គណៈកម្មាធិការអន្តរជាតិកាកបាទក្រហមនិយាយថា យន្តហោះទីមួយរបស់ខ្លួនដែលដឹកក្រុមបុគ្គលិកពេទ្យទៅកាន់ប្រទេសយេម៉ែន (Yemen) បានទៅដល់រដ្ឋធានីសាណាអា (Sana'a) ហើយ។
លោក Dominik Stillhart មន្ត្រីជាន់ខ្ពស់នៃអង្គការកាកបាទក្រហមបានកត់សម្គាល់ការទៅដល់នៃយន្តហោះនេះតាមទ្វិទធ័រ (Twitter) កាលពីថ្ងៃអង្គារហើយបាននិយាយថា ឱសថនិងបរិក្ខារពេទ្យដែលមានសេចក្តីត្រូវការជាបន្ទាន់នឹងទៅដល់តាមយន្តហោះនិងកប៉ាល់នៅពេលណាមានការអនុញ្ញាតឱ្យចូលទៅក្នុងប្រទេសយេម៉ែន។
កាលពីថ្ងៃចន្ទ អង្គការកាកបាទក្រហមបាននិយាយថា ខ្លួនមិនអាចប្រគល់ឱសថនិងបរិក្ខារពេទ្យរាប់តោនឱ្យប្រទេសយេម៉ែនបានទេ។ អង្គការនេះបាននិយាយថា ខ្លួនបានទទួលការយល់ព្រមពីប្រទេសអារ៉ាប៊ីសាអូឌីតហើយ ក៏ប៉ុន្តែ កង្វល់ខាងការហោះចូលទៅក្នុងប្រទេសនេះដែលហែកហួរដោយសារសង្គ្រាមបានពន្យាពេលដំណើរការនេះ។
ក្រុមអ្នកធ្វើការជួយសង្គ្រោះបានព្រមានអំពីស្ថានភាពធ្ងន់ធ្ងរនៅក្នុងប្រទេសក្រីក្រនេះដែលនៅទីនោះកងយន្តហោះប្រតិកម្មប្រយុទ្ធនៃក្រុមចម្រុះបានធ្វើការវាយប្រហារតាមអាកាសជិតពីរសប្តាហ៍មកហើយក្នុងសេចក្តីសង្ឃឹមថានឹងបញ្ឈប់ការជំរុលទៅមុខនៃពួកឧទ្ទាម Shi'ite Houthi ដែលបានវាយយកបានផ្នែកជាច្រើននៃប្រទេសយេម៉ែន។
នៅលើដី ពួកឧទ្ទាមបានប៉ះទង្គិចជាមួយកងកម្លាំងស្មោះត្រង់នឹងលោកប្រធានាធិបតី Abd-Rabbu Mansour Hadi ប្រធានាធិបតីនៃប្រទេសយេម៉ែន ដែលបានទទួលការគាំពីទ្រអន្តរជាតិ៕
