លោកប្រធានាធិបតីសហរដ្ឋអាមេរិក បារ៉ាក់ អូបាម៉ា ថ្លែងថា លោកបានបញ្ជាឲ្យយន្តហោះយោធាអាមេរិកាំងធ្វើ«ការវាយប្រហារតម្រង់»ទៅរកទីដៅរបស់ពួកនិយមជ្រុលអ៊ីស្លាមក្នុងប្រទេសអ៊ីរ៉ាក់ភាគខាងជើង។
ក្នុងសន្ទរកថាមួយនៅសេតវិមានកាលពីយប់ថ្ងៃព្រហស្បតិ៍ លោកប្រធានាធិបតី អូបាម៉ា បានថ្លែងដែរថា យន្តហោះអាមេរិកាំងបានទម្លាក់ស្បៀងគ្រាអាសន្ននិងទឹកដបទៅឲ្យជនជាតិ អ៊ីរ៉ាក់ដែលទទួលការគំរាមពីពួកនិយមជ្រុលទាំងនេះ។
លោកថ្លែងថា ថ្ងៃនេះលោកបានបញ្ជាឲ្យធ្វើប្រតិបត្តិការពីរនៅប្រទេសអ៊ីរ៉ាក់៖ ទី១គឺការវាយប្រហារផ្លូវអាកាសចោះៗ ដើម្បីការពារបុគ្គលិកអាមេរិកាំង និងទី២គឺកិច្ចប្រឹងប្រែងមនុស្សធម៌ដើម្បីជួយសង្គ្រោះជនស៊ីវិល អ៊ីរ៉ាក់ជាច្រើនពាន់នាក់ ដែលនៅជាប់គាំងលើភ្នំមួយដោយគ្មានអាហារនិងទឹក ហើយអាចប្រឈមនឹងមរណភាពបើគ្មានជំនួយទេ។
មន្រ្តីជាន់ខ្ពស់អាមេរិកាំងម្នាក់បានថ្លែងថា ការវាយប្រហារផ្លូវអាកាសមិនទាន់ចាប់ផ្តើមទេ។ លោក អូបាម៉ា បានបញ្ជាក់ច្បាស់ថា កងទ័ពជើងគោកអាមេរិកាំងនឹងមិនមានដាក់រាយក្នុងប្រទេសអ៊ីរ៉ាក់ទេ៕
