កាលពីថ្ងៃចន្ទ ក្រុមមេធាវីរបស់អតីតប្រធានាធិបតីសហរដ្ឋអាមេរិកលោក Donald Trump បានស្នើចៅក្រមសហរដ្ឋអាមេរិកកុំឱ្យអនុញ្ញាតឱ្យក្រសួងយុត្តិធម៌មានលទ្ធភាពអាចមើលឯកសារសម្ងាត់ជាង ១០០ ដែលរឹបអូសបានពីភូមិគ្រឹះ Mar-a-Lago របស់លោកនៅក្នុងរដ្ឋ Florida នៅក្នុងផ្នែកមួយនៃការស៊ើបអង្កេតលើករណីដែលលោកបានរក្សាទុកឯកសាររបស់រដ្ឋាភិបាល។
ក្រសួងយុត្តិធម៌បានបញ្ជាក់ថា ប្រសិនបើខ្លួនមិនអាចមើលឯកសារទាំងនោះបាន នោះភ្នាក់ងារស៊ើបអង្កេតសហព័ន្ធ (FBI) នឹងមិនអាចជំរុលទៅមុខនូវការស៊ើបអង្កេតក្នុងពេលមួយខែកន្លងមកតាមរយៈការសាកសួរសាក្សី និងការបង្កើតភ័ស្តុតាងផ្សេងទៀតនោះទេ។
ការមិនមានលទ្ធភាពនៅក្នុងការមើលឯកសារសម្ងាត់ទាំងនេះក៏បានបង្អាក់ផងដែរដល់ការវាយតម្លៃរបស់សហគមន៍ស៊ើបការណ៍សម្ងាត់លើហានិភ័យសន្តិសុខដែលបង្កឡើងដោយការរក្សាទុកឯកសារទាំងនោះនៅឯភូមិគ្រឹះរបស់លោក Trump។ នេះបើយោងតាមការបង្ហាញរបស់ក្រសួងយុត្តិធម៌កាលពីសប្ដាហ៍មុន។
នៅក្នុងដំណើររាំងស្ទះចំពោះការស៊ើបអង្កេតនេះ ចៅក្រមសហរដ្ឋអាមេរិកអ្នកស្រី Aileen Cannon បានយល់ស្របតាមសំណើរបស់លោក Trump កាលពីសប្ដាហ៍មុន ដោយបានបញ្ជាឱ្យមានការតែងតាំងអ្នកជំនាញពិសេសដើម្បីពិនិត្យលើឯកសារសម្ងាត់ដែលរឹបអូសបានពីភូមិគ្រឹះរបស់លោក ដើម្បីពិនិត្យមើលថាតើមានឯកសារណាខ្លះដែលជាឯកសារបុព្វសិទ្ធិរបស់ប្រធានាធិបតីដែលគួរតែប្រគល់ជូនលោកវិញ។
ជាងនេះទៀត អ្នកស្រីចៅក្រម Cannon បានរារាំងក្រសួងយុត្តិធម៌មិនឱ្យប្រើឯកសារទាំងនោះសម្រាប់ «គោលបំណងស៊ើបអង្កេតព្រហ្មទណ្ឌ» ដោយតម្រូវឱ្យរង់ចាំការពិនិត្យនោះបញ្ចប់រួចរាល់ជាមុនសិន។
កាលពីថ្ងៃព្រហស្បតិ៍សប្ដាហ៍មុន ក្រសួងយុត្តិធម៌បានអះអាងថា ឯកសារសម្ងាត់ដែលរឹបអូសបានទាំងនោះគឺជាកម្មសិទ្ធិរបស់រដ្ឋាភិបាល និងបានស្នើអ្នកស្រីចៅក្រម Cannon ឱ្យ«បញ្ឈប់»បទបញ្ជានេះ ដោយអនុញ្ញាតឱ្យភ្នាក់ងារ FBI មានលទ្ធភាពអាចមើលឯកសារទាំងនោះវិញបាន និងដាក់កំហិតលើលទ្ធភាពរបស់អ្នកជំនាញពិសេសនៅក្នុងការមើលឯកសារទាំងនោះ។
ប៉ុន្តែ ក្រុមមេធាវីរបស់លោក Trump បានអះអាងថា បទបញ្ជារបស់អ្នកស្រីចៅក្រម Cannon ពាក់ព័ន្ធនឹងការតែងតាំងអ្នកជំនាញពិសេសនេះគឺជា«ជំហានដំបូងដែលមានលក្ខណៈសមហេតុផលនៅក្នុងការស្ដាររបៀបរៀបរយឡើងវិញពីភាពច្របូកច្របល់» និងបានស្នើអ្នកស្រី Cannon ឱ្យច្រានចោលសំណើរបស់ក្រសួងយុត្តិធម៌៕
មេធាវីលោក Trump ស្នើចៅក្រមកុំឱ្យអនុញ្ញាតឱ្យទីភ្នាក់ងារ FBI មើលឯកសារសម្ងាត់ដែលរឹបអូសបាន
វ៉ាស៊ីនតោន —
