មនុស្សចំនួន ១០០នាក់ហើយ បានស្លាប់ដោយសារការវាយប្រហារយោធា របស់ប្រទេសអ៊ីស្រាអែល (Israel)ទៅលើតំបន់ហ្គាហ្សា(Gaza) គិតមកត្រឹមថ្ងៃសុក្រ ទី ១១ ខែកក្កដា។ នេះបើយោងតាមការឲ្យដឹងរបស់មន្ត្រី ប៉ាឡេស្ទីន(Palestine)។ ស្របពេលដែលលោកនាយករដ្ឋមន្ត្រីអ៊ីស្រាអែលBenjamin Netanyahu ថ្លែងថាលោកនឹងមិនលើកលែងទោស ឬបញ្ឈប់ការវាយប្រហារតាមការដាក់សម្ពាធអន្តរជាតិឡើយ។
លោក Netanyahu អះអាងថាគ្មានគំនាបសង្កត់ណាមួយ ដែលអាចរារាំងមិនឲ្យប្រទេសរបស់លោក បើកការប្រយុទ្ធប្រឆាំង នឹងក្រុមភេរវជន ដែលបានអំពាវនាវឲ្យបំផ្លាញប្រទេសអ៊ីស្រាអែលឡើយ។
គិតមកត្រឹមថ្ងៃសុក្រនេះ ការប្រយុទ្ធគ្នារវាងកងកម្លាំងអ៊ីស្រាអែល និងក្រុមសកម្មប្រយុទ្ធប៉ាឡែស្ទីនបានឈានដល់ថ្ងៃទីបួនហើយ។ យោធាអ៊ីស្រាអែល នៅបន្តធ្វើការវាយលុកចូលក្នុងតំបន់ ហ្គាហ្សា ខណៈពេលដែលក្រុមសកម្មប្រយុទ្ធវិញ នៅតែបន្តបាញ់ផ្លោងគ្រាប់រ៉ុកកែត ចូលក្នុងទឹកដីរបស់ប្រទេសអ៊ីស្រាអែល។
ក្រុមជនសកម្មប្រយុទ្ធក្នុងតំបន់ហ្គាហ្សា បានបាញ់រ៉ុកកែតប្រមាណ៥៥០គ្រាប់ចូលក្នុងប្រទេស អ៊ីស្រាអែលនៅក្នុងការប្រយុទ្ធគ្នាកាលពីពេលថ្មីនេះ ក៏ប៉ុន្តែមិនបណ្ដាលឲ្យមានអ្នកស្លាប់ទេ៕
