ក្រុមអង្គការសិទ្ធិមនុស្សនាំមុខគេ បានប្រាប់សមាជិកសភាអាមេរិកថាការបង្កើតចំណងការទូតជាប្រវត្តិសាស្រ្តជាមួយប្រទេសអ៊ីរ៉ង់និងប្រទេសគុយបាមិនគួរការពារប្រទេសទាំង២មិនឲ្យមានការពិនិត្យពិច័យយ៉ាងហ្មត់ចត់របស់អាមេរិកលើកការរំលោភសិទ្ធិមនុស្សនៅក្នុងប្រទេសទាំងពីរនេះទេ។
នៅចំពោះមុខគណៈកម្មាធិការព្រឹទ្ធសភាទទួលបន្ទុកកិច្ចការបរទេស លោក Mark Lagon ជាប្រធាននៃអង្គការ Freedom House ដែលមានមូលដ្ឋាននៅទីក្រុងវ៉ាស៊ីនតោនបានថ្លែងថា៖ ក្នុងប្រទេសអ៊ីរ៉ង់និងគុយបា សរអាត្រូវប្រើប្រាស់អំណាចការទូតរបស់ខ្លួន ដើម្បីពិនិត្យមើលបញ្ហាសិទ្ធិមនុស្ស ហើយមិនត្រូវបែងចែកវិស័យការទូតរបស់ខ្លួន ដើម្បីពិនិត្យមើលតែលើសារៈសំខាន់បញ្ហាបរមាណូ ក្នុងករណីប្រទេសអ៊ីរ៉ង់ និង សារៈសំខាន់នៃចំណងការទូត ក្នុងករណីប្រទេសគុយបា។
លោកLagon បានបន្ថែមទៀតថា «ការសម្រេចចិត្តរបស់សហរដ្ឋអាមេរិកដើម្បីស្តារឡើងវិញនៅទំនាក់ទំនងការទូតជាមួយប្រទេសគុយបាយ៉ាងឆាប់រហ័សបន្ទាប់ពីមានសកម្មជនសន្តិភាព ១០០ នាក់ត្រូវបានចាប់ឃុំខ្លួនជាសារមិនល្អនិងច្របូកច្របល់»។
លោក Bob Corker សមាជិកព្រឹទ្ធសភាគណបក្សសាធារណរដ្ឋដែលជាប្រធានគណៈកម្មការនេះមិនបានលើកយករឿងបញ្ហាសិទិ្ធមនុស្សទាក់ទងនឹងប្រទេសអ៊ីរ៉ង់ឬប្រទេសគុយបា មកជជែកដេញដោលទេ ប៉ុន្តែបានទទួលស្គាល់បញ្ហានេះថាមានភាពទូលំទូលាយជាងនៅលើឆាកអន្តរជាតិ។
«បញ្ហាប្រឈមដ៍ធំបំផុតដែលយើងមាន ទាក់ទងទៅនិងបញ្ហាសិទ្ធិមនុស្សយើងមានផលប្រយោជន៍ជាមួយ រដ្ឋាភិបាលផ្សេងៗដែលពេលខ្លះធ្វើឲ្យទន់ខ្សោយដល់សមត្ថភាពរបស់យើងក្នុងការឃ្លាំមើលការរំលោភបំពានសិទ្ធិ »។
លោក Tomasz Malinowski ជាឧបការីរបស់រដ្ឋមន្ត្រីការបរទេសទទួលបន្ទុករឿងលទ្ធិប្រជាធិបតេយ្យនិងសិទ្ធិមនុស្សក៏បានធ្វើសក្ខីកម្មដែរ។
លោក Malinowski បានឆ្លើយតបទៅ លោក Corkerថា៖
«ខ្ញុំគិតថាវាជាការសំខាន់ដែលយើងត្រូវមានការស្មោះត្រង់ទាំងស្រុង។ ជាការពិតណាស់យើងមានផលប្រយោជន៍ផ្សេងទៀត។ ខ្ញុំច្រើនតែមិនទទួលស្គាល់ការយល់ឃើញថាការចង់លើកកម្ពស់សិទ្ធិមនុស្សរបស់យើងនិង ការការពារសន្តិសុខ និង ភាពរុងរឿងរបស់យើងដែលជាមូលដ្ឋានផលប្រយោជន៍ទាំងអស់ មានការប្រឆាំងគ្នានោះ»។
លោក បានបន្តថា៖
