ប្រទេសរុស្ស៊ីបានប្រាប់ឲ្យដឹងថា ខ្លួនបានបង្កើនការវាយប្រហារតាមអាកាសប្រឆាំងនឹងក្រុមជ្រុលនិយមរដ្ឋឥស្លាមនៅក្នុងការគាំទ្រកងទ័ពស៊ីរី ដែលបានកាន់កាប់ភូមិចំនួន២ នៅភាគខាងជើងទីក្រុង Hamaចាប់តាំងពីយប់ថ្ងៃសុក្រមក។
លោក Igor Konashenko អ្នកនាំពាក្យក្រសួងការពារជាតិរុស្ស៊ី ដែលបានថ្លែងទៅកាន់ក្រុមអ្នកយកព័ត៌មានរុស្ស៊ីកាលពីថ្ងៃសៅរ៍ បានភ្ជាប់ការកើនឡើងនូវការវាយប្រហារទៅនឹងការកើនឡើងយ៉ាងខ្លាំងនៃទីដៅនៅលើដី ដែលបានរកឃើញតាមការឈ្លបយកការណ៍តាមអាកាស និងផ្កាយរណប។
នៅរដ្ឋធានីវ៉ាស៊ីនតោន ក្រុមមន្រ្តីការពារជាតិអាមេរិកបានធ្វើសន្និសីទតាមវីដេអូមួយជាមួយសមភាគីរុស្ស៊ី ដែលជាការប្រឹងប្រែងមួយនៅក្នុងការធ្វើឲ្យប្រសើរឡើងនូវកិច្ចប្រតិបត្តិការហោះហើរដោយសុវត្ថិភាពនៅក្នុងដែនអាកាសដ៏មមារញឹកនោះ។ លោក Peter Cook អ្នកនាំពាក្យមន្ទីរបញ្ចកោណ បានពណ៌នាការពិភាក្សានោះថា ប្រកបដោយវិជ្ជាជីវៈ ហើយលោកបាននិយាយថា ក្រុមមន្រ្តីទាំងនោះបានផ្តោតលើទម្រង់ការសុវត្ថិភាពដែនអាកាសដ៏តូចចង្អៀតនេះ។
ក្រសួងការពារជាតិរុស្ស៊ីបានប្រើប្រាស់ភាសាប្រហាក់ប្រហែលគ្នា ដើម្បីពណ៌នាការពិភាក្សានេះ។ក្រុមមន្រ្តីអាមេរិកបានរិះគន់រុស្ស៊ីយ៉ាងខ្លាំង បន្ទាប់ពីរដ្ឋាភិបាលទីក្រុងម៉ូស្គូបានផ្តល់ការព្រមានមិនច្បាស់លាស់កាលពីថ្ងៃទី៣០ ខែកញ្ញា ប្រហែលមួយម៉ោងមុនពេលចាប់ផ្តើមការវាយប្រហារតាមអាកាសលើកដំបូងរបស់ខ្លួននៅខាងក្នុងប្រទេស៊ីរីនៅក្នុងការគាំទ្រប្រធានាធិបតី Basher al-Assad ដែលមានជម្លោះនោះ។
រដ្ឋាភិបាលទីក្រុងម៉ូស្គូបានអះអាងថា ការវាយប្រហារនោះកំពុងចាត់ទីដៅលើពួកជនសកម្មប្រយុទ្ធរដ្ឋឥស្លាមសំខាន់ៗ ក៏ប៉ុន្តែក្រុមឧទ្ទាមបាននិយាយថា ការវាយប្រហារភាគច្រើនកំពុងត្រូវចំតំបន់នានា ដែលមិនមានវត្តមានរបស់ក្រុមជ្រុលនិយមនោះ៕
