ចំណាត់ការរបស់អូស្រ្តាលីលើពួកអ្នកស្វះស្វែងសុំសិទ្ធិជ្រកកោននៅក្រោមនយោបាយតម្រូវឃុំឃាំង ដ៏តឹងរ៉ឹងរបស់ខ្លួន បានទទួលរងនូវការរិះគន់ពីតំណាងអង្គការសហប្រជាជាតិនាំមុខម្នាក់។ នៅពេលបញ្ចប់ដំណើរបំពេញទស្សនកិច្ចរយៈពេលប្រាំមួយថ្ងៃលោកស្រី ណាវីពីឡៃ (Navi Pillay) អគ្គស្នងការជាន់ខ្ពស់ទទួលបន្ទុកសិទ្ធិមនុស្សរបស់អង្គការសហប្រជាជាតិនិយាយថា នយោបាយនេះជាការរំលោភកាតព្វកិច្ចសិទ្ធិមនុស្សអន្តរជាតិរបស់អូស្រ្តាលី។ លោកស្រីក៏ព្រមានដែរថាផែនការរបស់រដ្ឋាភិបាលទីក្រុងកាន់ប៊ែរ៉ា(Canberra) បញ្ជូនពួកអ្នកសុំសិទ្ធិជ្រកកោន៨រយនាក់ទៅកាន់ប្រទេសម៉ាឡេស៊ីប្រហែលជារំលោភច្បាប់ជនភៀសខ្លួន។
ក្នុងអម្លុងពេលនៃដំណើរបំពេញទស្សនកិច្ចរយៈពេលខ្លីរបស់លោកស្រីទៅកាន់ប្រទេសអូស្រ្តាលី អគ្គស្នងការជាន់ខ្ពស់របស់អង្គការសហប្រជាជាតិ រូនបនេះបានចំណាយពេលនៅមជ្ឈមណ្ឌលឃុំឃាំងអន្តោប្រវេសន៏២កន្លែងក្នុងទីក្រុង ដារវិន (Darwin) ភាគខាងជើង។
លោកស្រី ណាវីពីឡៃមានប្រសាសន៏ថាលោកស្រីបានឃើញអ្វីដែលលោកស្រី ហៅថាការខូចទឹកចិត្តរបស់អ្នកស្វះស្វែងសុំសិទ្ធិជ្រកកោនដែលបានចំណាយពេលរាប់សិបខែរង់ចាំឲ្យគេដោះលែង។
មន្រ្តីជាន់ខ្ពស់របស់អង្គការសហប្រជាជាតិរូបនេះដែលត្រូវបានអញ្ជើញដោយរដ្ឋាភិបាលក៏បានរិះគន់ផែនការរបស់អូស្រ្តាលីដើម្បីបញ្ជូនអ្នកសុំសិទ្ធិជ្រកកោនរាប់រយនាក់ទៅកាន់ប្រទេសម៉ាឡេស៊ីដើម្បីបន្ធូរបន្ថយសម្ពាធនៅជំរំឃុំឃាំងដែលមានមនុស្សច្រើនលើសលុបហើយនឹងព្យាយាមបញ្ឈប់ការហូរចូលជាប្រចាំរបស់មនុស្សធ្វើដំណើរតាមទូក។ ក្រុមរដ្ឋមន្រ្តី និយាយថាកិច្ចព្រមព្រៀងដែលប្រទេសម៉ាឡេស៊ីនឹងបញ្ជូនជនភៀសខ្លួនរយៈពេលវែងឆ្ងាយចំនួន៤ពាន់នាក់ទៅកាន់ប្រទេសអូស្រ្តាលីដែលការទាមទារទទួលសិទ្ធិការពាររបស់ពួកគេបានត្រូវអនុម័តហើយនោះ នឹងបង្អាក់សកម្មភាពនានារបស់អ្នកជួញដូរមនុស្ស។ សេចក្តីសង្ឃឹមគឺថា ការបដិសេធឱកាសរបស់ពួកជនអន្ធពាលដើម្បីយកប្រាក់ពីអ្នកធ្វើដំណើរទៅកាន់ប្រទេសអូស្រ្តាលីនឹងធ្វើឲ្យពួកគេអស់ប្រាក់ចំណូល។
