រយៈពេលប៉ុន្មានទសវត្សរ៍ចុងក្រោយនេះ មានវប្បធម៌ជាច្រើនដែលបានហូរចូលមកក្នុងប្រទេសកម្ពុជាតាមបណ្តាញប្រព័ន្ធផ្សព្វផ្សាយនានា។ ប៉ុន្តែមានតែ វប្បធម៌កូរ៉េខាងត្បូងបានមានឥទ្ធិពលខ្លាំងជាងគេទៅលើប្រជាជនខ្មែរ។
ម៉ូដនិងស្ទីលរបស់ប្រទេសកូរ៉េ ចម្រៀងនិងកម្មវិធីទូរទស្សន៍គឺជាផ្នែកមួយដែលមានភាពពេញនិយមនៅក្នុងស្រទាប់យុវជនខ្មែរ ហើយវាកំពុងតែរីកសាយខ្លាំងឡើងតាមប្រព័ន្ធអ៊ីនធើណែត។ មានន័យថា កម្មវិធីទូរទស្សន៍ខែ្មរកំពុងតែប្រកួតប្រជែងជាមួយនឹងវប្បធម៌ដែលកំពុងតែជះឥទ្ធិពល។
«ខ្ញុំមាននិមិត្តរូបក្នុងចិត្ត ហើយខ្ញុំចូលចិត្តមើលកម្មវិធីទូរទស្សន៍ប៉ុស្តិ៍កូរ៉េ» នេះជាការលើកឡើងរបស់ នាង ឃាង វួចខេងនិស្សិតឆ្នាំទីបួននៃសាកលវិទ្យាល័យអន្តរជាតិ។ និស្សិតរូបនេះបានប្រាប់ VOA ថា នាងចូលចិត្តមើលកម្មវិធីដូចជាកម្មវិធី «We Got Married» ដែលនៅក្នុងកម្មវិធីនេះតម្រូវឲ្យអ្នកដែលមិនស្គាល់គ្នាមករស់នៅជាប្តីប្រពន្ធជាមួយគ្នាដោយសង្ឃឹមថាពួកគេអាចនឹងបាក់ចិត្តស្រឡាញ់គ្នា។
នាងវួចខេងបន្ថែមថា៖ «គឺអត់មានកម្មវិធីប្រភេទដូច្នេះទេនៅក្នុងស្រុកខ្មែរ ខ្ញុំចូលចិត្តគំនិតនៃកម្មវិធីនេះ»។
វួចខេង ចំណាយពេលលើសពីមួយម៉ោងក្នុងមួយថ្ងៃដើម្បីមើលភាគនីមួយៗនៃកម្មវិធីនៅលើបណ្តាញសង្គម YouTube ដែលជារឿយៗ នាងមិនសូវមើលកម្មវិធីទូរទស្សន៍ខ្មែរទេ។ និស្សិតស្រីរូបនេះនិយាយថា កម្មវិធីទូរទស្សន៍ខែ្មរ មិនសូវមានការចាប់អារម្មណ៍ប៉ុន្មានទេ ក៏ប៉ុន្តែនាងក៏ចូលចិត្តកម្មវិធីមួយចំនួនដូចជា Love9 ដែលកម្មវិធីនេះផ្តល់នូវដំបូន្មានល្អៗជាច្រើនទៅយុវជន។
ដើម្បីបំពេញតម្រូវការតាមនិន្នាការនេះ ទូរទស្សន៍កម្ពុជា CNC បានចុះកិច្ចសហប្រត្តិបត្តិការជាមួយទូរទស្សន៍កូរ៉េខាងត្បូង MBC នៅក្នុងខែឧសភា ដើម្បីនាំចូលកម្មវិធីកូរ៉េបន្ថែមទៀត។ លោក មួន រ៉ាម៉ាឌី អគ្គនាយកទូរទស្សន៍ CNC បានប្រាប់ VOA ថាវាជា ជាយុទ្ធសាស្រ្តរបស់ទូរទស្សន៍ CNC ក្នុងការអនុវត្តន៍ជាមួយទូរទស្សន៍កូរ៉េ MBC និងបង្កើនប្រជាប្រិយភាពសម្រាប់ទូរទស្សន៍ CNC។ លោកបានថ្លែងថា៖
«K-popគឺពេញនិយមក្នុងចំណោមយុវជន មិនត្រឹមតែនៅក្នុងប្រទេសកម្ពុជាប៉ុណ្ណោះទេ ប៉ុន្តែនៅក្នុងបណ្តាប្រទេសផ្សេងទៀតផងដែរ»។
