ចាប់តាំងពីព្រឹកព្រលឹមរហូតដល់ពេលល្ងាច ថ្ងៃព្រហស្បតិ៍នេះ ក្រុមអង្គការសង្គមស៊ីវិល មេដឹកនាំសហជីព និង មេដឹកនាំគណបក្សប្រឆាំងក្នុងប្រទេសកម្ពុជាបាននាំគ្នាដាក់កម្រងផ្កាជាបន្តបន្ទាប់ ដើម្បីគោរពវិញ្ញាណក្ខន្ធសព លោក ចាន់ សុវ៉េត សកម្មជនសិទ្ធិមនុស្សដ៏លេចធ្លោមួយដែលបានតម្កល់ទុកនៅវត្តគល់ទទឹង ស្ថិតនៅភូមិ កោះ ក្របី សង្កាត់ព្រែកថ្មី ខ័ណ្ឌ ច្បារអំពៅ។
លោក ចាន់ សុវ៉េត អាយុ៥១ឆ្នាំ មន្ត្រីសិទ្ធិមនុស្សដ៏ល្បីល្បាញរបស់សមាគមសិទ្ធិមនុស្សអាដហុក បានទទួលមរណភាពនៅរសៀលថ្ងៃពុធ។ បើតាមក្រុមគ្រួសារបានសន្និដ្ឋាន ជំហានដំបូងថា ដោយសារជម្ងឺលើសឈាមបណ្តាលឲ្យគាំងបេះដូងស្លាប់។
ការស្លាប់បាត់បង់ជីវិតរបស់ លោកចាន់ សុវ៉េត បានកើតឡើងក្រោយពីលោកបានចូលរួមក្នុងទិវាសិទ្ធិមនុស្សអន្តរជាតិលើកទី៦៦។ លោកត្រូវគេចាត់ទុកថា ជាអ្នកប្រឹងប្រែងយ៉ាងខ្លាំង ខាងផ្នែកការពារសិទ្ធិមនុស្សនៅកម្ពុជា ជាពិសេសក្នុងរយៈពេលប៉ុន្មានថ្ងៃចុងក្រោយនេះ។
លោកធន់ សារ៉ាយ ប្រធានសមាគមសិទ្ឋិមនុស្សអាដហុកមានប្រសាសន៏ថាលោកមិនមានអារម្មណ៏នៅក្នុងខ្លួនទេនៅពេលដែលឮដំណឹងនៃការបាត់បង់ជីវិតបុគ្គលិកដ៏ឆ្នើមម្នាក់។លោកបាននិយាយប្រាប់អ្នកកាសែតនៅពិធីបុណ្យសពថាលោកបានបើករថយន្តប៉ះអ្នកជិតខាងដោយមិនដឹងខ្លួន នៅពេលលោកមកចូលរួមបុណ្យសព លោក ចាន់ សុវ៉េត។
«ការបាត់បង់ លោក ចាន់ សុវ៉េត ជាការបាត់បង់ធំណាស់សម្រាប់សមាគមសិទ្ធិមនុស្សយើង សម្រាប់សង្គមស៊ីវិលយើងក៏ដូចសម្រាប់ប្រជាពលរដ្ឋយើងដែលជាអ្នក ក្រីក្រអ្នកគ្មានអំណាចដែលត្រូវការ ការជួយគាំទ្រ ជួយការពារពីសកម្មជនសិទ្ធិមនុស្សរបស់យើងជាពិសេសដូចលោកសាវ៉េត នេះ»។
នៅក្នុងបរិវេណវត្តគល់ទទឹងមនុស្សជាច្រើនបានមកពពាក់ពពូនដើម្បីចូលរួមគោរពវិញ្ញាណក្ខន្ធ។ក្នុងខណះពេលដែលសពលោកចាន់ សុវ៉េត បានតម្កល់ក្នុងក្តារម្ឈុសយ៉ាងមានរបៀបរៀបរយដោយមានកម្រងផ្តាតាំងរូបថតលោក។
លោក កឹម សុខា អនុប្រធានទីមួយនៃរដ្ឋសភា ព្រមទាំងលោក សម រង្ស៊ី ប្រធានគណបក្សសង្គ្រោះជាតិ គណបក្សសង្គ្រោះជាតិបានដឹកនាំមន្ត្រីគណបក្សមួយចំនួនមកគោរពវិញ្ញាណក្ខន្ធលោកចាន់ សុវ៉េត។
លោកកឹម សុខាបានបួងសួងថា៖ «នូវវីរៈភាពរបស់លោកពួកយើងខ្ញុំមិនភ្លេចទេពួកយើងខ្ញុំនិងបន្តការតស៊ូតទៅទៀត សុំអោយមានការស្ងប់អារម្មណ៏ហើយដើម្បីឲ្យយើងបានសេចក្តីសុខទាំងអស់គ្នាទៅថ្ងៃមុខទៀតមានសិទ្ឋិសេរីភាព ប្រជារាស្ត្រយើង។ការតស៊ូ របស់លោកចាន់ សុវ៉េតគឺបានមកនូវគុណសម្បត្តិច្រើនណាស់សម្រាប់ប្រជាពលរដ្ឋយើងគ្រប់រូប»។
