លោករដ្ឋមន្ត្រីការបរទេសស.រ.អា. ចន ឃែរី(John Kerry) កំពុងឋិតនៅក្នុងទីក្រុងអ៊ីស្លាម៉ាបាដ(Islamabad) ដើម្បីជួបជាមួយលោកនាយករដ្ឋមន្ត្រី Nawaz Sharif នៃប្រទេសប៉ាគីស្ថាន(Pakistan)។
លោក ឃែរី កំពុងធ្វើដំណើរទស្សនកិច្ចជិតមួយសប្តាហ៍មកហើយដែលមានរួមបញ្ចូលការឈប់សំចតនៅក្នុងទ្វីបអឺរ៉ុបផងដែរ ក៏ប៉ុន្តែការឈប់សំចតរបស់លោកនៅក្នុងប្រទេសប៉ាគីស្ថានគឺធ្វើឡើងដោយមិនបានប្រកាសឲ្យដឹងជាសាធារណៈទេ។
លោកក៏នឹងធ្វើទស្សកិច្ចនៅប្រទេសបារាំងផងដែរដើម្បីបង្ហាញសាមគ្គីភាពរបស់ស.រ.អា.នៅក្រោយការវាយប្រហារភេរវកម្មកាលពីអាទិត្យមុននៅក្នុងក្រុងប៉ារីស (Paris) និងនៅក្រោយមានការរឹះគន់ថា គ្មានមន្ត្រីជាន់ខ្ពស់ណាម្នាក់របស់រដ្ឋបាលលោកអូបាម៉ាចូលរួមក្នុងការដើរដង្ហែក្បួននៅក្នុងក្រុងប៉ារីស។
កាលពីថ្ងៃសុក្រ មន្ត្រីជាន់ខ្ពស់ម្នាក់នៃក្រសួងការបរទេសស.រ.អា.បាននិយាយថា ការផ្តោតការយកចិត្តទុកដាក់សំខាន់បំផុតនៃដំណើរទស្សនកិច្ចរបស់លោក ឃែរី ក្នុងប្រទេសប៉ាគីស្ថាន គឺការបើកសម័យប្រជុំកម្រិតរដ្ឋមន្ត្រីក្នុងការសន្ទនាលើយុទ្ធសាស្ត្ររបស់ស.រ.អា.និងប៉ាគីស្ថាន ដែលការប្រជុំនេះ ត្រូវបានមន្ត្រីរូបនេះព៌ណនាថា ជាការគាំទ្រដល់
ការអភិវឌ្ឍន៍នៃ«ស្ថាប័នអភិបាលកិច្ចរបស់ប៉ាគីស្ថាន ខ្លាំងជាងមុននិងមានប្រសិទ្ធិភាពជាងមុន»និងដល់ស្ថិរភាពនៃប្រទេសនេះផងដែរ៕