សូម្បីតែយុវជនខ្មែរក៏ធ្វើត្រាប់តាមទៀត នេះជាការលើកបន្ថែមរបស់លោក។
លោកបានបន្តទៀតថា សព្វថ្ងៃនេះទូរទស្សន៍ CNC បានបញ្ចូលនូវកម្មវិធីផ្សាយកូរ៉េរួមមាន តន្រ្តី និង រឿងភាគ និងគ្រោងផលិតកម្មវិធីល្បែងកំសាន្តទៅថ្ងៃមុខ។ ដោយសារតែកម្មវិធីរបស់ខ្មែរ បច្ចេកទេស និង ថវិកាមានកំណត់ ដូច្នេះធ្វើឲ្យភាពពេញនិយមរបស់យុវជនទៅលើកម្មវិធីនៅក្នុងស្រុកក៏មានកំណត់ដែរ។ លោកបន្ថែមថា៖
«ទៅថ្ងៃក្រោយទៅ យើងសង្ឃឹមថាទីផ្សារពាណិជ្ជកម្មយើងរីកចម្រើន ហើយយើងនឹងមានថវិកាច្រើន ដើម្បីផលិតរឿងឬក៏កម្មវិធីមួយដែលមានគុណភាព អាចប្រកួតជាមួយកម្មវិធីដទៃ»។
លោក ថៃ នរៈសត្យា អ្នកនាំពាក្យក្រសួងវប្បធម៌ និង វិចិត្រសិល្បៈ បាននិយាយថា ដោយសារតែវប្បធម៌សព្វថ្ងៃមានលក្ខណៈជាសកលភាវូបនីយកម្ម ហើយជាសម័យបច្ចេកវិទ្យារីកចម្រើន គឺអាស្រ័យទៅលើយុវជនខ្លូនឯងក្នុងការទទួលយក និងថែរក្សាវប្បធម៌កាលពីសម័យមុន។ លោកបានបញ្ជាក់ទៀតថា ស្ថាប័ននីមួយៗគួរគប្បីរៀនពីអ្នកដទៃ ដើម្បីបង្កើនគុណភាពទៅលើផលិតផលខ្លួន។
ផលិតករភាពយន្ត លោក មុនី កណ្ណដារង្គ បានប្រាប់ថា៖
«កម្មវិធីទូរទស្សន៍កូរ៉េគឺមានលក្ខណៈកំសាន្ត និងឆ្លុះបញ្ជាំងតថភាព»។
លោកបន្តទៀតថា៖
«ពួកគេតែងតែរិះរកគំនិតច្នៃប្រឌិតក្នុងការបង្កើតល្បែង គំនិត និងជ្រើសរើសតួសម្តែងK-pop ល្បីៗ។ ការធ្វើរបៀបនេះ ពួកគេអាចបំផុសនូវគំនិតថ្មី និងបង្ហាញពីផ្នែកឯកជនមួយរបស់តារាទៅទស្សនិកជន»។
លោកបន្តថា កម្មវិធីទូរទស្សន៍ខ្មែរភាគច្រើនប្រើប្រាស់ការកំប្លែងក្នុងប្រទេស ដែលវាអាចនឹងមានភាពពេញនិយមទៅលើទស្សនិកជនក្នុងស្រុក ប៉ុន្តែពេលខ្លះវាអាចនឹងមានភាពជ្រុលជ្រួសខ្លះដែរ។ ពួកគេថែមទាំងខ្វះភាពច្នៃប្រឌិតក្នុងការទាក់ទាញចំណាប់អារម្មណ៍ពីទស្សនិកជន។ លើសពីនេះទៅទៀត វាមានភាពលំបាកក្នុងការប្រកួតប្រជែងជាមួយគុណភាពរបស់កម្មវិធីកំសាន្តកូរ៉េ។ លោកនិយាយថា៖
«នៅពេលដែលយុវជនកម្ពុជាបែរទៅទស្សនាកម្មវិធីកូរ៉េជាជាងកម្មវិធីខ្មែរ ផលិតកម្មក្នុងស្រុកនឹងធ្លាក់ចុះ។ ទោះបីជាយ៉ាងណាក៏ដោយ បើសិនជាគ្មានកម្មវិធីបរទេសមកប្រកួតជាមួយ ផលិតកម្មក្នុងស្រុកក៏មិនរីកចម្រើនដែរ ហើយពួកគេក៏មិនខំប្រឹងបង្កើនគុណភាពកម្មវិធីឲ្យមានស្តង់ដា ដើម្បីប្រកួតប្រជែងនោះទេ។ ដូច្នេះ មានការប្រកួតប្រជែងខ្លះទើបល្អ»។
