ជាមួយនឹងចំនួន៩៥ភាគរយនៃសន្លឹកឆ្នោតត្រូវបានរាប់ហើយនោះ គណបក្សរបស់លោកប្រធានាធិបតីតួកគី Recep Tayyip Erdogan កំពុងនាំមុខគេនៅក្នុងការបោះឆ្នោតសភាកាលពីថ្ងៃអាទិត្យ នៅក្រោយក្រុមអ្នកបោះឆ្នោតបានទៅកាន់ស្ថានីយបោះឆ្នោតជាលើកទីពីរក្នុងរយៈពេលប្រាំខែ។
គណបក្សបួនក្នុងបណ្តាគណបក្ស១៦ ដែលមានបេក្ខជនឈរឈ្មោះនឹងមានអាសនៈនៅក្នុងរដ្ឋសភា ដោយគណបក្សយុត្តិធម៌និងការអភិវឌ្ឍហៅកាត់ថា AKP ឈ្នះឆ្នោតបានសំឡេងលើសបន្តិចបន្តួច។
គណបក្សដែលគាំទ្រក្រុមឧទ្ទាម Kurde ហៅកាត់ថា HDP ដែលមានសន្លឹកឆ្នោតគាំទ្រតាមការតម្រូវ១០ភាគរយ និងគណបក្សប្រឆាំងពីរទៀតគឺគណបក្ស MHP និង CHP ក៏នឹងមានកៅអីនៅក្នុងសភាដែរ។
លោក Erdogan បានអំពាវនាវឱ្យមានការបោះឆ្នោតជាថ្មីនៅក្រោយគណបក្ស AKP បានបាត់បង់សំឡេងភាគច្រើននៅក្នុងអង្គការនីតិបញ្ញត្តិកាលពីខែមិថុនាជាលើកដំបូងក្នុងរយៈពេល១៣ឆ្នាំ ហើយលោកនាយករដ្ឋមន្ត្រី Ahmet Davutoglu គ្មានជោគជ័យក្នុងការបង្កើតក្រុមចម្រុះគ្រប់គ្រងមួយនៅក្នុងសភា។
មានអ្នកបោះឆ្នោតប្រមាណ៨៨ភាគរយបានទៅបោះឆ្នោតកាលពីថ្ងៃអាទិត្យគឺមាន១០ភាគរយច្រើនជាងការបោះឆ្នោតកាលពីខែមិថុនា។
ការបោះឆ្នោតនេះបានធ្វើឡើងនៅពេលដែលប្រទេសតួកគីមានបញ្ហាសេដ្ឋកិច្ចមានអំពើហិង្សាជាថ្មីរវាងរដ្ឋាភិបាលនឹងគណបក្សកម្មករ Kurdistan ហៅកាត់ថា PKK ដែលជាក្រុមមួយនៅក្រៅច្បាប់និងបានតស៊ូយូរមកហើយ ដើម្បីឱ្យមានស្វ័យភាពពីរដ្ឋាភិបាលក្រុង Ankara និងមានការវាយប្រហារភេរវកម្មមួយចំនួនដោយមានរួមបញ្ចូលទាំងការបំផ្ទុះគ្រាប់បែកពីរនៅក្នុងការដើរក្បួនសន្តិភាពមួយកាលពីខែមុនមុននេះ ដែលបានបណ្តាលឱ្យមនុស្ស១៣០នាក់បាត់បង់ជីវិត៕
