ស.រ.អាកំពុងថ្កោលទោសការវាយប្រហាររបស់ក្រុមអ៊ីស្លាមជ្រុលនិយម Boko Haram ដែលបានសម្លាប់មនុស្សយ៉ាងហោចណាស់៣៨នាក់នៅក្នុងតំបន់ភាគខាងត្បូងនៃប្រទេសនីហ្សេ។
នៅក្នុងសេចក្តីថ្លែងការណ៍មួយកាលពីថ្ងៃសុក្រលោក John Kirby អ្នកនាំពាក្យក្រសួងការបរទេសស.រ.អាបាននិយាយថា ពួកBoko Haramបានធ្វើការវាយប្រហារបង្កហេតុរាប់មិនអស់ទៅលើបុរស ស្រ្តី និងកូនក្មេងនៅក្នុងផ្ទះសាលារៀន ទីកន្លែងសក្ការៈបូជា និងទីកន្លែងប្រកបរបរផ្សេងៗ។
លោកបាននិយាយទៀតថា ស.រ.អាបានតាំងចិត្តធ្វើការយ៉ាងជិតស្និទ្ធជាមួយរដ្ឋាភិបាលនៅក្នុងតំបន់ ដើម្បីលុបបំបាត់ការគំរាមកំហែងរបស់ក្រុមនោះ។
ការវាយប្រហារកាលពីថ្ងៃព្រហស្បតិ៍បានកើតមានឡើងនៅក្នុងភូមិ២ក្នុងតំបន់ Diffa នៃប្រទេសនីហ្សេ ដែលនៅជិតព្រំដែនជាមួយប្រទេសនីហ្សេរីយ៉ា។
ការវាយឆ្មក់នោះជាការប៉ុនប៉ងនៅពេលថ្មីៗបំផុតដោយក្រុម Boko Haramដែលមានទីតាំងនៅក្នុងប្រទេសនីហ្សេរីយ៉ា ដើម្បីវាយប្រហារនៅខាងក្នុងប្រទេសនានា ដែលជាប្រទេសជិតខាង ដែលបានចូលរួមជាមួយកងទ័ពនីហ្សេរីយ៉ាដើម្បីកំទេចក្រុមនោះ។
ប្រទេសឆាដ រួមជាមួយប្រទេសនីហ្សេ និងប្រទេសកាមេរូនបានដាក់ពង្រាយកងទ័ពនៅដើមឆ្នាំនេះដើម្បីប្រយុទ្ធប្រឆាំងក្រុម Boko Haram បន្ទាប់ពីពួកជនសកម្មប្រយុទ្ធ នោះបានចាប់ផ្តើមធ្វើការវាយប្រហារជាបន្តបន្ទាប់ឆ្លងកាត់ព្រំដែន៕
