ក្រោយការបោះឆ្នោតជ្រើសតាំងសមាជិកព្រឹទ្ធសភានីតិកាលទី ៥ បានបញ្ចប់ កូដករសហជីពក្រុមហ៊ុនណាហ្គាវើលដ៍ ស្នើឱ្យសមាជិកព្រឹទ្ធសភាថ្មីជួយដោះស្រាយវិវាទការងាររបស់ពួកគេ ដែលបន្តតវ៉ាអស់រយៈពេលជាងពីរឆ្នាំមកហើយ។
ក្រុមកូដករប្រមាណជា ២០ នាក់ បានកាន់បដានិងស្រែកតវ៉ានៅមុខក្រុមហ៊ុនកាស៊ីណូណាហ្គាវើលដ៍ទាមទាររកដំណោះស្រាយជុំវិញវិវាទការងាររបស់ពួកគេជាមួយម្ចាស់ក្រុមហ៊ុនណាហ្គាវើលដ៍ កាលពីរសៀលថ្ងៃអាទិត្យ ទី ២៥ ខែកុម្ភៈ ឆ្នាំ ២០២៤ ដែលជាថ្ងៃបោះឆ្នោតជ្រើសតាំងសមាជិកព្រឹទ្ធសភាអាណត្តិទី ៥។
អ្នកស្រី ម៉ម សុវឌ្ឍិន កូដករក្រុមហ៊ុនណាហ្គាវើលដ៍ម្នាក់ប្រាប់វីអូអេទាំងដៃកំពុងកាន់មេក្រូថា វិវាទការងាររបស់ក្រុមកូដករមកដល់ពេលនេះ ហាក់បីមិនមានភាគីក្រសួងពាក់ព័ន្ធណាមួយចេញមុខដោះស្រាយនោះទេ។ អ្នកស្រីថា បន្ទាប់ពីការបោះឆ្នោតជ្រើសរើសតាំងសមាជិកព្រឹទ្ធសភារួច អ្នកស្រីជំរុញឱ្យសមាជិកព្រឹទ្ធសភាដែលជាប់ឆ្នោត ជួយគិតគូដោះស្រាយវិវាទការងាររបស់ពួកគេ។
អ្នកស្រីលើកឡើងថា៖ «សំណូមពរឱ្យគាត់ [សមាជិកព្រឹទ្ធសភាជាប់ឆ្នោត] ជួយរកដំណោះស្រាយឱ្យមានច្រកចេញសម្រាប់កម្មករកុំឱ្យនៅជាប់គាំង ទៅមុខក៏ទៅមិនរួច ទៅក្រោយក៏មិនរួច។ សព្វថ្ងៃនេះ កម្មករហាក់បីដូចជាតែលតោលអត់មានក្រសួងពាក់ព័ន្ធណាចេញមុខដោះស្រាយបាន»។
អ្នកស្រីបន្ថែមថា៖ «បើសិនជាខាងបោះឆ្នោតថ្ងៃហ្នឹងអ្នកដែលជាប់ឆ្នោតអាចងាកមកដោះស្រាយបញ្ហានៅណាហ្គាវើលដ៍នេះបាន ក៏ជាមុខមាត់សម្រាប់ប្រទេសផង ហើយគេហៅថា ជាអ្នកជួយសង្គ្រោះពេលដែលកម្មករត្រូវការផងដែរ»។
កូដករម្នាក់ទៀត កញ្ញា សុខ ថាវុធ អាយុ ៣៦ ឆ្នាំ ប្រាប់វីអូអេដែរថា រដ្ឋាភិបាល និងសមាជិកព្រឹទ្ធសភាដែលជាប់ឆ្នោត គួរតែដោះស្រាយវិវាទការងាររបស់ពួកគេឱ្យបានឆាប់។
កញ្ញានិយាយទាំងដៃកំពុងកាន់បដាថា៖ «និយាយទៅខ្ញុំ សុំដល់រដ្ឋាភិបាលចង់ឱ្យគាត់ជំរុញ ដោះស្រាយវិវាទហ្នឹងឱ្យបានឆាប់ៗ ព្រោះកម្មករកាន់តែ [លំបាក] ចំពោះខ្ញុំផ្ទាល់កាន់តែដាច់មែនទែនហើយ តែពួកខ្ញុំនៅតែតស៊ូអ៊ីចឹង ដើម្បីរកដំណោះស្រាយហើយជាពិសេសខាងរដ្ឋសភា ព្រោះការបោះឆ្នោតរួចហើយ។ ខ្ញុំសង្ឃឹមថា គាត់នឹងបានជួយមើលឃើញវិវាទហ្នឹង ព្រោះជាក់ស្តែងថៅកែរំលោភសិទ្ធិកម្មករគាត់អត់គោរពច្បាប់នៅស្រុកខ្មែរទេ»។
