ក្រុមចៅក្រមនិងព្រះរាជអាជ្ញានៃសាលាក្តីខ្មែរក្រហមបានអនុម័តនៅរសៀលថ្ងៃសុក្រនេះនូវវិសោធនកម្មវិធានផ្ទៃក្នុងដែលអនុញ្ញាតឲ្យសហចៅក្រមស៊ើបអង្កេតនិងអង្គជំនុំជម្រះសាលាដំបូងកាត់បន្ថយវិសាលភាពស៊ើបអង្កេតនិងវិសាលភាពក្នុងសំណុំរឿងសម្រាប់ការជំនុំជម្រះ។ ការអនុម័តនេះធ្វើឡើងក្នុងកិច្ចប្រជុំពេញអង្គលើកទី១១ដែលជាកិច្ចប្រជុំបន្តពីកិច្ចប្រជុំកាលពីឆ្នាំមុន។
យោងតាមសេចក្តីប្រកាសព័ត៌មានរបស់សាលាក្តីខ្មែរក្រហមនៅថ្ងៃនេះការវិវត្តន៍ថ្មីនេះដើម្បីបង្កើនល្បឿនកាត់ទោសឲ្យបានឆាប់រហ័ស។
លោកឡាស អលសិន មន្ត្រីផ្នែកទំនាក់ទំនងកិច្ចការច្បាប់របស់សាលាក្តីខ្មែរក្រហមបញ្ជាក់ថាការធ្វើវិសោធកម្មនេះមានប្រសិទ្ធភាពចំពោះសំណុំរឿងទាំងឡាយចំពោះតុលាការ។
«វិសោធនកម្មវិធាននេះអាចអនុវត្តបានគ្រប់សំណុំរឿងទាំងអស់នៅចំពោះមុខតុលាការ។ប៉ុន្តែវាអាស្រ័យលើអង្គជំនុំជម្រះសាលាដំបូងនិងសហចៅក្រមស៊ើបអង្កេតតើគេត្រូវប្រើវិធាននេះឬយ៉ាងណា។នេះជាជម្រើសមួយ»។
មន្ត្រីតុលាការដដែលបញ្ជាក់បន្ថែមថាយោងវិសោធនកម្មនេះចៅក្រមស៊ើបអង្កេតមិនចាំបាច់ធ្វើការស៊ើបអង្កេតគ្រប់ដំណាក់កាលនៃអង្គហេតុដែលមានក្នុងដីកាបញ្ជូនរឿងនោះទេ។ដូចគ្នានេះដែរសម្រាប់អង្គជំនុំជម្រះសាលាដំបូងក៏អាចធ្វើការកាត់បន្ថយការកាត់ក្តីលើអង្គហេតុមួយចំនួនដែរ។
ឆ្លើយទៅនឹងសំណួរដែលថាតើតុលាការអាចនឹងអនុវត្តវិធាននេះសម្រាប់កាត់បន្ថយវិសាលភាពមួយចំនួនក្នុងសំណុំរឿង០០២វគ្គទី២ដែរឬទេ លោកឡាស អលសិន អះអាងថាវាអាស្រ័យលើអង្គជំនុំជម្រះសាលាដំបូងក្នុងការសម្រេចចិត្តយកវិធានផ្ទៃក្នុងនេះមកប្រើដែរឬយ៉ាងណា។
កាលពីខែមិនាឆ្នាំ២០១៤ ការិយាល័យសហព្រះរាជអាជ្ញាបានស្នើលទ្ធភាពឲ្យសហចៅក្រមស៊ើបអង្កេតនិងអង្គជំនុំជម្រះសាលាដំបូងកាត់បន្ថយវិសាលភាពនៃដែនឧក្រិដ្ឋកម្មសម្រាប់សំណុំរឿងបីចុងក្រោយគឺសំណុំរឿង០០២ សំណុំរឿង០០៣និងសំណុំរឿង០០៤។មូលហេតុដោយសារឧក្រិដ្ឋកម្មដែលត្រូវបានយកចិត្តទុកដាក់នោះមានច្រើនពេកហើយទំនងជាបទឧក្រិដ្ឋមួយចំនួនមិនអាចយកមកកាត់ទោសទាន់ពេលនោះទេ។
សំណើនេះទំនងជាយោងដល់ភាពចាស់ជរានិងភាពទន់ជ្រាយផ្នែកសុខភាពរបស់ជនជាប់ចោទនិងជនជាប់សង្ស័យទាំងប្រាំពីរនាក់ក្នុងសំណុំរឿងទាំងបី។ ក្នុងនោះនួន ជា អតីតប្រធានសភាខ្មែរក្រហមនិងខៀវ សំផន អតីតប្រមុខរដ្ឋនៃរបបកម្ពុជាប្រជាធិបតេយ្យរបស់ខ្មែរក្រហមដែលមានវ័យជាង៨០ឆ្នាំម្នាក់ៗកំពុងស្ថិតក្រោមការកាត់ទោសក្នុងសំណុំរឿង០០២វគ្គទី២។
យោងតាមលោកហុង គឹមសួន មេធាវីតំណាងឲ្យដើមបណ្តឹងរដ្ឋប្បវេណីមួយរូប ការកាត់បន្ថយដែនស៊ើបអង្កេតឬកាត់បន្ថយអង្គហេតុណាមួយក្នុងការកាត់ក្តីអាចធ្វើឲ្យប៉ះពាល់ដល់សិទ្ធិដើមបណ្តឹងរដ្ឋប្បវេណីដោយហេតុថាដើម្បីដាក់ពាក់បណ្តឹងសុំតាំងខ្លួនជាដើមបណ្តឹងរដ្ឋប្បវេណីបានជនរងគ្រោះដោយរបបខ្មែរក្រហមត្រូវស្ថិតនៅក្នុងដែនវិសាលភាពនៃការស៊ើបអង្កេតរបស់តុលាការ។ដោយសារហេតុនេះក្រុមមេធាវីតំណាងឲ្យដើមបណ្តឹងរដ្ឋប្បវេណីបានស្នើដល់តុលាការមិនត្រូវបោះបង់ចោលអង្គហេតុដែលជាប់ពាក់ព័ន្ធឧក្រិដ្ឋកម្មទាំងស្រុងនោះទេ។
«យើងបានដាក់ញ្ញត្តិក្នុងនាមជាដើមបណ្តឹងរដ្ឋប្បវេណីសុំឲ្យតុលាការកុំបោះបង់ចោលអង្គហេតុតែអាចទុកអង្គហេតុស៊ើបអង្កេតបន្តនៅថ្ងៃក្រោយទៀត»។
ទោះជាយ៉ាងណាក៏ដោយសាលាក្តីខ្មែរក្រហមបានបញ្ជាក់នៅក្នុងសេចក្តីប្រកាសព័ត៌មានថាការធ្វើវិសោធនកម្មវិធានផ្ទៃក្នុងខាងលើនឹងមិនធ្វើឲ្យប៉ះពាល់ដល់ផលប្រយោជន៍នៃដើមបណ្តឹងរដ្ឋប្បវេណីទេ៕
