សុន្ទរកថារបស់លោកប្រធានាធិបតីសហរដ្ឋអាមេរិក Barack Obama ទាក់ទិននឹងការបាញ់ប្រហារកាលពីសប្តាហ៍មុនដែលបណ្តាលឲ្យស្លាប់មនុស្សនៅក្នុងរដ្ឋ California នោះ កើតឡើង ខណ:ដែលបញ្ហាសំខាន់និងចម្រូងចម្រាសពីរត្រូវបានគេរួមបញ្ចូលគ្នា និងដាក់ត្រួតគ្នា គឺបញ្ហាភេរវកម្មអន្តរជាតិ និងការគ្រប់គ្រងកាំភ្លើង។ នៅសប្តាហ៍នេះ យើងនឹងបានឃើញសេចក្តីណែនាំជាច្រើនទៅលើអ្វីដែលសហរដ្ឋអាមេរិកត្រូវធ្វើដើម្បីផ្តល់សុវត្ថិភាពដល់ពលរដ្ឋរបស់ខ្លួន។
ការជំរុញទឹកចិត្តរបស់ក្រុមរដ្ឋឥស្លាមឲ្យមានការសម្លាប់មនុស្សយ៉ាងរង្គាល នៅលើទឹកដីសហរដ្ឋអាមេរិកនោះ គឺជារឿងមួយដែលធ្វើឲ្យពលរដ្ឋអាមេរិកមិនអាចនៅស្ងប់ចិត្តបាន។
នាង April ពលរដ្ឋមកពីរដ្ឋ California ថ្លែងថា៖ «វាគួរឲ្យខ្លាចណាស់ពីព្រោះពួក ISIS មានគ្រាប់បែកនិងអ្វីៗគ្រប់យ៉ាង។ ហើយគ្រាប់បែកទាំងនោះអាចកម្ទេចទីក្រុងទាំងមូលបាន»។
នាង Erika ពលរដ្ឋមកពីរដ្ឋ California និយាយថា៖ «ពេលដែលព្រឹត្តិការណ៍នៅទីក្រុងប៉ារីសបានកើតឡើង ពួកយើងបានឮព័ត៌មានថា អាមេរិកក៏ជាគោលដៅដ៏ជាក់លាក់មួយផងដែរ»។
លោក Donald Trump បេក្ខជនប្រធានាធិបតីខាងគណបក្សសាធារណរដ្ឋថ្លែងថា៖ «ពួកយើងមានសត្រូវលាក់មុខ។ ពួកយើងមានសត្រូវដែលមិនពាក់ឯកសណ្ឋាន។ សត្រូវដែលសាហាវយង់ឃ្នង់ ហិង្សា និងអាក្រក់ណាស់។ ពួកយើងត្រូវតែកម្ចាត់ពួកទាំងនោះចេញពីសហរដ្ឋអាមេរិក»។
ការប្រយុទ្ធនឹងក្រុមរដ្ឋឥស្លាមគឺជាចំណុចមួយបក្សទាំងពីររបស់អាមេរិកព្រមព្រៀងគ្នា។
លោកស្រី Hillary Clinton បេក្ខជនប្រធានាធិបតេយ្យនៃគណបក្សប្រជាធិបតេយ្យថ្លែងថា៖
«ពួកគេត្រូវតែត្រូវបានកម្ចាត់ចោល ហើយនេះមានន័យថា ត្រូវកម្ចាត់ពួកទាំងនោះចេញពីរលកធាតុអាកាស កម្ចាត់ពួកគេចេញពីទឹកដី និងកម្ចាត់ពួកគេចេញពីប្រព័ន្ធអ៊ីនធឺណិត»។
ប៉ុន្តែវិធីសាស្ត្រដែលត្រូវធ្វើនោះបានលាតត្រដាងពីជម្រៅនៃស្នាមប្រេះឆារបស់បក្សទាំងពីរ។
លោក Bernie Sanders បេក្ខជនប្រធានាធិបតេយ្យនៃគណបក្សប្រជាធិបតេយ្យថ្លែងថា៖ «ពួកយើងត្រូវហាមឃាត់ការប្រើប្រាស់អាវុធជាថ្មី។ ពួកយើងត្រូវបញ្ចប់ការលក់ឡតកាំភ្លើងដាក់គ្រាប់បានច្រើន។ ពួកយើងត្រូវដាក់ឲ្យការរត់ពន្ធកាំភ្លើងជាឧក្រិដ្ឋកម្មសហព័ន្ធមួយ»។
លោក Ted Cruz បេក្ខជនប្រធានាធិបតីខាងគណបក្សប្រជាធិបតេយ្យថ្លែងថា៖ «ប្រតិកម្មបន្ទាន់របស់ក្រុមឆ្វេងនិយមឬគណបក្សប្រជាធិបតេយ្យចំពោះអំពើភេរវកម្មរបស់ពួកឥស្លាម ដូចកូនឆ្មាបិទភ្នែកអញ្ជឹង គឺមិនព្រមតាមចាប់ឧក្រិដ្ឋករទាំងនោះទេ ប៉ុន្តែភ្លាមនោះបែរជាព្យាយាមរឹបអូសកាំភ្លើងពីពលរដ្ឋដែលគោរពច្បាប់ទៅវិញ»។
សូម្បីតែពាក្យដែលប្រើសម្រាប់ការជជែកដេញដោលអំពីអំពើហិង្សានិងអំពើភេរវកម្មនោះ ក៏គេមិនយល់ស្របគ្នាដែរ។
លោក Jeb Bush បេក្ខជនប្រធានាធិបតីគណបក្សសាធារណរដ្ឋដែរ ថ្លែងថា៖
«ហៅព្រឹត្តិការណ៍នេះតាមការណ៍ពិតនៃព្រឹត្តិការណ៍នេះ។ ព្រឹត្តការណ៍នេះគឺជាការប្រយុទ្ធគ្នាដើម្បីការពារអរិយធម៌លោកខាងលិច។ ពួកក្រុមរដ្ឋឥស្លាមបានប្រកាសសង្គ្រាមជាមួយនឹងយើង»។
លោកស្រី Hillary Clinton បេក្ខជនប្រធានាធិបតេយ្យនៃគណបក្សប្រជាធិបតេយ្យថ្លែងថា៖
«វាហាក់ដូចជាពួកយើងប្រកាសសង្គ្រាមប្រឆាំងនឹងសាសនាមួយអញ្ជឹង។ វាជួយបង្កើតទស្សនៈមួយ អំពី Clash of Civilization ឬ ការប៉ះទង្គិចរវាងអរិយធម៌ ដែលជាឧបករណ៍មួយដែលក្រុម ISIS និងពួកជីហាតដទៃទៀតយកមកប្រើប្រាស់។
សភាដែលនាំមុខដោយគណបក្សសាធារណរដ្ឋមានពេលរហូតដល់ចុងសប្តាហ៍នេះ ដើម្បីពន្យារអំណាចក្នុងការចំណាយរបស់រដ្ឋាភិបាលអាមេរិកនិងដើម្បីបញ្ចៀសការបិទរដ្ឋាភិបាលសហព័ន្ធមួយផ្នែក។ ការវាយប្រហារនៅទីក្រុង San Bernardino និងការថ្លែងសុន្ទរកថាទៅកាន់ប្រទេសជាតិរបស់លោក Obama ធានាថានឹងធ្វើឲ្យរដ្ឋាភិបាលទីវ៉ាស៊ីនតោននឹងមានការមិនយល់ស្របគ្នាច្រើន៕
ប្រែសម្រួលដោយ ស្រេង លក្ខិណា
