ប្រទេសចំនួន ១៧ បានបញ្ជាក់ការប្តេជ្ញាជាថ្មី ដើម្បីការពារកូរ៉េខាងត្បូង ប្រឆាំងនឹងការវាយប្រហារណាមួយពីកូរ៉េខាងជើង ដែលជាប្រទេសជិតខាងនៅភាគខាងជើង ដោយការណ៍នេះបានបង្កឱ្យមានការឆ្លើយតបយ៉ាងខឹងសម្បារពីចិន។
បណ្តារដ្ឋសមាជិកបញ្ជាការដ្ឋានអង្គការសហប្រជាជាតិ (UNC) ដែលជាកងកម្លាំងយោធាពហុជាតិ ដែលរក្សាបទឈប់បាញ់គ្នារវាងកូរ៉េខាងជើងនិងកូរ៉េខាងត្បូង។ បទឈប់បាញ់គ្នានេះត្រូវបានចុះហត្ថលេខានៅឆ្នាំ ១៩៥៣ ហើយមានសុពលភាពរហូតមកទល់ពេលបច្ចុប្បន្ន។ ប្រសិនបើជម្លោះកើតឡើងនៅឧបទ្វីបកូរ៉េ បណ្តាប្រទេសសមាជិកបញ្ជាការដ្ឋាននេះត្រូវសម្របសម្រួលការដាក់ពង្រាយសព្វាវុធនិងកងទាហានដើម្បីគាំទ្រកូរ៉េខាងត្បូង។
រដ្ឋមន្រ្តីការពារជាតិនិងតំណាងពីប្រទេសចំនួន ១៧ បានជួបប្រជុំនៅពាក់កណ្តាលខែវិច្ឆិកា នៅក្រុងសេអ៊ូល តាមការអញ្ជើញពីសំណាក់ក្រសួងការពារជាតិកូរ៉េខាងត្បូង សម្រាប់កិច្ចប្រជុំជាប្រវត្តិសាស្រ្តមួយនេះ។
រដ្ឋសមាជិកបញ្ជាការដ្ឋានអ.ស.បមួយចំនួនបានចូលរួមនៅក្នុងលំហាត់សមយុទ្ធយោធារៀបចំឡើងដោយសហរដ្ឋអាមេរិកនិងកូរ៉េខាងត្បូង ប៉ុន្តែកិច្ចប្រជុំនៅថ្ងៃទី១៣ ខែវិច្ឆិកា បានកំណត់ជាលើកដំបូង ដែលរដ្ឋសមាជិកបញ្ជាការដ្ឋានអ.ស.បពីអាហ្វ្រិក អឺរ៉ុប មជ្ឈិមបូព៌ា អាមេរិកខាងត្បូង អាមេរិកខាងជើង និងអាស៊ីអាគ្នេយ៍បានមកប្រជុំគ្នា ចាប់តាំងពីការបង្កើតបញ្ជាការដ្ឋានអ.ស.បកាលពី ៧០ឆ្នាំមុន។
នៅក្នុងសេចក្តីថ្លែងការណ៍រួមចុះផ្សាយបន្ទាប់ពីកិច្ចប្រជុំ តំណាងពីប្រទេសខាងលើបានប្រកាសថា ពួកគេ «នឹងរួមសាមគ្គីក្នុងករណីមានភាពគឃ្លើន ឬការវាយប្រហារប្រដាប់អាវុធជាថ្មីណាមួយនៅឧបទ្វីបកូរ៉េ ដោយទង្វើនេះជាការបំពានគោលការណ៍អង្គការសហប្រជាជាតិ និងសន្តិសុខរបស់កូរ៉េខាងត្បូង»។
អ្នកនាំពាក្យក្រសួងការបរទេសចិនអ្នកស្រី Mao Ning បានរិះគន់ «បញ្ជាការដ្ឋានអ.ស.ប» នៅក្នុងសន្និសីទសារព័ត៌មាននៅក្រុងប៉េកាំងកាលពីថ្ងៃទី១៣ ខែវិច្ឆិកា។ អ្នកស្រីបាននិយាយថា បញ្ជាការដ្ឋានអ.ស.ប «មិនមានមូលដ្ឋានផ្លូវច្បាប់» និង «ជំរុញការប្រឈមគ្នា» នៅលើឧបទ្វីបកូរ៉េ។
លោក David Maxmall អនុប្រធានវិទ្យាស្ថានសិក្សាគោលនយោបាយ Center for Asia-Pacific Strategy បាននិយាយថា ការអះអាងរបស់រដ្ឋាភិបាលក្រុងប៉េកាំងគឺ មិនត្រឹមត្រូវនោះទេ ខណៈសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ លេខ ៨២ ដល់ ៨៥ ដែលផ្តល់ភាពស្របច្បាប់ចំពោះការបង្កើត និងប្រតិបត្តិការរបស់បញ្ជាការដ្ឋានអ.ស.ប «នៅតែមានសុពលភាព» និង «មិនដែលត្រូវបានដកចេញនោះទេ»៕
ប្រែសម្រួលដោយ ណឹម សុភ័ក្រ្តបញ្ញា
