លោកសម រង្ស៊ីប្រធានស្តីទីគណបក្សសង្គ្រោះជាតិបានប្រាប់ដល់អ្នកគាំទ្រនៅតំបន់រដ្ឋធានីវ៉ាស៊ីនតោន សហរដ្ឋអាមេរិកឱ្យរក្សាភាពស្ងៀមស្ងាត់សិននិងគ្រាន់តែធ្វើសកម្មភាពការទូតខ្លះៗប៉ុណ្ណោះដោយត្រូវរង់ចាំតាមដានមើលលទ្ធផលនៃវិធានការទណ្ឌកម្មរបស់សហគមន៍អន្តរជាតិដែលលោករំពឹងថានឹងដាក់សម្ពាធបន្ថែមមកលើរដ្ឋាភិបាលកម្ពុជា។
នៅក្នុងពិធីសំណេះសំណាលមួយកាលពីយប់ថ្ងៃព្រហស្បតិ៍នៅទីក្រុងហ្វលឈឺច (Falls Church) រដ្ឋវីជីនៀ លោកសម រង្ស៊ីបានថ្លែងថា៖
«ក្នុងរយៈពេលហ្នឹងដែលគេកំពុងតែរៀបចំអនុវត្តជាបណ្តើរៗវិធានការគាបសង្កត់ហ៊ុនសែនហ្នឹងតើយើងជាគណបក្សសង្គ្រោះជាតិយើងត្រូវធ្វើយ៉ាងម៉េច? តាមខ្ញុំយល់យើងកុំធ្វើអីរំខានអន្តរជាតិ។ អន្តរជាតិគេកំពុងតែវាយហ៊ុនសែន។ ហ៊ុនសែនត្រូវឆ្លើយតបជាមួយអន្តរជាតិ។ អន្តរជាតិគេមានមធ្យោបាយសំពងហ៊ុនសែន»។
រដ្ឋាភិបាលកម្ពុជាទើបតែបានបញ្ជូនរបាយការណ៍បំភ្លឺឱ្យទៅសហភាពអឺរ៉ុបកាលពីថ្ងៃទី១២ខែធ្នូ ពាក់ព័ន្ធនឹងការរកឃើញថាមានការរំលោភសិទ្ធិនយោបាយ សិទ្ធិពលរដ្ឋ និងសិទ្ធិសហជីពជាដើម។ សហភាពអឺរ៉ុបនឹងសម្រេចលើជោគវាសនានៃឋានៈអនុគ្រោះពន្ធ «គ្រប់មុខទំនិញលើកលែងសព្វាវុធ(EBA)» នៅថ្ងៃទី១២ខែកុម្ភៈឆ្នាំក្រោយ។ រីឯសហរដ្ឋអាមេរិកទើបតែបានដាក់ទណ្ឌកម្មមហាសេដ្ឋីខ្មែរមួយរូបគឺលោកទ្រី ភាព និងមន្ត្រីយោធាជាន់ខ្ពស់មួយរូបគឺលោកគន់ គីមព្រមទាំងក្រុមគ្រួសារដោយសារតែការរំលោភសិទ្ធិមនុស្សនិងការប្រព្រឹត្តិអំពើពុករលួយ។
លោក សម រង្ស៊ី បន្ថែមថាអ្វីដែលសហគមន៍អន្តរជាតិចង់បានគឺដូចគ្នានឹងគោលបំណងរបស់គណបក្សសង្គ្រោះជាតិដែរ គឺការស្តារលទ្ធិប្រជាធិបតេយ្យ និងសិទ្ធិមនុស្សនៅកម្ពុជាឡើងវិញដែលនឹងបើកឱ្យគណបក្សសង្គ្រោះជាតិដំណើរការជាថ្មីបន្ទាប់ពីត្រូវបានរំលាយដោយតុលាការកំពូលកាលពីចុងឆ្នាំ២០១៧។