កញ្ញាបន្ថែមថា កញ្ញានៅតែបន្តធ្វើកូដកម្មរហូតទាល់តែមានដំណោះស្រាយ បើទោះបីត្រូវប្រឈមនឹងបញ្ហាជីវភាពក៏ដោយ។
កញ្ញា សុខ ថាវុធ បញ្ជាក់ថា៖ «ចំពោះជីវភាពវិញ យើងមានការលំបាកណាស់ ប៉ុន្តែយើងត្រូវតែតស៊ូ ដើម្បីសិទ្ធិ ព្រោះថៅកែគាត់ជាថៅកែបរទេសហើយមករំលោភសិទ្ធិកម្មករខ្មែរនៅស្រុកខ្មែរ វាជារឿងដែលអយុត្តិធម៌ សម្រាប់ខ្ញុំជាកម្មករដែលធ្វើការនៅក្នុងស្រុកខ្មែរខ្លួនឯងទាំងគ្មានអ្នកណាអើពើអ៊ីចឹង។ ទោះបីជីវភាពបងមានការលំបាកយ៉ាងណាក៏ដោយក៏បងនៅតែតស៊ូរកថរិកាដើម្បីយកមកធ្វើកូដកម្មកអ៊ីចឹងទៀត»។
កូដកររូបនេះអះអាងថា បន្ទាប់ពីម្ចាស់ក្រុមហ៊ុនណាហ្គាវើលដ៍ចាស់បានស្លាប់ទៅ ម្ចាស់ក្រុមហ៊ុនថ្មីក៏មិនមានការអើពើលើបញ្ហាដែលកូដករបានជួបប្រឈមឡើយ។ ចំណែកឯញត្តិធ្លាប់ដាក់ភាគីពាក់ព័ន្ធទាំងអស់ក៏គ្មានដំណោះស្រាយទៀត។
ក្រុមកូដករសហជីពក្រុមហ៊ុនណាហ្គាវើលដ៍ បានធ្វើកូដកម្មអស់រយៈពេលជាងពីរឆ្នាំមកហើយ ពាក់ព័ន្ធនឹងវិវាទការងារដែលពួកគេចោទក្រុមហ៊ុនថា បានបញ្ឈប់បុគ្គលិកជាងមួយពាន់នាក់ និងការមិនទូទាត់សំណងសមស្របតាមច្បាប់ការងារ។ ក្រុមកូដករតែងប្រមូលផ្តុំតវ៉ានៅខាងមុខក្រុមហ៊ុនកាស៊ីណូណាហ្គាវើលដ៍ស្ទើររៀងរាល់ថ្ងៃ ដោយថ្ងៃខ្លះមានការតុបតែងខ្លួន និងអំពាវនាវប្លែកៗ ទៅតាមពេលវេលា និងព្រឹត្តិការណ៍ផ្សេងៗ។
អ្នកនាំពាក្យព្រឹទ្ធសភា លោក ម៉ម ប៊ុននាង ប្រាប់វីអូអេនៅថ្ងៃចន្ទនេះថា ពាក់ព័ន្ធនឹងការស្នើសុំរបស់ក្រុមកូដករណាហ្គាវើលដ៍ឱ្យជួយដោះស្រាយរឿងវិវាទការងាររបស់ពួកគេនោះ លោកថាព្រឹទ្ធសភានឹងពិនិត្យបន្ថែម បន្ទាប់ពីការប្រកាសលទ្ធផលបេក្ខជនជាប់ជាផ្លូវការណ៍ក្រោយបោះឆ្នោតរួច។
លោកថ្លែងថា៖ «បន្ទាប់ពីប្រកាសសុពលភាពហើយបានទៅ សមាជិកព្រឹទ្ធសភាទាំងអស់ដែលជាប់ឆ្នោតថ្មីហ្នឹងទៅចូលផឹកទឹកសម្បថ ចូលកាន់តំណែងនោះបានយើងមានត្រូវ ធ្វើយ៉ាងម៉េចបានយើងដឹងថា តើការស្នើហ្នឹងយ៉ាងម៉េចយើងនឹងយកមកពិនិត្យបាន តែក្នុងឥឡូវនេះគឺទើបតែប្រកាសលទ្ធផលមិនទាន់ផ្លូវការ»។
