ភ្នាក់ងារប៉ូលិសថៃនិយាយថា អ្នកជួញដូរសត្វព្រៃជាប់សង្ស័យម្នាក់ដែលត្រូវបានគេឃាត់ខ្លួននៅព្រលានយន្តហោះកាលពីខែមុនបានបង់ប្រាក់ធានា និងរត់គេចចេញពីប្រទេសថៃហើយ។ ក្នុងវ៉ាលិសរបស់គាត់ គាត់បានលាក់សត្វព្រៃនៅរស់ជាច្រើនក្បាលដែលជាប្រភេទសត្វកម្រស្ទើរតែផុតពូជ។ សកម្មជនទប់ស្កាត់ការ ជួញដូរសត្វព្រៃបានលើកឡើងពីភាពលំបាកក្នុងការទប់ស្កាត់ជនល្មើសដែលមានទំនាក់ទំនងជាមួយអ្នកនយោបាយ។
នៅពេលដែលប៉ូលិសថៃឃាត់ខ្លួន លោក Noor Mahmood នាខែឧសភានៅព្រលានយន្តហោះសុវណ្ណភូមិនាទីក្រុងបាងកក ពួកគេបានរកឃើញថា គាត់លាក់សត្វជិតផុតពូជនៅក្នុងវ៉ាលិសរបស់គាត់។ គេឃើញប្រភេទមានសត្វនេះក្នុងសួនសត្វប៉ុណ្ណោះ។
មានកូនខ្លារខិនបួន កូនខ្លាឃ្មុំមួយ ស្វាមួយ និងទោចថ្ពាល់ក្រហមមួយលាក់ក្នុងកេសជាច្រើនយ៉ាងស្ងប់ស្ងាត់។
ករណីនេះបង្ហាញពីជោគជ័យយ៉ាងសម្បើមរបស់មន្រ្តីមានសមត្ថកិច្ចក្នុងការ ប្រឆាំងនឹងការជួញដូរសត្វព្រៃនៅប្រទេសថៃ ប៉ុន្តែជោគជ័យនោះមិនមានស្ថេរភាពទេ។
លោក Mahmood ជាប្រជាពលរដ្ឋអារ៉ាប់រួម Emirates។ គាត់ត្រូវបានដោះលែងដោយបង់ប្រាក់ធានា៦,៦០០ដុល្លារសហរដ្ឋមេរិក ហើយកំពុងរង់ចាំថ្ងៃឡើងតុលាការ។ ប៉ុន្តែប៉ូលិសបាននិយាយថា ទោះបីគាត់ជាប់ចោទក៏ដោយប៉ូលិសដឹងថា គាត់ត្រូវបានគេផ្តល់លិខិតឆ្លងដែនវិញ និងអនុញ្ញាតឲ្យចាកចេញពីប្រទេសថៃ។
លោក Steven Galster ជាប្រធានមូលនិធិ Freeland ដែលជាអង្គការអន្តរជាតិធ្វើការប្រឆាំងនឹងការជួញដូរសត្វព្រៃ និងការជួញដូរមនុស្សមានទីតាំងនៅទីក្រុងបាងកក។ លោកមានប្រសាសន៍ថា ដោយសារតែគាត់មានទំនាក់ទំនងជាមួយអ្នកនយោបាយ ទើបបានជាលោក Mahmood អាចរត់គេចខ្លួនបាន។ រឿងនេះគឺជាការចំអកដល់ការខិតខំប្រឹងប្រែងធ្វើការរបស់អង្គភាពសម្ងាត់។
«ក្នុងអំឡុងសប្តាហ៍នោះ គាត់ត្រូវបានជួយពីសំណាក់ស្ថានទូតអារ៉ាប់រួម Emirates និងអ្នកនយោបាយថៃ និងប្រហែលជាមន្រ្តីផ្សេងទៀតដែលជាខ្សែរយៈរបស់គាត់នៅក្រៅអង្គភាព។ ពួកគេទាំងនោះយកលិខិតឆ្លងដែនឲ្យគាត់។ ហើយ គាត់បានត្រឡប់ទៅវិញ ដោយជិះយន្តហោះមួយយ៉ាងស្ងាត់ និងបានបង់ប្រាក់ធានា ព្រមទាំងចេញពីប្រទេសនេះ។ ដូច្នេះយើងមិនសប្បាយចិត្តទេ»។
