ក្រុមអ្នកនិយមកំណែទម្រង់ហាក់ដូចជាបានចំណេញច្រើននៅក្នុងការបោះឆ្នោតក្នុងប្រទេសអ៊ីរ៉ង់ដោយលទ្ធផលដំបូងៗកាលពីថ្ងៃអាទិត្យបានបង្ហាញថា ក្រុមអ្នកនិយមកំណែទម្រង់ដែលគាំទ្រដល់ការទាក់ទងជាមួយពួកបស្ចឹមប្រទេសនឹងឈ្នះអាសនៈទាំងអស់៣០នៅក្នុងក្រុងតេរ៉ង់។
គេរំពឹងថានឹងដឹងលទ្ធផលចុងក្រោយបង្អស់នៃការបោះឆ្នោតកាលពីថ្ងៃសុក្រនៅថ្ងៃច័ន្ទនេះ។
លោកប្រធានាធិបតីអ៊ីរ៉ង់ Hassan Rouhani និងលោកអតីតប្រធានាធិបតី Akbar Hashemi Rafsanjani ក៏នាំមុខគេនៅក្នុងការប្រកួតប្រជែងដើម្បីសមាជិកភាពនៅក្នុងសន្និបាតក្រុមអ្នកជំនាញការដែរ។ អង្គការមានឥទ្ធិពលនេះឃ្លាំមើលការងាររបស់មេដឹកនាំកំពូល Ayatollah Ali Khamenei ដែលជាអ្នកសម្រេចចុងក្រោយបង្អស់អំពីគោលនយោបាយការបរទេសនៃប្រទេសអ៊ីរ៉ង់ និងអាចជ្រើសរើសមេដឹកនាំកំពូលលើកក្រោយផងដែរ។
លទ្ធផលមិនទាន់ចប់សព្វគ្រប់បង្ហាញថា ក្រុមអ្នកនិយមជ្រុលទទួលបរាជ័យច្រើនក្រាស់ក្រែលនៅក្នុងអង្គការនីតិបញ្ញត្តិមានកៅអី២៩០ ដែលគេស្គាល់ដែរថាជាសភាពិគ្រោះយោបល់ឥស្លាម។
កាលពីថ្ងៃសៅរ៍បណ្តាញផ្សាយព័ត៌មានជាផ្លូវការនៃប្រទេសអ៊ីរ៉ង់បានដកស្រង់ពាក្យសម្តីលោក Rouhani ដែលបានមានប្រសាសន៍ថា ការបោះឆ្នោតនេះបានផ្តល់ឲ្យរដ្ឋាភិបាលនូវការគួរជឿទុកចិត្តបានច្រើនជាងមុន និងឥទ្ធិពលច្រើនជាងមុនផងដែរ។
ទីភ្នាក់ងារព័ត៌មានផ្លូវការ IRNA នៃប្រទេសអ៊ីរ៉ង់បានដកស្រង់ពាក្យសម្តីលោក Rouhani ដែលបានមានប្រសាសន៍ថា «ការប្រកួតប្រជែងគ្នាបានចប់ហើយ។ដល់ពេលត្រូវបើកជំពូកថ្មីមួយនៅក្នុងការអភិវឌ្ឍសេដ្ឋកិច្ចនៃប្រទេសអ៊ីរ៉ង់ដោយផ្អែកលើសមត្ថភាពក្នុងប្រទេសនិងឱកាសអន្តរជាតិ»៕
