លោកប្រធានាធិបតីសហរដ្ឋអាមេរិក បារ៉ាក់ អូបាម៉ា បានសរសើរសម្តេចសង្ឃ ដាឡៃ ឡាម៉ា (Dalai Lama) ថាជាមនុស្សម្នាក់មានមេត្តាធម៌ដោយលោកប្រធានាធិបតីមិនអើពើការតវ៉ារបស់ចិនប្រឆាំងការពាក់ព័ន្ធណាមួយរបស់អាមេរិកជាមួយមេដឹកនាំសាសនាដែនដីទីបេនេះទេ។
លោកប្រធានាធិបតីអូបាម៉ាមិនបានជួបដោយផ្ទាល់ជាមួយសម្តេចសង្ឃ ដាឡៃ ឡាម៉ា នៅពេលដែលលោកចូលរួមពិធីសូត្រធម៌ និងទទួលទានអាហារពេលព្រឹកប្រចាំឆ្នាំកាលពីថ្ងៃព្រហស្បត៍នៅក្នុងរដ្ឋធានីវ៉ាស៊ីនតោន ក៏ប៉ុន្តែលោកបានអង្គុយនៅជិតគ្នាហើយបានធ្វើការស្វាគមន៍គ្នាទៅវិញទៅមក។
លោកប្រធានាធិបតីអូបាម៉ាបានប្រាប់ក្រុមមេដឹកនាំសាសនានិងមេដឹកនាំនយោបាយប្រហែល៣ពាន់៦រយនាក់នៅឯពិធីប្រចាំឆ្នាំថា «ខ្ញុំចង់ផ្តល់ការស្វាគមន៍ពិសេសដល់មិត្តភក្តិដ៏ល្អម្នាក់គឺសម្តេចសង្ឃ ដាឡៃ ឡាម៉ា ដែលជាឧទាហរណ៍ដ៏ល្អបំផុតមួយសម្រាប់ការអនុវត្តមេត្តាធម៌ហើយបានជម្រុញលើកទឹកចិត្តយើងឲ្យនិយាយពីសេរីភាពនិងសេចក្តីថ្លៃថ្នូររបស់មនុស្សជាតិទាំងអស់»។
ថ្វីបើសម្តេចសង្ឃ ដាឡៃ ឡាម៉ា និយាយយ៉ាងទទូចថា ព្រះអង្គគ្រាន់តែស្វះស្វែងរកស្វ័យភាពសម្រាប់ដែនដីទីបេក៏ដោយ ចិនបានចាត់ទុកមេដឹកនាំសាសនាអង្គនេះថា ជាអ្នកទាមទារបំបែករដ្ឋប្រកបដោយគ្រោះថ្នាក់ ហើយបានថ្កោលទោសជាប្រចាំដល់មេដឹកនាំនានាដែលបានជួបជាមួយព្រះអង្គ។
លោក Hong Lei អ្នកនាំពាក្យក្រសួងការបរទេសចិនបាននិយាយកាលពីថ្ងៃអង្គារថា «យើងប្រឆាំងការជ្រៀតជ្រែករបស់ប្រទេសណាក្នុងកិច្ចការផ្ទៃក្នុងរបស់ប្រទេសចិននៅក្រោមលេសបញ្ហាពាក់ព័ន្ធនឹងដែនដីទីបេ ហើយយើងជំទាស់ប្រឆាំងដល់ជំនួបរបស់មេដឹកនាំបរទេសណាជាមួយសម្តេចសង្ឃ ដាឡៃ ឡាម៉ា ក្នុងទ្រង់ទ្រាយណាក៏ដោយ»។
ចាប់តាំងពីចូលកាន់អំណាចមក លោកប្រធានាធិបតីអូបាម៉ា បានជួបជាមួយសម្តេចសង្ឃ ដាឡៃ ឡាម៉ា ៣លើកហើយ។ ប៉ុន្តែគ្មានជំនួបណាមួយបានធ្វើឡើងជាសាធារណៈទេ។
មុនពេលចាប់ផ្តើមពិធីសូត្រធម៌និងទទួលទានអាហារពេលព្រឹក សមាជិកសភាសហរដ្ឋអាមេរិក២រូបបានប្រាប់វីអូអេថា ការរិះគន់របស់ចិនដល់សហរដ្ឋអាមេរិកជួបជាមួយសម្តេចសង្ឃ ដាឡៃ ឡាម៉ា គ្មានហេតុផលត្រឹមត្រូវទេ៕