អ្នកនាំពាក្យស្ថានទូតអារ៉ាប់រួម Emirates ទទួលស្គាល់ថា មន្រ្តីជាច្រើនបានជួយយកលិខិតឆ្លងដែនឲ្យលោក Mahmood វិញ ប៉ុនែ្តវាគឺជាការអនុវត្តតាមបទដ្ឋាន នៅពេលមានប្រជាពលរដ្ឋត្រូវគេឃាត់ខ្លួន។ មន្ត្រីជាច្រើននៅស្ថានទូតនោះ និង ក្រសួងការបរទេសប្រទេសអារ៉ាប់រួមនៅទីក្រុង Abu Dubai បានបដិសេធមិនធ្វើអត្ថាធិប្បាយអំពីការចោទប្រកាន់ដែលថាមន្រ្តីការទូតដើរតួយ៉ាងសំខាន់ក្នុងការជួយ Mahmood ឲ្យរត់គេចចេញពីប្រទេសថៃទេ។
លោកវរសេនីយ៍ទោ Thammawat ធ្វើការក្នុងផ្នែកអភិរក្សធនធានធម្មជាតិ និង បរិដ្ឋានជាតិ ដែលជាអង្គភាពធ្វើការឃាត់ខ្លួនលោកMahwood។ លោកមានប្រសាសន៍ថា លោក Mahmood គឺជាមនុស្សក្នុងចំណោមអ្នកមាន និងក្រុមអ្នកជួញដូរដែលមានទំនាក់ទំនងជាមួយអ្នកនយោបាយ។ ក្រុមនេះកំពុងស្ថិតក្រោមការស៊ើបអង្កេត។ លោកមានប្រសាសន៍ថា មន្រ្តីការទូតក៏កំពុងស្ថិតក្រោមការស៊ើបអង្កេតផងដែរ ប៉ុន្តែ លោកមិនបញ្ចេញសញ្ជាតិរបស់ជនបរទេសទាំងនោះទេ។
លោក Thammawat បានឲ្យដឹងថា ក្នុងពេលធ្វើប្រតិបត្តិការចាប់ខ្លួនលោកMahmood នោះ ពួកគេបានឃ្លាំមើលគាត់យ៉ាងដិតដល់ នៅពេលដែលគាត់ឆ្លងកាត់ដំណើរការត្រួតពិនិត្យនានារបស់ព្រលានយន្តហោះ។ ពេលនោះគាត់អត់មានកាន់វ៉ាលិសដែលមានសត្វព្រៃនោះទេ រហូតដល់ពេលគាត់ដើរឆ្លងកាត់ខាងផ្នែកអន្តោប្រវេសន៍។ គាត់និយាយថា លោក Mahmood ប្រាកដជាមានគេជួយគាត់យកសត្វទាំងនោះឆ្លងកាត់សន្តិសុខក្នុងព្រលាននេះ។
«តើនរណាជួយគាត់? ខ្ញុំមិនដឹងទេ។ ឥឡូវនេះ ខ្ញុំមិនទាន់ដឹងទេថា នរណាជួយយកវ៉ាលិសទាំងពីររបស់គាត់ដើរឆ្លងកាត់កាំរស្មី X នោះទេ។ តើអ្នកដឹងទេថា គាត់ទទួលយកអីវ៉ាន់នោះនៅកន្លែងណាមួយ បន្ទាប់ពីឆ្លងផុតការឆែកកាំរស្មី X និងឆ្លងផុតពីផ្នែកអន្តោប្រវេសន៍»។
លោក Thammawat មានប្រសាសន៍ថា ពួកគេកំពុងតែរង់ចាំវីដេអូសន្តិសុខពីសមត្ថកិច្ចនៅព្រលានយន្តហោះ ក្នុងថ្ងៃដែលគាត់ត្រូវឃាត់ខ្លួន។ វីដេអូនេះអាចបង្ហាញពីវិធីដែលអីវ៉ាន់ទាំងនោះអាចឆ្លងកាត់សន្តិសុខបាន។
លោកក៏បានឲ្យដឹងផងដែរថា លោក Mahmood បានធ្វើដំណើរដោយទិញសំបុត្រ ដែលមានតម្លៃលំដាប់ទីមួយ ហើយមានអ្នកចូលដៃយ៉ាងតិចម្នាក់ ដែលជួយឲ្យគាត់គេចចូលទៅក្នុងយន្តហោះ Emirates។ លោកនិយាយផងដែរថា ក្រុមហ៊ុនអាកាសចរណ៍នោះបដិសេធមិនព្រមផ្តល់ឈ្មោះអ្នកដំណើរទាំងនោះទេ។