លោកថា ជុំវិញបញ្ហានេះព្រឹទ្ធសភាមានតួនាទីត្រឹមតែពិនិត្យ និងតាមដាន ផ្តល់ជាអនុសាសន៍ខ្លះ ដើម្បីឱ្យដំណើរការនៃការដោះស្រាយនោះស្របទៅតាមយុត្តិធម៌ និងត្រឹមត្រូវ។ លោកបន្ថែមថា ក្រសួងការងារ និងអាជ្ញាធរដែនដីបានចូលរួមពិភាក្សាគ្នាដោះស្រាយបានជាបន្តបន្ទាប់ខ្លះហើយពាក់ព័ន្ធនឹងវិវាទនោះ។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក កត្តា អន ប្រាប់វីអូអេនៅថ្ងៃចន្ទនេះថា ក្រសួងនៅតែយកចិត្តទុកដាក់នៅក្នុងការដោះស្រាយវិវាទមួយនេះ បើសិនភាគីទាំងពីរមានចេតនាចង់បញ្ចប់ជម្លោះ។
លោកបញ្ជាក់ថា៖ «សុំជម្រាបថា ក្រសួងការងារនៅតែបើកទ្វារចំហដល់អតីតបុគ្គលិកណាហ្គាវើលដ៍យើង ប្រសិនបើបងប្អូនយើងមានចេតនាចង់ដោះស្រាយវិវាទនេះ បងប្អូនមានចេតនាចង់បញ្ចប់បញ្ហានេះ ឬមួយមានវឌ្ឍនភាពក្នុងការដោះស្រាយបញ្ហា សូមដាក់ពាក្យស្នើមកគណៈកម្មការ ដោះស្រាយបាតុកម្ម កូដកម្ម ដោយសន្តិវិធី។ គណៈកម្មការនៅតែបន្តធ្វើការសម្របសម្រួលដោះស្រាយបញ្ហាជូនបងប្អូន។ ប៉ុន្តែរហូតមកដល់ពេលនេះ យើងមិនទាន់បានទទួលយកសំណើរណាមួយនៅឡើយទេ។ ដូច្នេះសូមបងប្អូនណាហ្គាវើលដ៍ ពិចារណាធ្វើយ៉ាងណាបញ្ចប់ជម្លោះនេះដោយសន្តិវិធី»។
ថ្នាក់ដឹកនាំសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍យ៉ាងហោចណាស់៩នាក់ ត្រូវបានចាប់ខ្លួន និងចោទប្រកាន់ ពាក់ព័ន្ធនឹងការធ្វើកូដកម្ម ចាប់តាំងពីខែធ្នូ ឆ្នាំ ២០២១។ រីឯ កញ្ញា ឈឹម ស៊ីថរ មេដឹកនាំសហជីព ត្រូវសាលាដំបូងរាជធានីភ្នំពេញផ្តន្ទាទោសឱ្យជាប់ពន្ធនាគារ ២ ឆ្នាំ ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ហើយសមាជិកសហជីពចំនួន៨នាក់ ត្រូវបានតុលាការកាត់ទោសឱ្យជាប់ពន្ធនាគារម្នាក់ៗចន្លោះពី ១ ឆ្នាំទៅ ១ ឆ្នាំកន្លះ ពីបទល្មើសដូចគ្នា ដោយខ្លះដាក់ឱ្យស្ថិតក្រោមការត្រួតពិនិត្យរបស់តុលាការ និងខ្លះត្រូវបានព្យួរទោស៕
វេទិកាបញ្ចេញមតិ