សហរដ្ឋអាមេរិកគាំទ្រកិច្ចខំប្រឹងប្រែងរបស់ប្រទេសអ៊ុយក្រែនដើម្បីទប់ទល់ការឈ្លានពានរបស់រុស្ស៊ី ហើយនិងស្ថាបនារដ្ឋាភិបាលបើកចំហរមួយ នេះបើតាមការបញ្ជាក់របស់បេសកជនរដ្ឋាភិបាលទីក្រុងវ៉ាស៊ីនតោនប្រចាំនៅអង្គការសហប្រជាជាតិ។
លោកស្រី Samantha Power ឯកអគ្គរដ្ឋទូតសហរដ្ឋអាមេរិកបានអញ្ជើញទៅដល់រដ្ឋធានីគាវ (Kyiv) កាលពីថ្ងៃពុធដើម្បីជួបជាមួយក្រុមមន្រ្តីរដ្ឋាភិបាលជាន់ខ្ពស់ ហើយលោកស្រីឯកអគ្គរដ្ឋទូតនឹងធ្វើសុន្ទរកថាមួយនៅក្នុងរដ្ឋធានីនៃប្រទេសអ៊ុយក្រែន។
នៅក្នុងកំណត់សម្គាល់មួយដែលលោកស្រីបានចុះផ្សាយក្នុងប្រព័ន្ធ Twitter ពីរដ្ឋធានីគាវ លោកស្រី Power បានមានប្រសាសន៍ថា សាររបស់លោកស្រីជូនប្រជាពលរដ្ឋអ៊ុយក្រែនគឺថា សហរដ្ឋអាមេរិកគាំទ្រពួកគេនៅសមរភូមិ២គឺ៖ ប្រឆាំងការឈ្លានពានរបស់រុស្ស៊ី ហើយនិងស្ថាបនារដ្ឋាភិបាលបើកចំហរដែលមានការទទួលខុសត្រូវ។
លោកស្រីឯកអគ្គរដ្ឋទូតដែលគេដឹងឭថា មានការគាំទ្រយ៉ាងខ្លាំងទៅលើប្រទេសអ៊ុយក្រែននៅក្រុមប្រឹក្សាសន្តិសុខរបស់អង្គការសហប្រជាជាតិ បានជួបជាមួយលោក Petro Poroshenko ប្រធានាធិបតីនៃប្រទេសអ៊ុយក្រែន។ ក្រុមមន្រ្តីបាននិយាយថា អស់លោកបានពិភាក្សាពីការអនុវត្តកិច្ចព្រមព្រៀងឈប់បាញ់គ្នារវាងកងទ័ពអ៊ុយក្រែននិងក្រុមឧទ្ទាមគាំទ្រដោយរុស្ស៊ីនៅក្នុងតំបន់ខាងកើតនៃប្រទេសអ៊ុយក្រែននៅពេលដែលមានការបន្តអរិភាពរវាងភាគីច្បាំងគ្នា។
កិច្ចព្រមព្រៀងឈប់បាញ់គ្នានោះ ត្រូវបានធ្វើឡើងកាលពីខែកុម្ភៈនៅក្នុងទីក្រុងមីនស្កិ៍ (Minsk) ដែលតម្រូវឲ្យពួកឧទ្ទាម និងកងទ័ពអ៊ុយក្រែនដកអាវុធធុនធ្ងន់របស់ខ្លួនចេញពីសមរភូមិ ក៏ប៉ុន្តែក្រុមអ្នកសង្កេតការណ៍អន្តរជាតិបានរាយការណ៍ពីការរំលោភបទបញ្ញតិនៃកិច្ចព្រមព្រៀងនោះជាញឹកញាប់៕
