លោកប្រធានាធិបតីអាមេរិក បារ៉ាក់ អូបាម៉ា កំពុងតែស្ថិតនៅក្នុងទីក្រុងឡុងដ៏ដើម្បីចូលរួមក្នុងកិច្ចប្រជុំជាមួយនឹងលោកនាយករដ្ឋមន្រ្តីអង់គ្លេស David Cameron អំពីការប្រយុទ្ធប្រឆាំងនឹងអំពើភេរវកម្ម វិបត្តិជនភៀសខ្លួននៅអឺរ៉ុប និងសេដ្ឋកិច្ចសាកលលោក។
លោកអូបាម៉ាបានទៅដល់រាជធានីរបស់អង់គ្លេស បន្ទាប់ពីលោកបានចូលរួមក្នុងកិច្ចប្រជុំកំពូលរបស់ក្រុមប្រឹក្សាសហប្រតិបត្តិការតាមឈូងសមុទ្រពែកនៅក្នុងប្រទេសអារ៉ាប៊ីសាអូឌីត ដែលនៅទីនោះលោកបានមានប្រសាសន៍ថា សហរដ្ឋអាមេរិក និងមេដឹកនាំនៃបណ្តាប្រទេសនៅតាមឈូងសមុទ្រពែកនៅតែរួបរួមគ្នាដើម្បីកម្ចាត់ក្រុមរដ្ឋឥស្លាម និងធ្វើឲ្យជម្លោះនៅមជ្ឈឹមបូព៌ាមានស្ថេរភាពឡើងវិញ។
លោកអូបាម៉ាបានថ្លែងដោយទូលំទូលាយអំពីចំណុចដែលបានឯកភាពគ្នារវាងសហរដ្ឋអាមេរិក និងក្រុមប្រឹក្សាសហប្រតិបត្តិការតាមឈូងសមុទ្រពែក ដូចជា មេដឹកនាំនៃបណ្តាប្រទេសនៅតាមឈូងសមុទ្រពែកបានឯកភាពថានឹងបង្កើនកិច្ចខិតខំប្រឹងប្រែងផ្នែកមនុស្សធម៌នៅក្នុងប្រទេសអ៊ីរ៉ាក់ និងប្រទេសស៊ីរី ក៏ដូចជាបន្តគាំទ្រដល់ប្រទេសអ៊ីរ៉ាក់ ខណៈដែលប្រទេសនេះកំពុងតែដណ្តើមក្រុង និងទីក្រុងនានាពីក្រុមរដ្ឋឥស្លាមមកវិញ និងព្យាយាមធ្វើឲ្យក្រុងទាំងនោះមានស្ថេរភាព។
សហរដ្ឋអាមេរិក និងក្រុមប្រឹក្សាសហប្រតិបត្តិការតាមឈូងសមុទ្រពែកក៏បានព្រមព្រៀងគ្នាទៅលើដំណោះស្រាយនយោបាយដែលចាំបាច់សម្រាប់ប្រទេសស៊ីរីផងដែរ។
លោកអូបាម៉ាបានមានប្រសាសន៍ថា កិច្ចប្រជុំនេះបានឯកភាពថា មធ្យោបាយតែមួយគត់ដើម្បីបញ្ចប់សង្គ្រាមស៊ីវិលក្នុងប្រទេសស៊ីរីគឺតាមរយៈរដ្ឋាភិបាលអន្តរកាលមួយនិងត្រូវឲ្យលោកប្រធានាធិបតី Bashar al-Assad ចុះចេញពីតំណែង៕