ចំណែកលោក សម រង្ស៊ី មានប្រសាសន៏ថា៖« ថ្ងៃនេះយើងចូលរួមមរណៈទុក្ខយ៉ាងក្រៀមក្រំជាទីបំផុត យើងបាត់បង់អ្នកស្នេហាជាតិ អ្នកស្រឡាញ់យុត្តិធម៌ដ៏ឆ្នើម តែយើងនិងគាត់ធ្វើជាគំរូឲ្យវិញ្ញាណក្ខន្ធគាត់បានទៅកាន់សុគតិភព»។
អ្នកស្រី និត អឿន អាយុ៧៨ ឆ្នាំម្តាយលោក ចាន់ សុវ៉េត ដែលបានបូសជាដូនជីនៅវត្តគល់ទទឺងបានយំក្តុកក្តួលរៀបរាប់ប្រាប់មេដឹកនាំគណបក្សប្រឆាំងនៅពេលដែលកូនអ្នកស្រីបានស្លាប់បាត់បង់ជីវិត។
អ្នកស្រីនិយាយថា៖« ខ្ញុំអស់សង្ឃឹមហើយ»។
លោក កឹម សុខា អនុប្រធានគណបក្សសង្គ្រោះជាតិ ថ្លែងលួងលោមអ្នកស្រីថា ៖ «លោកយាយមានកូនល្អ កូនជួយជាតិ កូនស្រឡាញ់យុត្តិធម៌ លោកយាយ។។ក្នុងស្រុកខ្មែរគេស្គាល់កូនលោកយាយគេសរសើរ គេគោរពណាស់»។
អ្នកស្រី និត អឿន ឆ្លើយតបទៅលោក កឹម សុខា វិញថា៖ «ខ្ញុំសប្បាយចិត្តណាស់ដែលលោកបានសរសើរកូនខ្ញុំ»។
នៅក្នុងរោងបុណ្យមានការដាក់បញ្ចាំងស្លាយរូបថតស្តីពីសកម្មភាពលោកចាន់ សុវ៉េត ដែលចូលរួមប្រឆាំងនឹងការរំលោភសិទ្ធិមនុស្សនិងទាមទាររកយុត្តិធម៌ក្នុងសង្គម។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានបញ្ជាក់ថាលោកបានធ្លាប់ធ្វើការជាមួយលោក ចាន់ សុវ៉េតជាច្រើនឆ្នាំមកហើយ។លោកបានមើលឃើញថាលោកជាមនុស្សសកម្មក្នុងការការពារសិទ្ធិមនុស្ស។
«យើងគ្រប់គ្នាចាត់ទុកលោកជាវិរៈបុរស ជាអ្នកស្នេហាជាតិក៏ដូចជាអ្នកដែលការពារយុត្តិធម៌ក៏ដូចជាតែងតែចំណាយពេលវេលាក៏ដូចជាអាយុជីវិតរបស់គាត់ ដោយមិនស្តាយក្នុងការការពារសិទ្ធិក៏ដូចជាតែងតែចេញមុខក្នុងការដោះស្រាយនូវបញ្ហាគ្រប់រូបភាពទាំងអស់ជួនប្រជាពលរដ្ឋទាំងអស់ដែលរងគ្រោះ»។
លោក ចាន់ ពិទ្ឋិស័ក សកម្មជនដីធ្លីនៅតំបន់បឹងកក់បានបញ្ជាក់ថាលោកចាន់ សុវ៉េតបានជួយយ៉ាងច្រើនក្នុងរឿងជម្លោះដីធ្លីនៅតំបន់បឹងកក់និងជម្លោះដីធ្លីនៅសហគមន៍ផ្សេងទៀត។
«បាទយើងឃើញថាការបាត់បង់រូបគាត់ហ្នឹងគឺការសោកស្តាយមែនហើយគឺជាការបាត់ប្រភពម្នាក់ដែលគាត់ជាប្រភពនៃ អ្នកការពារសកម្មជនសិទ្ធិមនុស្សនិងដីធ្លីហ្នឹង។អញ្ចឹងយើងពិបាករកមនុស្សណាដែលមានឆន្ទៈឧត្តមគតិខ្ពង់ខ្ពស់ដូចជាគាត់នេះណាស់ ហើយខ្ញុំមានអារម្មណ៏ថាសោកស្តាយមែនទែន»។
ក្រុមសកម្មជនដីធ្លីនៅតំបន់បឹងកក់ដែលរួមមានអ្នកស្រី ទេព វន្នី បានរៃអង្គាស៏ថវិកាចេញពីពន្ធនាគារព្រៃស ប្រមាណ២៧ម៉ឺនរៀលមកចូលរួមបុណ្យសពលោកចាន់ សុវ៉េត។
សពរបស់លោកចាន់ សុវ៉េតគ្រោងនឹងបូជានៅថ្ងៃសុក្រស្អែកនេះ៕
