សភាជាន់ទាបនៃប្រទេសម៉ាឡេស៊ី បានអនុម័តវិធានការណ៍មួយ ដែលធ្វើឲ្យមានការឃុំឃាំងមនុស្សដោយគ្មានការចោទប្រកាន់ដោយសង្ស័យជាភេរវករ នៅក្នុងចំណាត់ការមួយដែលបុគ្គលិកសិទ្ធិមនុស្ស បានសម្តែងនូវការមិនពេញចិត្តថា ជាជំហានដើរថយក្រោយ។
សមាជិកសភាម៉ាឡេស៊ីបាននិយាយថា រដ្ឋាភិបាលត្រូវការច្បាប់រារាំងភេរវកម្ម ដែលត្រូវបានអនុម័តនៅថ្ងៃអង្គារនេះ ដើម្បីទប់ទល់នឹងការគំរាមកំហែងដែលបណ្តាលមកពីក្រុមជនសកម្មប្រយុទ្ធអ៊ីស្លាមក្នុងប្រទេសម៉ាឡេស៊ី។
អង្គការសិទ្ធិមនុស្ស Human Rights Watch បានហៅច្បាប់ថ្មីនេះថា ជាជំហានដើរថយក្រោយដ៏ធំមួយដល់សិទ្ធិមនុស្សនៅក្នុងប្រទេសម៉ាឡេស៊ី ហើយបានព្រមានថា ច្បាប់នេះជាការធ្វើឲ្យមានច្បាប់សន្តិសុខផ្ទៃក្នុងឡើងវិញ ដែលត្រូវបានលុបចោលនៅឆ្នាំ២០១២។
លោក Phil Robertson អនុប្រធានអង្គការសិទ្ធិមនុស្សHuman RightsWatchទទួលបន្ទុកតំបន់អាស៊ីបាននិយាយនៅក្នុងសេចក្តីថ្លែងការណ៍ថា ដោយការធ្វើឲ្យមានឡើងវិញនូវការឃុំឃាំងមិនកំណត់ពេលដោយគ្មានការកាត់ទោស ម៉ាឡេស៊ីបានធ្វើឲ្យមានឡើងវិញនូវបញ្ហាជាច្រើនក្នុងគោលបំណងខាងនយោបាយ សកម្មភាពដែលរដ្ឋប្រើអំណាចហួស ដែលមនុស្សជាច្រើនបានគិតថា ច្បាប់នោះបានបិទនៅពេលដែលច្បាប់សន្តិសុខផ្ទៃក្នុងដ៏តឹងរឹងត្រូវបានលុបចោលនៅឆ្នាំ២០១២។
សភាជាន់ខ្ពស់នៃប្រទេសម៉ាឡេស៊ីហើយនិងព្រះមហាក្សត្រ ត្រូវគេរំពឹងថានឹងគាំទ្រវិធានការនោះ ដែលនឹងក្លាយទៅជាច្បាប់។
ច្បាប់នេះមានឡើង២ថ្ងៃ បន្ទាប់ពីកងកម្លាំងសន្តិសុខម៉ាឡេស៊ីបានចាប់ខ្លួនមនុស្ស១៧នាក់ដែលសង្ស័យពីការរៀបចំផែនការវាយប្រហារទៅលើធនាគារ ស្ថានីយប៉ូលីស និងប៉ុស្តិ៍យោធាដើម្បីទទួលបានអាវុធ៕
