ក្រុមប្រឹក្សាសន្តិសុខអង្គការសហប្រជាជាតិបានប្រាប់ក្រុមតាលីបង់ (Taliban) កាលពីថ្ងៃចន្ទថា ខ្លួនរំពឹងថា ក្រុមតាលីបង់នឹងអនុញ្ញាតឲ្យមានការឆ្លងកាត់ដោយសុវត្ថិភាពសម្រាប់ជនបរទេសទាំងអស់និងជនជាតិអាហ្វហ្គានីស្ថានណាដែលចង់ចាកចេញពីប្រទេសអាហ្វហ្គានីស្ថាន។
ក្នុងចំណោមសមាជិកទាំង ១៥ ប្រទេសរបស់ក្រុមប្រឹក្សានេះ មានតែប្រទេសរុស្ស៊ីនិងចិនប៉ុណ្ណោះដែលបានសម្រេចធ្វើអនុបវាទសេចក្តីព្រាងសេចក្តីសម្រេចនេះ។ សេចក្ដីព្រាងសេចក្ដីសម្រេចនេះត្រូវបានតាក់តែងដោយសហរដ្ឋអាមេរិក ចក្រភពអង់គ្លេស និងប្រទេសបារាំង។
ក្រុមប្រឹក្សាសន្តិសុខអង្គការសហប្រជាជាតិបានផ្ដោតលើសេចក្តីថ្លែងការណ៍ថ្ងៃទី ២៧ ខែសីហារបស់ក្រុមតាលីបង់ដែលថា ពួកគេនឹងមិនរារាំងពលរដ្ឋអាហ្វហ្គានីស្ថានណាដែលចង់ចាកចេញពី ប្រទេសតាមផ្លូវគោកឬតាមផ្លូវអាកាសនោះឡើយ។
ក្រុមប្រឹក្សានេះបានបញ្ជាក់ថា ខ្លួន «រំពឹងថា ក្រុមតាលីបង់នឹងប្រកាន់ខ្ជាប់តាមការប្តេជ្ញាចិត្តទាំងនេះ និងការប្ដេជ្ញាចិត្តផ្សេងៗទៀត ដូចជាការអនុញ្ញាតឲ្យជនបរទេសទាំងអស់និងពលរដ្ឋអាហ្វហ្គានីស្ថានចាកចេញពីប្រទេសអាហ្វហ្គានីស្ថានប្រកបដោយសុវត្ថិភាពនិងរបៀបរៀបរយជាដើម»។
រូបភាពច្របូកច្របល់នៅអាកាសយានដ្ឋានក្រុងកាប៊ុលចាប់តាំងពីក្រុមតាលីបង់បានវាយលុកចូលរដ្ឋធានីនេះកាលពីថ្ងៃទី ១៥ ខែសីហាមក បានបង្ហាញឲ្យឃើញថា ពលរដ្ឋអាហ្វហ្គានីស្ថានជាច្រើនអន្ទះសាចង់ភៀសខ្លួនចេញពីប្រទេស។
ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិអ្នកស្រី Linda Thomas-Greenfield បាននិយាយថា សហរដ្ឋអាមេរិកបានជួយសម្រួលដល់ការជម្លៀសជនជាតិអាមេរិក ជនជាតិអាហ្វហ្គានីស្ថាន និងជនជាតិដទៃទៀតចំនួន ១២២.០០០ នាក់ ចាប់តាំងពីចុងខែកក្កដាមក។
អ្នកស្រីបញ្ជាក់ដូច្នេះថា៖ «ក្រុមប្រឹក្សាសន្តិសុខអង្គការសហប្រជាជាតិរំពឹងថា ក្រុមតាលីបង់នឹងគោរពតាមការប្តេជ្ញាចិត្តរបស់ខ្លួនក្នុងការសម្រួលដល់ការធ្វើដំណើរប្រកបដោយសុវត្ថិភាពសម្រាប់ជនជាតិអាហ្វហ្គានីស្ថាននិងជនបរទេសណាដែលចង់ចាកចេញពីប្រទេសអាហ្វហ្គានីស្ថាន»។
ពលរដ្ឋអាហ្វហ្គានីស្ថានខ្លះខ្លាចមានការសងសឹកចំពោះពួកគេ ដោយសារពួកគេធ្លាប់ធ្វើការជាអ្នកបកប្រែភាសានិងធ្វើការផ្សេងទៀតឲ្យកងកម្លាំងសហរដ្ឋអាមេរិកនិងកងកម្លាំងអង្គការអូតង់ (NATO)។ ចំណែកឯស្ត្រីនិងជាតិសាសន៍ភាគតិចវិញ ភ័យខ្លាចការវិលត្រឡប់ទៅរកការគាបសង្កត់និងការរំលោភសិទ្ធិមនុស្សដូចកាលពីចុងទសវត្សរ៍ ១៩៩០ និងដើមទសវត្សរ៍ ២០០០ នៅពេលដែលក្រុមតាលីបង់បានឡើងកាន់អំណាចជាលើកដំបូងនៅក្នុងប្រទេសអាហ្វហ្គានីស្ថាន៕
