មន្ត្រីកម្ពុជាឲ្យដឹងនៅថ្ងៃព្រហស្បតិ៍ នេះថា អាជ្ញាធរនៃប្រទេសអូស្ត្រាលីគ្រោងនឹងបញ្ជូនជនភៀសខ្លួន២រូបផ្សេងទៀតពីកោះណូរូ (Nauru) នៅក្នុងមហាសមុទ្រខាងត្បូងមកកាន់ប្រទេសកម្ពុជា នាពេលខាងមុខ ក្រោយពេលដែលជនទាំងពីររូបនេះបានស្ម័គ្រចិត្តមកធ្វើការតាំងទីលំនៅក្នុងប្រទេសដ៏ក្រីក្រនេះ។
លោក កែម សារិន ប្រធាននាយកដ្ឋានរដ្ឋបាល និងជាអ្នកនាំពាក្យនៃអគ្គនាយកដ្ឋានអន្តោប្រវេសន៍របស់ក្រសួងមហាផៃ្ទបានប្រាប់ VOA ថា មន្ត្រីការទូតរបស់ប្រទេសអូស្ត្រាលីឲ្យដំណឹងថា ភាគីអូស្ត្រាលី ទំនងជាមានជនភៀសខ្លួន២រូបផ្សេងទៀតពីកោះណូរូដោយស្ម័គ្រចិត្ត ក៏ប៉ុន្តែ លោកមិនទាន់អាចបញ្ជាក់ពី អត្តសញ្ញាណរបស់ជនភៀសខ្លួន និងកាលបរិច្ឆេទនៃការមកតាំងទីលំនៅថ្មីនេះ បាននៅឡើយនោះទេ។
លោក កែម សារិន ថ្លែងថា៖
«ខាងទូតគេគ្រាន់តែប្រាប់ថា អាចនឹងមានអ្នកស្ម័គ្រចិត្ត២នាក់ទៀត។ ប៉ុន្តែជាផ្លូវការយើងមិនទាន់ទទួលបានអ្វីទេ។ យើងកំពុងតែរង់ចាំថា វាមានពិតប្រាកដដែរអត់។ បើសិនជាមានគេនឹងផ្ញើឯកសារផ្លូវការមកយើងហើយ បែបបទនៃការស្ម័គ្រក្នុងការតាំងលំនៅនៅកម្ពុជា»។
យ៉ាងណាក៏ដោយ លោក តាន់ សុវិជ្ជា ដែលជាប្រធាននាយកដ្ឋានជនភៀសខ្លួននៃអគ្គនាយកដ្ឋានអន្តោប្រវេសន៍ក្រសួងមហាផ្ទៃបញ្ជាក់ប្រាប់ VOA ថាលោកមិនទាន់ទទួលបានព័ត៌មាននេះ នៅឡើយទេ។
«អត់ទាន់ដឹងផង។ ខ្ញុំទទួលបន្ទុក ខ្ញុំអត់ទទួលបានព័ត៌មាន»។
កម្ពុជាបានចុះកិច្ចព្រមព្រៀង ជាមួយរដ្ឋាភិបាលអូស្ត្រាលីក្នុងឆ្នាំ២០១៤ ដើម្បីផ្ទេរនិងទទួលយកជនភៀសខ្លួនដែលធ្វើដំណើរតាមទូកទៅប្រទេសអូស្ត្រាលី ហើយត្រូវបានអាជ្ញាធរប្រទេសអូស្ត្រាលីដាក់ឃុំឃាំង លើកោះណូរូក្នុងមហាសមុទ្រប៉ាស៊ីហ្វិកភាគខាងត្បូង។ កិច្ចព្រមព្រៀងទ្វេភាគីនេះ ត្រូវបានគេមើលឃើញថាជាថ្នូរនឹងកម្មវិធីជំនួយអភិវឌ្ឍន៍ពីប្រទេសអូស្រ្តាលីចំនួនជាង៤០លានដុល្លារសហរដ្ឋអាមេរិក។
