សកម្មជនឆ្នើមការពារសិទ្ធិកុមារពីរនាក់ គឺនាង Malala Yousafzai ជាសកម្មជន ផ្នែកអប់រំមកពីប្រទេសប៉ាគីស្ថាន និងសកម្មជនតស៊ូមតិការពារសិទ្ធិកុមារមកពី ប្រទេសឥណ្ឌា Kailash Satyarthi បានទទួលពានរង្វាន់ណូបែលសន្តិភាពក្រុង អូស្លូ (Oslo) ប្រទេស ណ័រវេ (Norway) ដែលអ្នកទាំងពីរបានបង្កើតប្រវត្តិសាស្ត្រ ជាអ្នកឈ្នះពានរង្វាន់នេះក្មេងជាងគេបំផុត ហើយជាអ្នកឈ្នះពានរង្វាន់ទីមួយ ដល់ពលរដ្ឋដែលកើតក្នុងប្រទេសឥណ្ឌា។
នាង Malala អាយុ ១៧ឆ្នាំថ្លែងនៅឯពីធីប្រគល់ពានរង្វាន់ថា នាងតំណាងឲ្យ ក្មេងៗមកពីជុំវិញពិភពលោកដែលមិនបានចូលរៀនក្នុងសាលា។
«ខ្ញុំជាក្មេងស្រីម្នាក់ក្នុងចំណោម៦៦លាននាក់ដែលគ្មានសិទ្ធិទទួលបានការអប់រំ។ ហើយថ្ងៃនេះ ខ្ញុំមិនមែនបញ្ចេញសំឡេងខ្លួនខ្ញុំទេ វាជាសម្លេងរបស់ក្មេងស្រី ៦៦លាននាក់»។
នាងជាក្មេងស្រីដែលរួចជីវិតពីការបាញ់ប្រហាររបស់ក្រុមឧទ្ទាមតាលីបង់ កាលពីឆ្នាំ២០១២ ដោយសារតែការតស៊ូមតិរបស់នាង។ នៅក្នុងកិច្ចសម្ភាសជាមួយនឹងវីអូអេភាសាអូឌូ មុនពីធីប្រគល់ពានរង្វាន់ចាប់ផ្តើម នាង ម៉ាឡាឡា ថ្លែងថាពានរង្វាន់សន្តិភាពនេះជាជោគជ័យរបស់ប្រទេសប៉ាគីស្ថានផងដែរ។
ដូចគ្នាដែរ លោក Satyarthi បានធ្វើកិច្ចការជាច្រើនឆ្នាំដើម្បីការពារសិទ្ធិកុមារ។ បន្ទាប់ពីរយៈពេលបីទសវត្សរ៍នៃការតស៊ូមតិ បានបញ្ចប់ទាសភាពកុមារនោះ លោក ថ្លែងថាគ្មានអំពើហិង្សាណាធំជាងការបដិសេធសុបិនរបស់កុមារទេ។ ហើយលោកបានទាមទារឲ្យមានសេរីភាពដល់កុមារ៕