ទោះជាយ៉ាងណាក៏ដោយ លោកស្រី ណាវីពីឡៃ ជឿជាក់ថាផែនការនេះខុសច្បាប់។
«ប្រសិនបើ អូស្រ្តាលីប្រាកដជាគិតគូរពីការបញ្ជូនមនុស្ស៨រយនាក់ទៅប្រទេសម៉ាឡេស៊ី ខ្ញុំគិតថាអូស្ត្រាលីរំលោភច្បាប់ជនភៀសខ្លួន។ ពួកគេមិនអាចបញ្ជូនក្រុមមនុស្សទាំងនោះទៅកាន់ប្រទេសមួយដែលមិនបានអនុម័តលើអនុសញ្ញាហាមប្រាមការធ្វើទារុណកម្ម ឬអនុសញ្ញាស្តីពីជនភៀសខ្លួននោះទេ។ ដូច្នេះ មិនមានការការពារបុគ្គលក្នុងប្រទេសម៉ាឡេស៊ីទេ។ ហើយ ប្រទេសអូស្ត្រាលី ដែលលើកស្ទួយបទដ្ឋានអន្តរជាតិ មិនគួរសហការជាមួយផែនការទាំងនេះទេ»។
លោកស្រី ពីឡៃ បាននិយាយពីអ្វីដែលលោកស្រីបានពណ៌នាថាជាការពិភាក្សាដោយស្មោះត្រង់ស្តីពីផែនការម៉ាឡេស៊ីជាមួយលោក ខេវិន រ៉ឹដ(Kevin Rudd) រដ្ឋមន្រ្តីក្រសួងការបរទេសអូស្រ្តាលី។
ការហូរចូលនៃមនុស្សធ្វើដំណើរតាមទូកទៅដល់ដែនទឹកដាច់ស្រយាលភាគខាងជើងប្រទេសអូស្ត្រាលីបានក្លាយជាបញ្ហាក្តៅក្រហាយដ៏ខ្លាំងដល់រដ្ឋាភិបាលដែលដឹកនាំដោយគណៈបក្សការងារ។ រដ្ឋាភិបាលនោះកំពុងប្រយុទ្ធជាមួយការចោទប្រកាន់មកពីគណៈបក្សប្រឆាំងដែលខ្លួនបានបាត់បង់ការត្រួតត្រាព្រំដែនរបស់ប្រទេសអូស្ត្រាលី ជាបញ្ហាដែលឮសូរខ្ទរខ្ទារដល់ពួកអ្នកបោះឆ្នោតជាច្រើន។
លោកស្រីអគ្គស្នងការជាន់ខ្ពស់ទទួលបន្ទុកជនភៀសខ្លួនរបស់អង្គការសហប្រជាជាតិក៏បានទៅទស្សនាសហគមន៍របស់អ្នកស្រុកដើមក្នុងតំបន់យ៉ារ៉ាបាហ៍ (Yarrabah) នៅខាងក្រៅតំបន់ ខេនស៍(Cairns) ក្នុងរដ្ឋ ឃ្វីនស៍ឡែនដ៍ (Queensland) ដែរ។ លោកស្រីមានប្រសាសន៍ថាទោះបីអូស្រ្តាលី មានប្រវត្តិគាំទ្រសិទ្ធិមនុស្សយ៉ាងរឹងប៉ឹងក៏ដោយចំណាត់ការរបស់ខ្លួនទៅលើជនជាតិដើមរបស់ខ្លួន មិនបានល្អទេ។
លោកស្រី ពីឡៃ មានប្រសាសន៍បន្តទៀតថា កិច្ចខិតខំប្រឹងប្រែងដើម្បីជួយមនុស្សក្រីក្រកំពុងធ្វើឲ្យអន្តរាយដល់នយោបាយដែលមិនបានទទួលស្គាល់សិទ្ធិដល់ការសម្រេចដោយខ្លួនឯងសម្រាប់ជនជាតិដើមរបស់អូស្រ្តាលី។
ជនជាតិដើមមានប្រហែលជាពីរភាគរយនៃប្រជាពលរដ្ឋទាំងមូលក៏ប៉ុន្តពួកគេមានអត្រាអ្នកឈឺច្រើន អ្នកជាប់ក្នុងមន្ទីរឃុំឃាំងហើយនឹងអ្នកអត់ការងារធ្វើ។
ដោយជឹង ប៉ូជីន