ជនភៀសខ្លួន៣រូបក្នុងចំណោមជនភៀសខ្លួនទាំង៥រូប ពីកោះដាច់ស្រយាលណូរូ ដែលបានតាំងទីលំនៅក្នុងប្រទេសកម្ពុជា បានសុំចាកចេញពីកម្ពុជា ទៅកាន់ស្រុកកំណើតរៀងខ្លួនវិញ កាលពីចុងឆ្នាំ២០១៥កន្លងទៅ ក្រោយការស្នាក់នៅមួយរយៈខ្លី។ ជនភៀសខ្លួនដែលបានចាកចេញពីកម្ពុជាទាំងបីរូបនេះរួមមាន បុរសម្នាក់មកពីប្រទេសភូមា និងប្តីប្រពន្ធមួយគូមកពីប្រទេសអ៊ីរ៉ង់។
លោក តាន់ សុវិជ្ជា បានប្រាប់ VOA ថា ជនភៀសខ្លួន២រូបដែលកំពុងតាំងលំនៅក្នុងប្រទេសកម្ពុជាគឺមានសិទ្ធិដូចជនបរទេសដទៃទៀតដែលរស់នៅ នៅលើដែនដីកម្ពុជា ក៏ប៉ុន្តែលោកពុំអាចបញ្ជាក់ ឲ្យបានច្បាស់លាស់អំពីស្ថានភាពរស់នៅរបស់ពួកគេឲ្យបានជាក់លាក់នោះទេ។
«កម្ពុជាផ្តល់តែកន្លែងស្នាក់នៅទេ ផ្តល់ទីកន្លែង តែរឿងសេវាអ្វីផ្សេងៗគឺអត់មានទេ។ ជាបន្ទុករបស់រដ្ឋាភិបាលអូស្ត្រាលី។ គាត់សម្របខ្លួនបានដូចជនបរទេសដទៃចឹង ពេលគាត់មកដល់គាត់មានសេរីភាពដើរស្រេចចិត្ត»។
ការចាកចេញជាបន្តបន្ទាប់របស់ជនភៀសខ្លួនពីកោះដាច់ស្រយ៉ាលណូរូ បានទទួលការរិះគន់ជាខ្លាំងពីអង្គការសង្គមស៊ីវិលនិងអ្នកឃ្លាំមើលសិទិ្ធមនុស្ស ជាពិសេស កង្វះខាតនៃការផ្តល់សេវាសាធារណៈ របស់រដ្ឋាភិបាលកម្ពុជា។ យ៉ាងណាក៏ដោយពួកគេលើកឡើងថាកម្ពុជាគប្បីដោះស្រាយបញ្ហាចម្រូងចម្រាសក្នុងសង្គម ពង្រឹងសេវាសាធារណៈ ការគោរពសិទ្ធិមនុស្ស និងប្រព័ន្ធគាំពារសង្គមឲ្យបានល្អសិន មុននឹងទទួលយកជនភៀសខ្លួន ពីបរទេសឲ្យមករស់នៅលើទឹកដីខ្លួន។
លោក អំ សំអាត ប្រធានការិយាល័យបច្ចេកទេសស៊ើបអង្កេតនៃអង្គការសិទ្ធិមនុស្សលីកាដូបង្ហាញក្តីបារម្ភចំពោះការទទួលយកជនភៀសខ្លួននេះ ដោយហេតុថាកន្លងមកមានជនភៀសខ្លួនមួយចំនួនធ្លាប់មកជ្រកកោននៅកម្ពុជាដែរ ក៏ប៉ុន្តែបានសុំត្រឡប់ទៅវិញដែលនេះអាចបង្កភាពល្អក់កករដល់មុខមាត់កម្ពុជា។