គណបក្សប្រតិភូរបស់គណបក្សសង្គ្រោះជាតិដែលដឹកនាំដោយលោកសម រង្ស៊ី បានមករដ្ឋធានីវ៉ាស៊ីនតោននៅក្នុងសប្តាហ៍នេះដើម្បីជួបពិភាក្សាការងារជាមួយនឹងមន្ត្រីរដ្ឋាភិបាលសហរដ្ឋអាមេរិក សមាជិកព្រឹទ្ធសភានិងអ្នកតំណាងរាស្ត្រសហរដ្ឋអាមេរិកដើម្បីបញ្ចុះបញ្ចូលឱ្យនៅបន្តទាមទារស្តារលទ្ធិប្រជាធិបតេយ្យនៅកម្ពុជា ក្នុងនោះមានការជំរុញឱ្យព្រឹទ្ធសភាអនុម័តសេចក្តីស្នើច្បាប់ស្តីពីប្រជាធិបតេយ្យកម្ពុជា។
សេចក្តីស្នើច្បាប់នេះត្រូវបានសភាតំណាងរាស្ត្រសហរដ្ឋអាមេរិកអនុម័តជាឯកច្ឆ័នកាលពីពាក់កណ្តាលខែកក្កដាហើយត្រូវបានបញ្ជូនដល់ព្រឹទ្ធសភាកាលពីថ្ងៃទី១៦ខែកក្កដាប៉ុន្តែកំពុងជាប់គាំងនៅគណៈកម្មការទំនាក់ទំនងអន្តរជាតិ។
លោក សម រង្ស៊ីបានបញ្ជាក់ប្រាប់វីអូអេ ក្នុងកម្មវិធីពិភាក្សាកាលពីថ្ងៃព្រហស្បតិ៍ថា៖
«អីចឹងហើយបានខ្ញុំបានជួបនិងកំពុងតែជួបហើយនឹងជួបទៀតជាមួយសមាជិកព្រឹទ្ធសភាមួយចំនួនសុំឱ្យគេជំរុញច្បាប់ហ្នឹងឱ្យឆ្លងកាត់ព្រឹទ្ធសភារួចផុតទៅ។ ដូច្នេះបានទាំងរដ្ឋសភានិងព្រឹទ្ធសភាហើយចាំតែលោកប្រធានាធិបតីត្រាំចុះហត្ថលេខាឱ្យច្បាប់នេះចូលជាធរមានគឺពេលហ្នឹងមកដល់ហើយទណ្ឌកម្មនោះកាន់តែធ្ងន់ធ្ងរទៅៗដែលជាអ្នកដឹកនាំផ្តាច់ការពុករលួយជុំវិញហ៊ុនសែនសព្វថ្ងៃ»។
លោកសម រង្ស៊ីក៏បានស្នើឱ្យអ្នកគាំទ្របន្តតាមដានសំណុំរឿងលោកកឹម សុខាប្រធានគណបក្សសង្គ្រោះជាតិដែលតុលាការរាជធានីភ្នំពេញគ្រោងនឹងយកមកកាត់ក្តីនៅថ្ងៃទី១៥ខែមករាឆ្នាំ២០២០ពីបទក្បត់ជាតិដោយឃុបឃិតជាមួយនឹងសហរដ្ឋអាមេរិកដើម្បីផ្តួលរំលំរដ្ឋាភិបាលរបស់លោកនាយករដ្ឋមន្ត្រីហ៊ុនសែន។ ការណ៍នេះដោយសារតែលោកយល់ថាលោកកឹម សុខាគ្មានកំហុសទេហើយវាជាល្បិចរបស់លោកនាយករដ្ឋមន្ត្រីហ៊ុនសែនក្នុងការបំបែកលោកកឹមសុខាពីលោកសមរង្ស៊ី និងថ្នាក់ដឹកនាំមួយចំនួនទៀតដែលកំពុងត្រូវចោទប្រកាន់តែប៉ុណ្ណោះ។
លោក សម រង្ស៊ីបានបន្តថា៖
