កាលពីថ្ងៃអង្គារ លោកប្រធានាធិបតីបារ៉ាក់អូបាម៉ាបានមានប្រសាសន៍ប្រាប់ប្រជារាស្ត្រអាមេរិកាំងឱ្យចាត់វិធានការថែមទៀតដើម្បីបន្ថយភាពទីទាល់ក្រនៅក្នុងស.រ.អា.និងធ្វើឱ្យតូចជាងមុននូវភាពឃ្លាតពីគ្នាដ៏ធំធេងនៃប្រាក់ចំណូលរវាងពួកអ្នកមានស្តុកស្ដម្ភ ពួកជនថ្នាក់កណ្តាលនិងក្រុមជនក្រីក្ររបស់ប្រទេសនេះ។
ក្នុងរយៈពេលជាងមួយម៉ោង លោកអូបាម៉ាបានអង្គុយនៅលើវេទិកាមួយនៅឯសាកលវិទ្យាល័យ Georgetown ក្នុងរដ្ឋធានីវាស៊ីនតោន ក្នុងការប្រជុំសន្និសីទស្តីពីភាពទីទាល់ក្រ ហើយលោកបានចូលរួមក្នុងការសន្ទនាគ្នាដ៏ទូលំទូលាយមួយ ដោយលោកបានមានប្រសាសន៍ថា គ្មានហេតុផលទេដែលថា ប្រទេសមួយក្នុងបណ្តាក្រុមប្រទេសមានធនធានច្រើនបំផុតក្នុងពិភពលោកមិនអាចចាត់វិធានការថែមទៀតដើម្បីបង្កើតសង្គមមួយដែលមានសមភាពជាងមុន។
លោកបានប្តូរទស្សនៈរបស់លោកជាមួយអ្នកសរសេរវិភាគក្នុងកាសែតម្នាក់ សាស្ត្រចារ្យម្នាក់ខាងគោលនយោបាយសាធារណៈមកពីសាកលវិទ្យាល័យ Harvard និងប្រធាននៃអង្គការជំនាញបញ្ចុះបញ្ចូលខាងជំនួញនាំមុខគេមួយក្នុងប្រទេសអាមេរិក។
លោក អូបាម៉ា បានមានប្រសាសន៍ថា ស.រ.អា.«អាចបន្ថយភាពទីទាល់ក្របាននៅពេលយើងសម្រេចថាធ្វើអ្វីមួយអំពីបញ្ហានេះ» ក៏ប៉ុន្តែ លោកប្រធានាធិបតីបាននិយាយបន្ថែមថា ប្រទេសរបស់លោកប្រឈមមុខនឹងសំណួរជាមូលដ្ឋានថាតើប្រទេសអាមេរិកនឹងត្រូវចាត់វិធានការថែមទៀតច្រើនម្រិតណា៕
