អនុគណៈកម្មាការសភាទទួលបន្ទុកកិច្ចការតំបន់អាស៊ី និងប៉ាស៊ីហ្វិកនៃគណៈកម្មការការបរទេសនៃសភាអាមេរិក គ្រោងនឹងបើកសវនាការសួរដេញដោលអំពីការធ្លាក់ចុះលទ្ធិប្រជាធិបតេយ្យ និងសិទ្ធិមនុស្សក្នុងប្រទេសកម្ពុជានៅរសៀលថ្ងៃអង្គារ ទី១២ ខែធ្នូ ឆ្នាំ២០១៧ខាងមុខ នៅឯអគារសភា Rayburn Building។ នេះបើតាមសេចក្តីប្រកាសព័ត៌មានមួយ ដែល VOA ទទួលបានពីគណៈកម្មាការសភា។
នៅក្នុងសេចក្តីប្រកាសព័ត៌មានដដែលបានបញ្ជាក់ឲ្យដឹងថា ក្រុមវាគ្មិនចូលរួមជាសាក្សី មានលោកស្រី Oliva Enos នៃអង្គការ Heritage Foundation កញ្ញា កឹម មនោវិទ្យា អគ្គនាយករងផ្នែកកិច្ចការសាធារណៈនៃអតីតគណបក្សសង្គ្រោះជាតិ និងលោក Kenneth Wollack នាយកអង្គការវិទ្យាស្ថានជាតិសម្រាប់ប្រជាធិបតេយ្យ NDI។
គណបក្សគ្រប់គ្រងប្រទេសរបស់លោកនាយករដ្ឋមន្ត្រីហ៊ុន សែន ដែលកាន់អំណាចជាង៣០ឆ្នាំបានរំលាយគណបក្សសង្គ្រោះជាតិ ដែលមានកម្លាំងប្រហាក់ប្រហែល និងគណបក្សប្រជាជនកម្ពុជា បណ្តេញអង្គការ NDI របស់ស.រ.អា ធ្វើទុក្ខបុកម្នេញសារព័ត៌មានឯករាជ្យនានា នៅមុនការបោះឆ្នោតឆ្នាំ២០១៨ ខាងមុខ។
សវនាការនេះកើតឡើង ក្រោយពេលដែលរដ្ឋាភិបាលស.រ.អាបានកាត់ជំនួយបោះឆ្នោត ព្រមានមិនទទួលស្គាល់លទ្ធផលបោះឆ្នោតនៅកម្ពុជា និងវិធានការផ្សេងៗទៀត បន្ថែមពីលើសេចក្តីសម្រេចនានាពីសភាអាមេរិក ការរឹតបន្តឹងទិដ្ឋាការចំពោះមន្ត្រីរដ្ឋាភិបាល និងការព្រមានអំពីទណ្ឌកម្មលើរដ្ឋាភិបាលកម្ពុជា និងបុគ្គលនានា ដែលធ្វើឲ្យអន្តរាយដល់ប្រជាធិបតេយ្យ។ ស.រ.អាជំរុញម្តងហើយម្តងទៀតឲ្យមាន ការដោះលែងលោក កឹម សុខា មេដឹកនាំក្រុមប្រឆាំង មានការបោះឆ្នោតដោយសេរីនិងយុត្តិធម៌ បញ្ឈប់ការយាយីក្រុមប្រឆាំង ក្រុមអង្គការសង្គមស៊ីវិល និងអ្នកសារព័ត៌មានឯករាជ្យ៕