«បើចូលក្នុងច្រកហ្នឹងអាហ្នឹងយើងត្រូវកំណត់យុទ្ធសាស្រ្តយើងតាមហ្នឹងដែរ។ យើងអត់ទទួលយកបានទេ។ ហើយអន្តរជាតិខ្ញុំយល់ថាបើសិនជាយើងពន្យល់គេឱ្យច្បាស់ក៏គេអត់ទទួលយកបានដែរពីព្រោះអានេះឡប់ឡែតើស៍។ ឱ្យលោកកឹម សុខាតែម្នាក់ឯងរួចខ្លួនជាបុគ្គលប៉ុន្តែគណបក្សសង្គ្រោះជាតិអត់ ថ្នាក់ដឹកនាំគណបក្សសង្គ្រោះជាតិដទៃទៀតក៏អត់ មានន័យថានេះជាដំណោះស្រាយជាឡប់ឡែ»។
លោក ខេន គីវ ពលរដ្ឋខ្មែរ-អាមេរិកាំងម្នាក់ដែលមកពីរដ្ឋម៉ារីឡែនដែលបានមកស្តាប់ការថ្លែងសារនយោបាយរបស់លោកសមរង្ស៊ីយល់ស្របនឹងការណែនាំនេះ៖
«ខ្ញុំយល់ថាល្អពីព្រោះធ្វើអ្វីៗយោងទៅតាមកាលៈទេសៈសូម្បីតែរឿងគ្រួសាររឿងការរកស៊ីអ្វីៗផ្សេងឬក៏ធ្វើនយោបាយក្នុងរឿងនីមួយគឺយោងទៅតាមកាលៈទេសៈ»។
ពិធីសំណេះសំណាលនេះរៀបចំដោយសមាគមខ្មែរ-អាមេរិកាំងដើម្បីសិទ្ធិមនុស្សនិងលទ្ធិប្រជាធិបតេយ្យដែលមានមូលដ្ឋាននៅរដ្ឋធានីវ៉ាស៊ីនតោន។
អ្នកស្រីរ៉ានី លូស្សឹនស្គី អនុប្រធានសមាគមបានបញ្ជាក់ប្រាប់វីអូអេថាអ្នកស្រីចង់ឃើញគណបក្សសង្គ្រោះជាតិមានផែនការច្បាស់លាស់ក្នុងការអនុវត្តការងាររបស់ខ្លួនបើទោះបីជាមិនអាចលាតត្រដាងអស់ជាសាធារណៈក៏ដោយ៖
«បងចង់ឱ្យគណបក្សសង្គ្រោះជាតិមានផែនការយ៉ាងណាម៉េច បើទោះបីជាគាត់មិនអាចនិយាយបានក៏ដោយក៏បងសង្ឃឹមថាចេញទៅហេតុការណ៍ពិបាកយើងត្រូវធ្វើយ៉ាងម៉េច ហើយហេតុការណ៍ដែលលំបាកខ្លាំងទៀតយើងត្រូវធ្វើយ៉ាងម៉េច»។
ថ្នាក់ដឹកនាំគណបក្សសង្គ្រោះជាតិដែលនៅក្រៅប្រទេសនឹងជួបប្រជុំគ្នានៅថ្ងៃសុក្រនេះនៅទីក្រុងឡូវែលរដ្ឋម៉ាស្សាឈូសិត ដើម្បីពិនិត្យវាយតម្លៃលើដំណើរមាតុភូមិនិវត្តន៍របស់លោកសមរង្ស៊ីកាលពីថ្ងៃទី៩ខែវិច្ឆិកា និងលើកផែនការបន្ទាប់សម្រាប់អនុវត្តក្នុងពេលខាងមុខ។ នេះបើតាមការបញ្ជាក់របស់លោកប៉ែន សុកផល ប្រធានសាខាគណបក្សសង្គ្រោះជាតិប្រចាំរដ្ឋម៉ាស្សាឈូសិត។
លោកសម រង្ស៊ីក៏មានគម្រោងជួបអ្នកគាំទ្រនៅទីនោះនាថ្ងៃសៅរ៍និងនៅរដ្ឋកាលីហ្វញ៉ានៅថ្ងៃអាទិត្យផងដែរ៕
