អ្នកតាមដានការវិវឌ្ឍនយោបាយនិងអ្នកនយោបាយកម្ពុជាយល់ថាការព្យាយាមផ្លាស់ប្តូរនាពេលថ្មីៗនេះរបស់គណបក្សកាន់អំណាចបានផ្តល់ផលវិជ្ជមានដល់ប្រជាពលរដ្ឋកម្ពុជា ជាពិសេសក្នុងពេលដែលគណបក្សប្រជាជនកម្ពុជាត្រៀមខ្លួនចូលរួមក្នុងការប្រកួតប្រជែងការបោះឆ្នោតឃុំ-សង្កាត់នាឆ្នាំ២០១៧ខាងមុខ។
គណបក្សប្រជាជនកម្ពុជារបស់លោកនាយករដ្ឋមន្ត្រីហ៊ុន សែនបានធ្វើកិច្ចការមួយចំនួន រួមមាន ការពន្យាពេលការផាកពិន័យលើម្ចាស់យានយន្ត ដែលគ្មានប័ណ្ណបើកបរនិងការបញ្ឈប់ការយកកម្រៃផ្លូវមួយចំនួនក្នុងរាជធានីភ្នំពេញ រួមទាំងផ្លូវជាតិលេខ៤ផងដែរ នាព្រឹកថ្ងៃពុធនេះ។
នៅក្នុងអង្គសន្និបាត របស់គណបក្សប្រជាជនកម្ពុជាដែលកាន់អំណាចជាង៣៥ឆ្នាំ ក៏បានទទួលស្គាល់ថាគណបក្សខ្លួនបានធ្វើការតស៊ូជាមួយនឹង«ក្រុមប្រឆាំង លើសមរភូមិនយោបាយ សតិអារម្មណ៍មានលក្ខណៈកាន់តែស្រួចស្រាល់ឡើង និងមានចរិតបដិបក្ខ» ចាប់តាំងពីការបោះឆ្នាំ ២០១៣មក ហើយគណៈកម្មាធិការកណ្តាល របស់បក្សកាន់អំណាចក៏បានជំរុញឲ្យមានការកែទម្រង់មួយចំនួនទាក់ទិននឹង គោលនយោបាយដីធ្លី ការកាប់បំផ្លាញព្រៃឈើ ការបញ្ចូលសមាជិកថ្មីរបស់ខ្លួនដើម្បីត្រៀមចូលរួមការបោះឆ្នោតឃុំ-សង្កាត់និងសាកលនាពេលខាងមុខផងដែរ។ លោក ហ៊ុន សែនក៏បានព្យាយាមប្រើប្រាស់បណ្តាញទំនាក់ទំនងសង្គម Facebook និងជំរុញឲ្យមន្ត្រីរបស់ខ្លួនគ្រប់ជាន់ថ្នាក់ប្រើប្រាស់ក្នុងការងាររបស់ខ្លួនផងដែរ។
លោក គង់ ភោគប្រធានវិទ្យាស្ថានកម្ពុជាសម្រាប់ការស្រាវជ្រាវផ្នែកយុទ្ធសាស្ត្របានយល់ថាការផ្លាស់ប្តូរទាំងនេះគឺ ជាអ្វីដែលគណបក្សកាន់អំណាចគួរតែធ្វើ ក្នុងការប្តូរ យុទ្ធសាស្ត្រឲ្យស្របតាមការចង់បានរបស់ប្រជាពលរដ្ឋ ដែលចង់បាន «មន្ត្រីមួយចំនួនដែលមានគំនិតថ្មី»។ ហើយការផ្លាស់ប្តូរនេះវាក៏អាច«ផ្តល់ផលប្រយោជន៍មួយចំនួនដល់ប្រជាពលរដ្ឋ» ផងដែរ។
«រាល់ការធ្វើកំណែទម្រង់ដែលមានផលប្រយោជន៍ជាវិជ្ជមានដល់ប្រជាពលរដ្ឋក៏ជាផលប្រយោជន៍ដល់គណបក្សកាន់អំណាចដូចគ្នា ហ្នឹងគឺជារឿងមួយ ដែលយើងទំាងអស់គ្នាបានដឹងរួចហើយ។ អញ្ចឹងបើសិនជាគោលនយោបាយរបស់គាត់ ការផ្លាស់ប្តូររបស់គាត់ វានាំទៅដល់ផលប្រយោជន៍របស់គាត់ ហ្នឹងជារឿងមួយដែលយើងរំពឹងទុកហើយ ថានឹងមានការកើនឡើងនៃការគាំទ្រដល់គណបក្សកាន់អំណាច។ រឿងមួយចំនួនគឺវាត្រូវការពេលដើម្បីទៅដោះស្រាយផងដែរ ឧទាហរណ៍ពាក់ព័ន្ធ ជាមួយរឿងលើដីសម្បទានយើងត្រូវធ្វើការសិក្សាឲ្យបានជាក់លាក់ដែរ ថាដកបានឬដកមិនបាន ពីព្រោះវាអាចប៉ះពាល់ទៅដល់ក្រុមហ៊ុនឯកជនដែរ។ រដ្ឋាភិបាលគឺត្រូវប្រយ័ត្នប្រយែងទៅលើរឿងហ្នឹងដែរ»។