ប៉ូលិសនិយាយថា ពេលប៉ូលិសចាប់ខ្លួនគាត់ លោក Mahmood បានបង្ហាញរូបថតដែលគាត់ថតជាមួយអតីតនាយករដ្ឋមន្រ្តី Thaksin Shinawatra ក្នុងទូរស័ព្ទដៃរបស់គាត់ ប្រហែលជាចង់បង្ហាញពីអ្នកមានអំណាចដែលគាត់ស្គាល់។
លោក Thaksin ត្រូវបានទម្លាក់ពីតំណែងដោយរដ្ឋប្រហារយោធា នៅក្នុងឆ្នាំ ២០០៦ ហើយលោកសព្វថ្ងៃកំពុងតែរស់នៅនិរទេសខ្លួននៅទីក្រុង Dubai ដើម្បីគេចពីការជាប់ពន្ធនាគារពីបទពុករលួយ។
លោក Galster និយាយថា ការដោះលែង លោក Mahmood បង្ហាញថា អ្នកមាន និងអ្នកមានឥទ្ធិពលនៅប្រទេសថៃ នៅតែអាចគេចផុតពីសំណាញ់ច្បាប់។ លោកនិយាយផងដែរថាទោះបីជាមានការឃាត់ខ្លួនអ្នកជួញដូរសត្វព្រៃរាប់រយនាក់ក្នុងប៉ុន្មានទសវត្សរ៍កន្លងមកនេះក៏ដោយ ក៏មានតែអ្នកជួញដូរម្នាក់ប៉ុណ្ណោះដែលត្រូវជាប់គុកថ្វីបើកម្រិតទោសមានរហូតដល់ជាប់ពន្ធនាគាររយៈពេល៤ឆ្នាំ ។
«ការដាក់ទោសនានាមានលក្ខណៈទន់ខ្សោយ។ លើកក្រោយបើគាត់អាចលក់សត្វព្រៃតែមួយក្បាល គាត់នឹងបានលុយ១០,០០០ដុល្លារសហរដ្ឋអាមេរិក។ គាត់ មានសត្វចំនួន៥ ទៅ៦ក្បាលក្នុងវ៉ាលិស។ ឥឡូវនេះការពិន័យជាអតិបរមាគឺមានចំនួន១២,០០០ ឬ ១៣,០០០ដុល្លារសហរដ្ឋអាមេរិកប៉ុណ្ណោះ។ ដូច្នេះ ដោយដឹងថា គេអាចរួចពីការជាប់គុកដូច្នេះគេហ៊ានប្រថុយនឹងគ្រោះថ្នាក់នេះ»។
លោក Galster និយាយថា សេចក្តីព្រៀងច្បាប់បង្កើនកម្រិតទោសប្រឆាំងនឹងការជួញដូរសត្វព្រៃបានធ្វើឡើងអស់រយៈពេល៨ឆ្នាំកន្លងមកហើយ ប៉ុន្តែអ្នកតំណាងរាស្រ្តថៃមិនទាន់បានពិភាក្សាដើម្បីដាក់ច្បាប់នេះឲ្យចូលជាធរមានទេ។ ដោយសារតែការដាក់ទោសមានកម្រិតទាប លោកមានប្រសាសន៍ថា ប្រទេសថៃនៅតែជាចំណុចកណ្តាលនៃការជួញដូរសត្វព្រៃនៅអាស៊ី។
មកត្រឹមនឹងថ្ងៃព្រហស្បតិ៍សប្តាហ៍នេះ ប៉ូលិសទប់ស្កាត់ការជួញដូរសត្វព្រៃមានករណីថ្មីមួយទៀតត្រូវស៊ើបអង្កេត។ មន្រ្តីគយថៃជាច្រើននិយាយថា មានសត្វព្រៃរាប់រយក្បាលត្រូវគេរកឃើញនៅក្នុងវ៉ាលិស ដែលគ្មានម្ចាស់ពីប្រទេសបង់ក្លាដេស ទុកចោលនៅព្រលានយន្តហោះទីក្រុងបាងកក។ សត្វមានជីវិតរួមមានប្រភេទអណ្តើក និងក្រពើទឹកសាប ដែលជាប្រភេទសត្វកម្រ និងជិតផុតពូជ។ សត្វទាំងនេះមានតម្លៃ ៣០០,០០០ដុល្លារ ដែលគយនិយាយថា សត្វទាំងនោះទំនងជាត្រូវគេគ្រោងបញ្ជូនទៅក្នុងទីផ្សារទីក្រុងបាងកក៕
ប្រែសម្រួលដោយ ហ៊ុយ សម្ផស្ស