«ខ្ញុំគិតថាពេលខ្លះយើងប្រឈមមុខនឹងខាត់បង់រយៈពេលខ្លីដែលពេលខ្លះយើងត្រូវការធ្វើការជាមួយប្រទេសខ្លះឬអ្វីមួយដែលមានសារៈសំខាន់ចាំបាច់ដល់សន្តិសុខរបស់យើងឥឡូវនេះ។ ហើយជួនកាលវាអាចនាំយើងផ្លាស់ប្ដូរគោលនយោបាយរបស់យើងលើបញ្ហាសំខាន់ផ្សេងទៀត»។
លោក Robert Menendezសមាជិកព្រឹទ្ធសភាអាមេរិកគណបក្សប្រជាធិបតេយ្យដើមកំណើតគុយបា បានបន្ទោសការពិភាក្សាគ្នាទាក់ទងទៅនឹងប្រទេសគុយបា ហើយបានថ្កោលទោសសហការីក្នុងសភារបស់លោក ពីព្រោះពួកគេបានទៅទស្សនាកោះប្រទេសកុម្មុយនិស្ត។
«ខ្ញុំពិតភ្ញាក់ផ្អើលព្រោះសហការីរបស់យើងនៅក្នុងព្រឹទ្ធសភាដែលទៅបំពេញទស្សនកិច្ចនៅប្រទេសគុយបា មិនបានជួបជាមួយសកម្មជនសិទ្ធិមនុស្ស អ្នកនយោបាយប្រឆាំង អ្នកកាសែតឯករាជ្យណាមួយទេ បើសិនជាពួកគេបានជួប ពួកគេនឹងរារាំងកិច្ចប្រជុំជាមួយរដ្ឋាភិបាលគុយបា»។
លោកMenendez បន្តទៀតថា៖
«យើងត្រូវតែឈប់គិតបែបនេះ ពីព្រោះបើយើងផ្ញើសារឲ្យពិភពលោកដែលថាគឺបើចង់ជួបមន្រ្តីរដ្ឋាភិបាលនៃប្រទេសណាមួយហើយយើងមិនអាចជួបជាមួយសកម្មជនសិទ្ធិមនុស្ស អ្នកនយោបាយប្រឆាំង អ្នកកាសែតឯករាជ្យនៅប្រទេសចិន ប្រទេសម៉ាឡេស៊ី និងទីកន្លែងណាមួយផ្សេងទៀត នៅក្នុងពិភពលោកនោះទេ វាជាការសោកស្តាយមួយនៃកិច្ចការការបរទេសសម្រាប់សហរដ្ឋអាមេរិក »។
គ្មាននរណាម្នាក់នៅគណៈកម្មាធិការនេះឆ្លើយតបទៅនឹងយោបល់របស់សមាជិកព្រឹទ្ធសភាដែលធ្វើឡើងនៅជិតចុងបញ្ចប់នៃសវនាការដែលត្រូវបានបញ្ចប់ដោយសារការបោះឆ្នោតជាបន្តបន្ទាប់នៅព្រឹទ្ធសភា។
រដ្ឋបាលលោកអូបាម៉ាបញ្ជាក់ថាការស្តារទំនាក់ទំនងការទូតជាមួយរដ្ឋបាលទីក្រុងឡាហាវ៉ារបស់ប្រទេសគុយបានឹងជំរុញសេរីភាពស៊ីវិលនិងសិទ្ធិមនុស្សដោយការបង្កើនទំនាក់ទំនងនិងការផ្លាស់ប្តូររវាងប្រទេសទាំងពីរដែលត្រូវបានកាត់ផ្តាច់អស់រយៈពេលជាង ៥០ ឆ្នាំ។
ចំពោះកិច្ចព្រមព្រៀងនុយក្លេអ៊ែរជាមួយប្រទេសអ៊ីរ៉ង់ លោកប្រធានាធិបតីបារ៉ាក់អូបាម៉ា បាននិយាយម្តងហើយម្តងទៀតថាសហរដ្ឋអាមេរិកនៅតែមានការខ្វែងមតិគ្នាដ៏ធ្ងន់ធ្ងរជាមួយនឹងរដ្ឋាភិបាលក្រុងតេរ៉ង់ លើបញ្ហាជាច្រើន ប៉ុន្តែការចរចាដែលបានជាផលនៃកិច្ចព្រមព្រៀងនេះនៅទីក្រុងវីយេន គឺសំដៅតែទៅលើកម្មវិធីបរមាណូរបស់ប្រទេសនេះប៉ុណ្ណោះ ៕
ប្រែសម្រួលដោយ មាន ឥស្សរាយស
