ចំនួនអ្នកស្លាប់ដោយសារការវាយប្រហារដោយគ្រាប់បែកអត្តឃាតនៅឯប៉ុស្តិ៍ត្រួតពិនិត្យដ៏មមាញឹកមួយនៅក្នុងរដ្ឋធានីម៉ូហ្គាឌីស្យូ (Mogadishu) របស់ប្រទេសសូម៉ាលី បានកើនឡើងដល់យ៉ាងហោចណាស់៨០នាក់និងមនុស្សជាង៩០នាក់ផ្សេងទៀតបានរងរបួស។
ប្រភពពីប៉ូលិសនិងមន្ត្រីពេទ្យបាននិយាយថា នេះគឺជាឧបទ្ទវហេតុដ៏សាហាវបំផុតដែលបានវាយប្រហាររដ្ឋធានីនេះក្នុងរយៈពេលប៉ុន្មានខែមកនេះ។
រថយន្តផ្ទុកជាតិផ្ទុះបានផ្ទុះនៅកណ្តាលប៉ុស្តិ៍ត្រួតពិនិត្យមួយនៅលើផ្លូវឆ្ពោះទៅស្រុក Afgoye ក្នុងខេត្ត Lower Shabelle។
ប៉ុស្តិ៍ត្រួតពិនិត្យឈ្មោះ Ex-Control នេះគឺជាប៉ុស្តិ៍មួយក្នុងចំណោមប៉ុស្តិ៍ប្រមូលពន្ធលើផ្លូវធំៗនៅក្នុងរដ្ឋធានីម៉ូហ្គាឌីស្យូ។ មន្ត្រីរដ្ឋាភិបាលបាននិយាយថា រថយន្តនិងរ៉ឺម៉កដឹកអ្នកដំណើរជិត១០០គ្រឿងកំពុងតម្រង់ជួរនៅចំណុចត្រួតពិនិត្យសន្តិសុខជាប្រចាំនៅពេលមានការផ្ទុះនោះ។
គេអាចមើលឃើញផ្សែងខ្មៅជាច្រើននៅខាងលើរដ្ឋធានី ហើយសំឡេងផ្ទុះនេះបានលាន់ពាសពេញទីក្រុងដែលធ្វើឱ្យវាជាការផ្ទុះគ្រាប់ខ្លាំងនិងគ្រោះថ្នាក់បំផុតនៅម៉ូហ្គាឌីស្យូ។
សាក្សីបានរៀបរាប់ទិដ្ឋភាពដ៏រន្ធត់អំពីសាកសពដែលហូរឈាមនៅកន្លែងត្រួតពិនិត្យនិងនៅកន្លែងជុំវិញ។ អ្នករងរបួសស្រែកហៅឲ្យអ្នកជួយសង្គ្រោះទាញពួកគេចេញពីក្រោមយានយន្តជាច្រើនដែលខូចខ្ទេចខ្ទីដោយសារការផ្ទុះ។
មន្ត្រីប៉ូលិសសូម៉ាលីជាច្រើននាក់ដែលប្រចាំការនៅប៉ុស្តិ៍ឆែកឆេរនោះនិងជនជាតិតួកគីពីរនាក់បងប្អូនដែលធ្វើការឱ្យក្រុមហ៊ុនសាងសង់ផ្លូវក៏បានស្លាប់ដែរ៕
