អ្នកការទូតកំពូលស.រ.អា.បាននិយាយថា កិច្ចចរចាសន្តិភាពសម្រាប់ប្រទេសស៊ីរីដែលផ្តួចផ្តើមដោយអ.ស.ប.គួរប្រព្រឹត្តទៅតាមការកំណត់ទុកនៅថ្ងៃច័ន្ទ ទោះណាជាមានអ្វីដែលលោកហៅថា «ការដឹងថាមានការរំលោភលើកិច្ចឈប់បាញ់គ្នា» ដោយរដ្ឋាភិបាលស៊ីរីក៏ដោយ។
លោករដ្ឋមន្ត្រីការបរទេសស.រ.អា. John Kerry បានមានប្រសាសន៍ថា អ្នកឃ្លាំមើលរុស្ស៊ី និងអាមេរិកាំងជួបប្រជុំគ្នានៅក្នុងក្រុងហ្សឺណែវ និងក្រុងអាម៉ាន់ (Amman) កាលពីថ្ងៃសៅរ៍ដើម្បីពិគ្រោះគ្នាថាតើត្រូវធ្វើបែបណាដើម្បីកាត់បន្ថយអំពើហិង្សានៅក្នុងប្រទេសស៊ីរី។
លោក Kerry បានមានប្រសាសន៍កាលពីថ្ងៃសៅរ៍នៅក្នុងប្រទេសអារ៉ាប៊ីសាអូឌីតថា «តាមការរៀបរាប់ទាំងអស់ កម្រិតនៃអំពើហិង្សាបានត្រូវកាត់បន្ថយពី៨០ទៅ៩០ភាគរយដែលជាការកាត់បន្ថយច្រើនក្រាស់ក្រែល»។
នៅពេលជាមួយគ្នានេះ លោក Walid Muallem រដ្ឋមន្ត្រីការបរទេសស៊ីរីបាននិយាយថា រដ្ឋាភិបាលស៊ីរីនៅតែប្តេជ្ញាគោរពតាមកិច្ចព្រមព្រៀងឈប់បាញ់គ្នា ក៏ប៉ុន្តែគណៈប្រតិភូរបស់ខ្លួនសម្រាប់កិច្ចចរចាសន្តិភាពនឹងត្រូវរង់ចាំ២៤ម៉ោងសម្រាប់ឱ្យគណៈប្រតិភូក្រុមប្រឆាំងធ្វើដំណើរទៅកាន់កិច្ចចរចានោះ។ លោក Muallem បាននិយាយកាលពីថ្ងៃសៅរ៍នៅក្នុងក្រុងដាម៉ាសថា ក្រុមអ្នកការទូតនឹងចាកចេញដំណើរទៅកាន់ក្រុងហ្សឺណែវនៅថ្ងៃអាទិត្យនេះ។
មន្ត្រីមា្នក់នៃក្រុមប្រឆាំងស៊ីរីបាននិយាយថា រដ្ឋមន្ត្រីការបរទេសរូបនេះបាន «បញ្ឈប់កិច្ចចរចានៅក្នុងក្រុងហ្សឺណែវនៅមុនកិច្ចចរចានេះចាប់ផ្តើមធ្វើ»៕
