លោក Donald Trump ដែលត្រូវបានសន្មតថា នឹងទទួលការតែងតាំងជាបេក្ខជនប្រធានាធិបតីស.រ.អាខាងគណបក្សសាធារណរដ្ឋ បាននិយាយកាលពីថ្ងៃអាទិត្យថា លោកមិនព្រួយបារម្ភទេអំពីពួកមេដឹកនាំសំខាន់ៗរបស់គណបក្សដែលបានថ្លែងថា ពួកគេនឹងមិនគាំទ្រលោកទេនៅក្នុងការបោះឆ្នោតជាតិប្រឆាំងនឹងលោកស្រី Hillary Clinton អតីតរដ្ឋមន្ត្រីការបរទេសស.រ.អា ដែលទំនងជានឹងទទួលការតែងតាំងជាបេក្ខជនប្រធានាធិបតីអាមេរិកខាងគណបក្សប្រជាធិបតេយ្យ។
នៅពេលមហាសេដ្ឋីអចលនទ្រព្យដែលមានប្រាក់រាប់ពាន់លានដុល្លាររូបនេះជិតនឹងទទួលការតែងតាំងជាបេក្ខជនប្រធានាធិបតីកាលពីសប្តាហ៍មុនហើយនោះ ប្រធានាធិបតីខាងគណបក្សសាធារណរដ្ឋចុងក្រោយពីរនាក់គឺលោកប្រធានាធិបតី George H.W. Bush និងកូនប្រុសលោកគឺ លោកប្រធានាធិបតី George W. Bush ព្រមទាំងក្រុមមន្ត្រីក្នុងគណបក្សឯទៀតៗជាច្រើននាក់បានប្រកាសថា អស់លោកគ្មានបំណងគាំទ្របេក្ខភាពរបស់លោក Trumpដែលមានគោលជំហរខុសពីគណបក្សឡើយ។
លោក Trump បានសាកសួរអំពីគណបក្សសាធារណរដ្ឋនៅក្នុងកម្មវិធី This Week នៃបណ្តាញទូរទស្សន៍ ABC ថា «តើគណបក្សសាធារណរដ្ឋត្រូវតែបង្រួបបង្រួមគ្នាឬទេ? តើខ្ញុំខុសប្លែកខ្លាំងណាស់ពីអ្នកឯទៀត ប្រហែល ដោយសារខ្ញុំមិនដែលឈរឈ្មោះសម្រាប់កាន់តំណែងសាធារណ:មែនទេ? ខ្ញុំមិនយល់ឃើញដូច្នេះទេ»។
លោក Trump បាននិយាយទៀតថា «ខ្ញុំយល់ថាជាការល្អប្រសើរ ប្រសិនបើគណបក្សនេះមានការរួបរួមគ្នា ខ្ញុំយល់ថា ជាការល្អសម្រាប់ការណ៍នេះ។ ក៏ប៉ុន្តែខ្ញុំយល់ថាគណបក្សនេះមិនត្រូវមានការរួបរួមគ្នាតាមន័យបែបប្រពៃណីទេ»។
មន្ត្រីជាន់ខ្ពស់បំផុតរបស់គណបក្សសាធារណរដ្ឋ ដែលបានជាប់ឆ្នោតនៅពេលបច្ចុប្បន្ននេះគឺ លោក Paul Ryan ប្រធានសភាតំណាងរាស្ត្រអាមេរិកាំងបាននិយាយថា លោក«មិនទាន់ប្រុងប្រៀប» គាំទ្រលោក Trump ទេហើយលោកចង់ឲ្យប្រាកដប្រជាថា លោក Trump ប្រព្រឹត្តតាមគោលការណ៍អភិរក្សនិយមជាប្រពៃណីរបស់គណបក្សសាធារណរដ្ឋនៅមុនពេលលោកយល់ព្រមគាំទ្រលោកTrump។ លោក Ryan បានប្រឆាំងនឹងការអំពាវនាវរបស់លោក Trump
ក្នុងការរារាំងជាបណ្តោះអាសន្នមិនឲ្យក្រុមជនអ្នកកាន់សាសនាឥស្លាមចូលមកក្នុងស.រ.អា ហើយឥស្សរជនទាំងពីរនាក់នេះក៏មិនយល់ស្របគ្នាដែរអំពីបញ្ហាគោលនយោបាយការបរទេស និងបញ្ហាពាណិជ្ជកម្មស.រ.អាផងដែរ៕