លោក គង់ ភោគយល់ថាការកែទម្រង់យុទ្ធសាស្ត្រថ្មីរបស់គណបក្សកាន់អំណាច នេះគឺត្រូវការពេលវេលាមួយចំនួនមុនពេលដែលគេអាចឃើញពីលទ្ធផលនោះ ហើយវាក៏អាចនិងទទួលផលតិចតួចផងដែរ។
ក៏ប៉ុន្តែសម្រាប់ លោក អ៊ូ វីរៈ នាយកវេទិកាអនាគតដែលជាមជ្ឈមណ្ឌលស្រាវជ្រាវគោលនយោបាយក្នុងស្រុកមួយយល់ថា គោលនយោបាយយុទ្ធសាស្រ្តរបស់គណបក្សកាន់អំណាចគឺមិនមានអ្វីថ្មីទេ ហើយអ្វីដែលគួរឲ្យចាប់អារម្មណ៍នោះគឺគួរមានការផ្លាស់ប្តូរមន្ត្រីដែលអសកម្មនៅក្នុងគណៈរដ្ឋមន្ត្រីនិងការកែប្រែគោលនយោបាយសង្គមមួយដែលអាចផ្តល់ផលប្រយោជន៍ដល់ប្រជាពលរដ្ឋខ្មែរ។
លោកយល់ថាគោលនយោបាយថ្មី របស់គណបក្សកាន់អំណាចបានដាក់នៅក្នុងអង្គប្រជុំខ្លួនដែលបញ្ចប់កាលពីថ្ងៃអាទិត្យនេះឆ្លុះបញ្ចាំងពីការភ័យខ្លាចរបស់គណបក្សកាន់អំណាច។
«អត់មានន័យថាមានការកំណែទម្រង់នោះទេ ប៉ុន្តែមានន័យថាគណបក្សប្រជាជនភ័យខ្លួនជាងមុន មិនដូចកាលមុនជិះសេះលែងដៃ ទាំងស្រុង អត់ខ្វល់ អត់អីអញ្ចឹងណាស់ តែគ្រាន់តែថាឥឡូវគឺឲ្យខ្វល់ជាងមុន។ ក៏ប៉ុន្តែមិនមានអ្វីដែលដូរជារចនាសម្ព័ន្ធ ឬជាប្រព័ន្ធនោះទេ។ អ្វីដែលយើងចង់ឃើញដូរជាប្រព័ន្ធ គឺត្រូវការដូរបុគ្គលមួយចំនួននៅក្នុងថ្នាក់ដឹកនាំ ជាពិសេសគឺគណៈរដ្ឋមន្ត្រីតែម្តង ហើយហ្នឹង បន្ទាប់ពីហ្នឹងទៅគឺត្រូវមានគោលនយោបាយឬគម្រោងច្បាស់លាស់ដែលខុសពីឥឡូវ។ ឥឡូវនេះយើងមើល បរាជ័យនៅតុលាការយុត្តិធម៌ បរាជ័យរឿងដីធ្លី រឿងដីសម្បទានសេដ្ឋកិច្ច គ្រប់គ្រងមិនបានទេ បរាជ័យរឿងព្រៃឈើ សុទ្ធតែជារឿងគួឲ្យឈឺក្បាលបំផុត»។
យោងតាមយោងតាមឯកសារកម្រាស់ ៤៩ទំព័រ របស់គណបក្សប្រជាជនកម្ពុជាដែលត្រូវបានគេចែកចាយតាមរយៈ សារអេឡិកត្រូនិកឬEmail បានឲ្យដឹងថាគណបក្ស ប្រជាជនកម្ពុជារបស់លោកហ៊ុន សែនបានរៀបចំយុទ្ធសាស្ត្រថា្នក់ជាតិមួយដើម្បីពង្រឹងការអនុវត្តរបស់មន្ត្រីគណបក្សខ្លួន ទប់ទល់នឹងគណបក្សជំទាស់ក៏ដូចជាត្រៀមខ្លួនក្នុងការបោះឆ្នោតឃុំ-សង្កាត់នាខែឧសភាឆ្នាំ២០១៧ផងដែរ។ ក្នុងនោះដែរក៏មាន ការបញ្ចូលនិងបណ្តុះបណ្តាលក្រុមយុវជនមួយចំនួនដែលធ្វើឲ្យសមាជិកសរុបរបស់ខ្លួនកើនដល់ ៥,៤ លាននាក់ទូទាំងប្រទេស។
