សហរដ្ឋអាមេរិកនិងសហភាពអឺរ៉ុបបានបញ្ជាក់ថា ពួកគេកំពុងតាមដានមើលកូរ៉េខាងជើងនិងអ៊ីរ៉ង់ក្រែងប្រទេសទាំងពីរធ្វើកិច្ចសហប្រតិបត្តិការយោធាណាមួយ ស្របពេលរដ្ឋាភិបាលអ៊ីរ៉ង់បានបញ្ជាក់អះអាងអំពីទស្សនកិច្ចរបស់គណៈប្រតិភូកូរ៉េខាងជើងនៅអ៊ីរ៉ង់។
កូរ៉េខាងជើងបានប្រកាសតាមទីភ្នាក់ងារសារព័ត៌មាន KCNA របស់ខ្លួនថា ខ្លួនបានបញ្ជូនគណៈប្រតិភូមួយក្រុមដែលដឹកនាំដោយរដ្ឋមន្ត្រីទំនាក់ទំនងសេដ្ឋកិច្ចបរទេសលោក Yun Jong Ho ទៅកាន់ប្រទេសអ៊ីរ៉ង់កាលពីថ្ងៃទី ២៣ ខែមេសា។
អ្នកនាំពាក្យក្រសួងការបរទេសអ៊ីរ៉ង់លោក Nasser Kanaani បាននិយាយកាលពីថ្ងៃចន្ទថា គណៈប្រតិភូកូរ៉េខាងជើងបានធ្វើទស្សនកិច្ចទៅកាន់ប្រទេសអ៊ីរ៉ង់កាលពីសប្ដាហ៍មុនដើម្បីពិភាក្សាអំពីពាណិជ្ជកម្មទ្វេភាគី។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters។
ប៉ុន្តែ លោក Kanaani បានបដិសេធថាមិនមានកិច្ចសហប្រតិបត្តិការណាមួយដែលគេសង្ស័យទាក់ទិននឹងកម្មវិធីមីស៊ីលរបស់ពួកគេនោះទេ ដោយបាននិយាយថាវាគឺជា «ការសង្ស័យលំអៀង» ផ្អែកលើការរាយការណ៍ «មិនពិត»៕
វេទិកាបញ្ចេញមតិ