បេក្ខជនប្រធានាធិបតីនៃគណបក្សសាធារណរដ្ឋ លោក Donald Trump បានផ្លាស់ប្តូរថ្នាក់ដឹកនាំនៃយុទ្ធនាការរកសំឡេងឆ្នោតរបស់លោក មិនដល់៣ខែមុនពេលពលរដ្ឋអាមេរិកាំងសម្រេចថាតើអ្នកណានឹងចូលកាន់តំណែងនៅសេតវិមាន នៅខែមករា។ លោក Trump បានជួលលោក Stephen Bannon ដែលជាអគ្គនាយកជាន់ខ្ពស់ នៃគេហទំព័រព័ត៌មានអភិរក្ស Breitbart ឲ្យកាន់តំណែងជាអគ្គនាយកប្រតិបត្តិ សម្រាប់យុទ្ធនាការរកសំឡេងឆ្នោត ហើយបានតែងតាំងអ្នកស្រី Kellyanne Conway ជាអ្នកចាត់ចែងយុទ្ធនាការ។
យុទ្ធនាការលោក Trump បាននិយាយថា តំណែងរបស់លោក Bannon នឹងពាក់ព័ន្ធជាមួយការចាត់ចែងបុគ្គលិក និងការផ្ចុងផ្តើមយុទ្ធនាការធំៗ។ ចំណែកអ្នកស្រី Conway វិញនឹងផ្តោតលើសារយុទ្ធនាការ ហើយនិងធ្វើដំណើរញឹកញាប់ជាមួយលោក Trump។ នៅក្នុងទីក្រុង Cleveland រដ្ឋ Ohio ដែលជាកន្លែងសមាជជាតិរបស់គណបក្សសាធារណរដ្ឋ កាលពីខែកក្កដានោះ គូប្រជែងរបស់លោក Trump គឺលោកស្រី Hillary Clinton ខាងគណបក្សប្រជាធិបតេយ្យ បានថ្លែងថា ចំណាត់ការរបស់លោក Trump នឹងមិនផ្លាស់ប្តូរបេក្ខជនផ្ទាល់ទេ ដោយនិយាយថាលោក Trump នៅតែជាបុរសដដែល៕
