សហរដ្ឋអាមេរិក កូរ៉េខាងត្បូង និងជប៉ុនត្រូវបានគេរំពឹងថា នឹងបង្កើតបណ្ដាញការពារសន្ដិសុខលក្ខណៈត្រីភាគីដ៏យូរអង្វែងមួយនៅក្នុងតំបន់ឥណ្ឌូប៉ាស៊ីហ្វិក នៅក្នុងកិច្ចប្រជុំកំពូលត្រីភាគីលើកដំបូងបង្អស់របស់ប្រទេសទាំងបី។ នេះបើតាមការបញ្ជាក់របស់ក្រុមអ្នកវិភាគ។ នេះគឺជាចំណាត់ការមួយដែលចិនប្រឆាំង។
កិច្ចប្រជុំកំពូលរវាងមេដឹកនាំនៃប្រទេសទាំងបី ដែលគ្រោងនឹងធ្វើឡើងនៅ Camp David ដែលជាកន្លែងវិស្សមកាលរបស់ប្រធានាធិបតីសហរដ្ឋអាមេរិក នៅក្នុងរដ្ឋ Maryland នឹងក្លាយជាឱកាសមួយសម្រាប់សហរដ្ឋអាមេរិក ក្នុងការបញ្ចុះបញ្ចូលសម្ពន្ធមិត្តនៃសន្ធិសញ្ញាទាំងពីររបស់ខ្លួន ឱ្យចូលរួមនៅក្នុងបណ្ដាញសន្ដិសុខកាន់តែតឹងរ៉ឹង និងពង្រីកតួនាទីរបស់ពួកគេនៅក្នុងតំបន់។ នេះបើតាមការលើកឡើងរបស់ក្រុមអ្នកវិភាគ។
នៅចុងបញ្ចប់នៃកិច្ចប្រជុំកំពូលនេះ គេរំពឹងថា ប្រធានាធិបតីសហរដ្ឋអាមេរិកលោក Joe Biden ប្រធានាធិបតីកូរ៉េខាងត្បូងលោក Yoon Suk Yeol និងនាយករដ្ឋមន្ត្រីជប៉ុនលោក Fumio Kishida នឹងប្រកាសអំពីផែនការរៀបចំកិច្ចប្រជុំជាទៀងទាត់ ហើយចាត់វិធានការដើម្បីធ្វើឱ្យប្រសើរឡើងនូវកិច្ចសហប្រតិបត្តិការសន្ដិសុខបន្ថែមពីលើការទប់ទល់នឹងការគំរាមកំហែងពីកូរ៉េខាងជើង។
លោក Evans Revere ដែលអតីតឧបការីស្ដីទីរដ្ឋមន្ត្រីការបរទេសទទួលបន្ទុកកិច្ចការតំបន់អាស៊ីបូព៌ានិងអាស៊ីប៉ាស៊ីហ្វិកក្នុងយុគសម័យរដ្ឋបាលលោកប្រធានាធិបតី George W. Bush បានថ្លែងថា សេចក្ដីថ្លែងការណ៍រួមមួយដែលនឹងចេញដោយមេដឹកនាំទាំងបីនាក់នេះ ទំនងជានឹងឆ្លុះបញ្ចាំងអំពីផែនការទាំងនេះ។
លោក Revere បានមានប្រសាសន៍ថា៖ «សេចក្ដីថ្លែងការណ៍នេះនឹងធ្វើឱ្យច្បាស់ថា កូរ៉េខាងជើងមិនមែនជាកង្វល់តែមួយគត់ដែលធ្វើឱ្យពួកគេទាំងបីនាក់ជួបគ្នានៅក្នុងកិច្ចប្រជុំត្រីភាគី ដែលមិនបានគ្រោងទុកជាមុននៅ Camp David នេះទេ»។
លោកបានថ្លែងទៀតថា៖ «ខណៈដែលរដ្ឋាភិបាលក្រុងព្យុងយ៉ាងអាចជាការគំរាមកំហែងបន្ទាន់បំផុត សាធារណរដ្ឋប្រជាមានិតចិនច្បាស់ណាស់ គឺជាបញ្ហាប្រឈមខាងយុទ្ធសាស្ត្រធំបំផុតរបស់រដ្ឋាភិបាលក្រុងវ៉ាស៊ីនតោន ក្រុងតូក្យូ និងក្រុងសេអ៊ូលនៅក្នុងរយៈពេលយូរអង្វែងទៅមុខទៀត»។
លោក Revere បានថ្លែងបន្ថែមទៀតថា៖ «កិច្ចព្រមព្រៀងដែលនឹងសម្រេចបាននៅក្នុងកិច្ចប្រជុំកំពូលលក្ខណៈប្រវត្តិសាស្ត្រនេះនឹងធ្វើឱ្យប្រទេសទាំងបីកាន់តែជិតស្និទ្ធគ្នា ឆ្ពោះទៅកាន់ភាពជាដៃគូអចិន្ត្រៃយ៍មួយ ដែលផ្ដោតសំខាន់ទៅលើព័ត៌មានសម្ងាត់ និងការចែករំលែកព័ត៌មាន ការការពារគ្រាប់មីស៊ីល ការធ្វើសមយុទ្ធយោធារួមគ្នា សន្ដិសុខលើប្រព័ន្ធអ៊ីនធឺណិត កិច្ចសហប្រតិបត្តិការដ៏ប្រុងប្រយ័ត្នទុកជាមុន និងការកម្ចាត់នុយក្លេអ៊ែរទំនើប»។
ការរួមបញ្ចូលកិច្ចខិតខំប្រឹងប្រែងដោយកូរ៉េខាងត្បូងនិងជប៉ុនទៅក្នុងភាពជាដៃគូដែលកំពុងតែមាននេះ គឺជាគោលដៅជាយូរណាស់មកហើយរបស់សហរដ្ឋអាមេរិក។ វាអាចទៅរួចនៅពេលឥឡូវនេះ ដោយសារតែមេដឹកនាំនៃប្រទេសទាំងពីរបានផ្សះផ្សាទំនាក់ទំនងដែលបែកបាក់កាលពីខែមីនា។
ជម្លោះរវាងប្រទេសទាំងពីរកើតឡើងនៅក្នុងសម័យអាណានិគមជប៉ុននៅឧបទ្វីបកូរ៉េចន្លោះពីឆ្នាំ ១៩១០ ដល់ឆ្នាំ ១៩៤៥ ដែលធ្វើឱ្យប៉ះពាល់ដល់កិច្ចសហប្រតិបត្តិការស្អិតរមួតរវាងប្រទេសអាស៊ីបូព៌ាទាំងពីរ ជាពិសេសលើបញ្ហាយោធា៕
ប្រែសម្រួលដោយអ្នកស្រី ហុង ចិន្ដា
