ឯកអគ្គរដ្ឋទូតសហរដ្ឋអាមេរិកប្រចាំប្រទេសឥណ្ឌាបាននិយាយកាលពីថ្ងៃព្រហស្បតិ៍ថា រហូតមកដល់ពេលនេះ អាមេរិកពេញចិត្តនឹងចំណាត់ការរបស់ឥណ្ឌាក្នុងការធ្វើឱ្យប្រាកដប្រជាអំពីភាពទទួលខុសត្រូវខ្ពស់ក្នុងផែនការធ្វើឃាតពួកសកម្មជន Sikh តែត្រូវមានវិធានការថែមទៀត ដោយលោកហៅការធ្វើឃាតនេះថាជា«បន្ទាត់ក្រហមមួយសម្រាប់អាមេរិក»ដែលត្រូវតែមានផលវិបាក។
លោក Eric Garcetti ត្រូវបានសួរនៅក្នុងការប្រជុំមួយនៃអង្គការស្រាវជ្រាវអាមេរិកាំងមួយអំពីផលប៉ះពាល់នៃការរកឃើញកាលពីពេលថ្មីៗនេះអំពីការលបធ្វើឃាតពួកជាតិនិយម Sikh នៅកាណាដានិងសហរដ្ឋអាមេរិកទៅលើទំនាក់ទំនងរបស់រដ្ឋាភិបាលក្រុងវ៉ាស៊ីនតោនជាមួយរដ្ឋាភិបាលក្រុងញូវដែលី។
លោកបាននិយាយប្រាប់ក្រុមប្រឹក្សាទំនាក់ទំនងការបរទេស (Council on Foreign Relations) ថា«នៅពេលខ្ញុំនិយាយយោងដល់ទំនាក់ទំនងមានការរអាក់រអួល រឿង(ការធ្វើឃាតនេះ)នេះអាចជាជម្លោះធំទីមួយក្នុងទំនាក់ទំនងមួយ»។
លោក Garcetti បានថ្លែងថា មានការចាប់ផ្តើមរឿងក្តីព្រហ្មទណ្ឌមួយនិងការចោទប្រកាន់ហើយ«បើមានការទាក់ទិននឹងតួអង្គរដ្ឋក្នុងករណីនេះ ត្រូវតែមានការទទួលខុសត្រូវខ្ពស់»។
លោកថា«យើងរំពឹងថាមិនមែនតែពីភាគីយើងទេ តែយើងរំពឹងថា ឥណ្ឌានឹងមានការទទួលខុសត្រូវខ្ពស់នេះដែរ»។
កាលពីខែវិច្ឆិកា អាជ្ញាធរអាមេរិកនិយាយថា មន្ត្រីរដ្ឋាភិបាលឥណ្ឌាម្នាក់បានបញ្ជាឱ្យមានការធ្វើឃាតលោក Gurpatwant Singh Pannun ដែលជាសកម្មជនចង់បំបែករដ្ឋ Sikhម្នាក់ដែលមានសញ្ជាតិពីរអាមេរិកនិងកាណាដា។
សេតវិមានកាលពីខែមេសា បានចាត់ទុករបាយការណ៍អំពីការជាប់ទាក់ទងរបស់មន្ត្រីចារកម្មឥណ្ឌានៅក្នុងផែនការធ្វើឃាតនេះ ថាជារឿងធ្ងន់ធ្ងរណាស់។
បញ្ហានេះជារឿងរសើបខ្លាំងសម្រាប់ទាំងឥណ្ឌា និងរដ្ឋាភិបាលសហរដ្ឋអាមេរិក ខណៈពួកគេព្យាយាមរឹតចំណងទាក់ទង ដើម្បីទប់ទល់នឹងការកើនអំណាចកាន់តែខ្លាំងរបស់ចិន៕
វេទិកាបញ្ចេញមតិ