លោក សុខ ឦសាន អ្នកនាំពាក្យគណបក្សប្រជាជនកម្ពុជាបានទទួលស្គាល់ថាគណបក្សរបស់ខ្លួនបានត្រៀមបញ្ចូលសមាសភាពយុវជនមួយចំនួនសម្រាប់ឈរឈ្មោះក្នុងការបោះឆ្នោតឃុំ-សង្កាត់នាពេលខាងមុខ ក៏ប៉ុន្តែលោកមិនអាចប្រាប់ពីចំនួនជាក់លាក់នោះទេ។ លោកថាការផ្លាស់ប្តូរនេះមិនមានន័យថាគណបក្សកាន់អំណាចមាន «ការភ័យខ្លាចនោះទេ»ក៏ប៉ុន្តែជាការត្រៀមបេក្ខជនទៅជំនួសមន្ត្រីរបស់ខ្លួនដែលមានវ័យចំណាស់។
«គ្រាន់តែថាជំរុញ លើកទឹកចិត្តឲ្យមានការដាក់បេក្ខជនក្នុង បញ្ជីរាយនាមបោះឆ្នោត ក្រុមប្រឹក្សាឃុំសង្កាត់ឲ្យមានបញ្ចូលយុវជនទៅតាមសភាពការណ៍ជាក់ស្តែង ហើយមានសមាសភាពនារីឲ្យបានច្រើន។ មន្ត្រីរបស់យើងគឺចាស់ៗអស់ អញ្ចឹង ហើយគឺយើងត្រូវការអ្នកបន្តវេន»។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិដែលមានសំឡេងភាគតិចក្នុងរដ្ឋសភា បានសារទរចំពោះការផ្លាស់ប្តូរនិងការត្រៀមខ្លួនរបស់គណបក្សកាន់អំណាចដែលជាដៃគូប្រជែងរបស់ខ្លួនដោយសារតែវានឹងអាចផ្តល់ប្រយោជន៍ដល់ប្រជាពលរដ្ឋកម្ពុជាដែលជាម្ចាស់ឆ្នោតនោះ។ យ៉ាងណាក៏ដោយលោកក៏បានបញ្ជាក់ផងដែរថា៖
«ទេ!យើងខំធ្វើការងារយើង គេខំធ្វើការងារគេ។ គេរៀបចំបេក្ខជនយ៉ាងម៉េចហ្នឹងគឺជាសេចក្តីសម្រេចរបស់ គណបក្សនយោបាយ ប៉ុន្តែចំពោះយើង យើងក៏មានសកម្មភាពរបស់យើងដែលធ្វើទៅដើម្បីឈានទៅបោះឆ្នោត ដើម្បីទាញការគាំទ្រពីប្រជាពលរដ្ឋ។ ហើយជាពិសេសទៀត ពីមួយថ្ងៃទៅមួយថ្ងៃយើងខិតខំ ចម្រាញ់យកធនធានមនុស្សដ៏ល្អ ដែលមានប្រជាប្រិយភាព ដែលប្រជាជនគាំទ្រ ដែលមានសមត្ថភាព អាចនឹងដឹកនំាឃុំ-សង្កាត់ដើម្បីបម្រើប្រជារាស្ត្រនិងប្រទេសជាតិ»។
ការបោះឆ្នោតជាតិក្នុងខែកក្កដាឆ្នាំ២០១៣កន្លងទៅបានធ្វើឲ្យគណបក្សសង្គ្រោះជាតិទទួលអាសនៈសភាកើនឡើងដល់ទៅចំនួន ៥៥ ខណៈពេល គណបក្សប្រជាជនកម្ពុជាដែលជាគណបក្សកាន់អំណាចរបស់លោក ហ៊ុន សែន បានធ្លាក់មកចំនួន ៦៨ អាសនៈ។ អ្នកឃ្លាំមើលការបោះឆ្នោតនិងការវិវឌ្ឍនយោបាយកម្ពុជាយល់ថាការបោះឆ្នោតឃុំ-សង្កាត់នាខែឧសភាឆ្នាំ២០១៧និងការបោះឆ្នោតសកលដើម្បីជ្រើសរើសតំណាងរាស្ត្រនាឆ្នាំ២០១៨ខាងមុខ និងអាចមានការប្រឈមខ្លាំងរវាងគណបក្សធំៗទាំងពីរដែលមាន អាសនៈក្នុងរដ្ឋសភា៕
