កិច្ចប្រជុំបិទទ្វាររវាងគណៈកម្មការចម្រុះព្រំដែនកម្ពុជានិងវៀតណាមបានបញ្ចប់នៅរសៀលថ្ងៃព្រហស្បតិ៍នេះ ដោយមិនមានលទ្ធផលជាដុំកំភួន។ មេដឹកនាំក្រុមចរចានៃប្រទេសទាំងពីរបានចាកចេញពីបន្ទប់ចុះហត្ថលេខាដោយមិនឆ្លើយតបនឹងសំណួររបស់អ្នកសារព័ត៌មាន។
គណៈកម្មការចម្រុះព្រំដែនកម្ពុជានិងវៀតណាមបានធ្វើការប្រជុំរយៈពេលបីថ្ងៃនៅទីស្តីការគណៈរដ្ឋមន្ត្រី ចាប់តាំងពីថ្ងៃអង្គារមក។ កិច្ចប្រជុំទ្វេភាគីនេះ គឺដើម្បីពិភាក្សាលើបញ្ហាបាតុភាពថ្មីៗ នៅតាមព្រំដែននៃប្រទេសទាំងពីរ និងបន្តយន្តការបោះបង្គោលព្រំដែនកម្ពុជាវៀតណាម។
បន្ទាប់ពីចុះហត្ថលេខាលើឯកសារមួយចំនួន នាល្ងាចថ្ងៃព្រហស្បតិ៍នេះ ភាគីវៀតណាម ដែលដឹកនាំដោយលោក ស៊ូ ស៊ានសឿន (Xo Xuan Son) អនុរដ្ឋមន្ត្រីក្រសួងការបរទេសវៀតណាម បានចាកចេញពីបន្ទប់ប្រជុំដោយរហ័ស និងមិនឆ្លើយតបនឹងសំណួររបស់អ្នកសារព័ត៌មាន។ លោកបានឆ្លើយថាលោកប្រញ៉ាប់ឡើងយន្តហោះត្រឡប់ទៅវិញ។
ដូចគ្នាដែរ លោក វ៉ា គឹមហុង សហប្រធានគណៈកម្មការចម្រុះកិច្ចការព្រំដែនកម្ពុជាវៀតណាមព្យាយាមមិនឆ្លើយនឹងសំណួររបស់អ្នកសារព័ត៌មានទាក់ទិននឹងលទ្ធផលនៃកិច្ចប្រជុំនិងការសម្រេចរបស់ភាគីទាំងពីរលើបញ្ហាបោះបង្គោលព្រំដែនជាដើម ដោយសំអាងថាអ្វីៗបានបញ្ជាក់នៅក្នុងសេចក្តីប្រកាសព័ត៌មានដែលចែកជូនក្រុមអ្នកយកព័ត៌មានរួចហើយ។
«វាមាននៅក្នុងសេចក្តីប្រកាសព័ត៌មាន ខ្ញុំបានប្រកាសនៅក្នុងសេចក្ដីប្រកាសព័ត៌មានរួចហើយបាទ»។
យោងតាមសេចក្ដីប្រកាសព័ត៌មាន ដែលមានជាងកន្លះទំព័របានឲ្យដឹងថា៖ «ភាគីទាំងពីរបានទទួលស្គាល់ការងារខណ្ឌសីមានិងបោះបង្គោលព្រំដែនគោកនៃប្រទេសទាំងពីរមានភាពស្មុគស្មាញច្រើន» តែបានសម្រេចចំនួន៨៥% រួចហើយ ហើយភាគីទាំងពីរនឹងបន្តព្យាយាមបញ្ចប់ឲ្យបានឆាប់ៗ។ ក្នុងនោះក៏មានការប្តេជ្ញា បន្តអនុវត្ត «សេចក្តីប្រកាសព័ត៌មានរួម ចុះថ្ងៃទី១៧ ខែមករាឆ្នាំ១៩៩៥ស្តីពីការរក្សាស្ថានភាពបច្ចុប្បន្ននៅតាមបណ្តោយព្រំដែន»។
យោងតាមកថាខណ្ឌទីបួនឬចុងក្រោយនៃសេចក្តីប្រកាសព័ត៌មាននេះ ក៏ បានឲ្យដឹងផងដែរថាភាគីទាំងពីរនិងអាជ្ញាធរដែលពាក់ព័ន្ធនាបណ្តាខេត្តតាមព្រំដែនត្រូវ «សហការគ្នាដោះស្រាយឲ្យមានប្រសិទ្ធភាពរាល់បាតុភាពដែលកើតមានឡើងនៅតាមបណ្ដោយព្រំដែន ដើម្បីទប់ស្កាត់និងបញ្ចៀសការរីករាលដាលដែលនាំឲ្យប៉ះពាល់ដល់ទំនាក់ទំនងល្អនៃប្រទេសទាំងពីរ»។
ក្នុងពេលថ្មីៗនេះបញ្ហាព្រំដែនកម្ពុជាវៀតណាមបានឡើងកំដៅសារជាថ្មីបន្ទាប់ពីវៀតណាមបានជីកស្រះតាមបណ្តោយព្រំដែនកម្ពុជានាខេត្តរតនគិរីនិងសាងសង់ប៉ុស្តិ៍យោធានៅជាប់ព្រំដែនខេត្តកណ្តាល ដែលជាចំណុចមិនទាន់មានការឯកភាពគ្នានោះ។
កាលពីចុងខែមិថុនាកន្លងទៅ យ៉ាងហោចណាស់មានមនុស្សចំនួន១០នាក់បានរងរបួសបន្ទាប់ពីមានការប៉ះទង្គិចគ្នារវាងក្រុមសកម្មជនព្រំដែនដែលដឹកនាំដោយអ្នកតំណាងរាស្ត្រមកពីគណបក្សសង្គ្រោះជាតិដែលបានព្យាយាមទៅពិនិត្យមើលចំណុចព្រំដែនដែលសង្ស័យថាមានភាពមិនប្រក្រតីនោះ ប៉ុន្តែត្រូវបានរារាំងដោយឆ្មាំព្រំដែននិងពលរដ្ឋវៀតណាមប្រដាប់ដោយដំបងនិងអាវុធអាការ៕