«សង្គមស៊ីវិលយើងបានទទូចហើយថាកម្ពុជាយើងមិនទាន់ដល់ពេលដែលត្រូវទទួលយកជនភៀសខ្លួនមកស្នាក់នៅទេដោយសារតែយើងត្រូវតែមានការអភិវឌ្ឍប្រទេសយើងឲ្យបានជឿនលឿន ទាក់ទងទាំងសិទ្ធិសេរីភាព ធ្វើយ៉ាងណាឲ្យបានល្អប្រសើរ។ បើនៅក្នុងប្រទេសយើង យើងឃើញថាបញ្ហាដីធ្លី បញ្ហាអ្វីមិនទាន់ដោះស្រាយជូនប្រជាជនបានសព្វគ្រប់។ យើងត្រូវធ្វើម៉េចគិតគូរកូនយើង ឲ្យមានហើយចាំយកកូនគេមកចិញ្ចឹម»។
លោក មឿន តុលា នាយកប្រតិបត្តិនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ឬហៅកាត់ថា Central ឲ្យដឹងថាជនភៀសខ្លួនទាំងនោះចង់រស់នៅក្នុងប្រទេសរីកចម្រើន និងមានលក្ខខណ្ឌរស់នៅល្អប្រសើរ។ ហើយពួកគេមិនរំពឹងថានឹងត្រូវបានបញ្ជូនមកប្រទេសទី៣នោះទេ។
«ជនភៀសខ្លួនទាំងអស់ហ្នឹង គាត់ប្រឹងគេចពីស្ថានភាពមួយ ដែលមានការរំលោភសិទ្ធិមនុស្ស គេចពីស្ថានភាពមួយ ដែលមិនមានកិច្ចគាំពារកិច្ចការសង្គម ហើយដែលរំពឹងថា នឹងអាចរស់នៅប្រទេសអូស្ត្រាលីដែលមានស្ថានភាពប្រសើរជាងប្រទេសខ្លួនឯង។ តែប្រទេសអូស្រ្តាលីបែរជាបញ្ជូនគាត់មកកម្ពុជា។ ហេតុនេះ ទើបជនភៀសខ្លួនខ្លះសុខចិត្តត្រឡប់ទៅវិញ»។
លោក មឿន តុលា លើកឡើងថារដ្ឋាភិបាលអូស្រ្តាលីទំនងជាមិនបានប្រាប់ការពិតដល់ជនភៀសខ្លួនទាំងនោះអំពីស្ថានភាពជាក់ស្តែងរបស់ជនភៀសខ្លួននៅកម្ពុជាឡើយ។
«រដ្ឋមន្ត្រីក្រសួងការបរទេសអូស្រ្តាលី បានធ្វើសន្និសីទកាសែត ឬបានបង្ហាញទៅដល់ជនជាតិអូស្ត្រាលីថាគេបានសហការជាមួយប្រទេសកម្ពុជា ហើយផ្តល់នូវទីជម្រកល្អ ផ្តល់លុយរាប់លានដុល្លារដល់ជនភៀសខ្លួនទាំងអស់ហ្នឹង អាចមករស់នៅប្រកបដោយសេចក្តីថ្លៃថ្នូរនៅកម្ពុជា។ តែគេមិនបាននិយាយថា ពួកគេចាកចេញពីកម្ពុជាវិញទេ»។
ដំណឹងនៃការបញ្ជូន ជនភៀសខ្លួនពីររូបពីកោះណូរូ មកកាន់ប្រទេសកម្ពុជាបន្ថែមទៀតនេះ គឺធ្វើឡើងមិនបានប៉ុន្មានថ្ងៃ បន្ទាប់មានដំណឹងពីការដុតសម្លាប់ខ្លួនរបស់ជនជាតិអ៊ីរ៉ង់ មួយរូបដើម្បីសម្តែងការមិនពេញចិត្តក្នុងការបណ្តេញពួកខ្លួនពីប្រទេសអូស្ត្រាលី៕
