ៊ុយក្រែន យេម៉ែននិងស៊ីរី ដែលនៅទីនោះមានការប្រើអាវុធគីមី ហេតុដូចម្តេចបានជាមាត្រា ៩៩ មិនត្រូវបានលើកយកមកប្រើរហូតដល់ពេលនេះ។
កាលពីថ្ងៃសុក្រ សហរដ្ឋអាមេរិកបានបោះឆ្នោតវ៉េតូដើម្បីរាំងខ្ទប់វិធានការនេះ។ ចក្រភពអង់គ្លេសបោះឆ្នោតអនុប្បវាទ។ សមាជិក ១៣ ទៀតនៃក្រុមប្រឹក្សាសន្តិសុខបានគាំទ្រអត្ថបទនេះ តែក្រុមប្រឹក្សានេះបរាជ័យក្នុងការសម្រចឱ្យមានការឈប់បាញ់គ្នានៅហ្កាហ្សាជាបន្ទាន់នោះ ដោយសារការបោះឆ្នោតវ៉េតូដោយអាមេរិក។
ពួកហាម៉ាស់បានថ្កោលទោសការបោះឆ្នោតវ៉េតូរបស់សហរដ្ឋអាមេរិកប្រឆាំងនឹងសេចក្តីព្រាងសេចក្តីសម្រេចចិត្តនេះ ដោយបានពណ៌នាសកម្មភាពរបស់អាមេរិកនេះថាគ្មានសីលធម៌និងអមនុស្សធម៌៕
ប្រែសម្រួលដោយលោក ឈឹម សុមេធ
