ពួកឧទ្ទាមអ៊ីស្លាមនិយម បានបន្តទទួលជ័យជម្នះនៅក្នុងប្រទេសស៊ីរីភាគខាងជើង នៅថ្ងៃសុក្រនេះទៀត ដោយដណ្តើមយកបានមន្ទីរពេទ្យមួយ នៅកន្លែងដែលកងទ័ពរដ្ឋាភិបាលបានទទួលការឡោមព័ទ្ធជាច្រើនសប្តាហ៍មកហើយ។
អង្គការសិទ្ធិមនុស្ស Syrian Observatory for Human Rights និយាយថា រណសិរ្ស al-Nusra ដែលមានទំនាក់ទំនងជាមួយពួក al-Qaida បាន«កាន់កាប់ទាំងស្រុង»លើមន្ទីរពេទ្យមួយនៅជាយក្រុង Jisr al-Shughour។
ទាហានរដ្ឋាភិបាលមួយចំនួននិងមនុស្សឯទៀតបាននៅលាក់ខ្លួនក្នុងមន្ទីរពេទ្យ ចាប់តាំងពីចុងខែមេសាមុន។
ភ័ព្វវាសនារបស់ជនទាំងនេះមិនដឹងជាយ៉ាងដូចម្តេចទេ តែរណសិរ្ស Nusra និយាយតាមបណ្តាញ Twitter ថា ខ្លួនកំពុងដេញតាមទាហានទាំងនោះ។
ពួក al-Nusra កាលពីខែមុនបានត្រួតត្រាទីក្រុង Jisr al-Shughour ដែលជាទីតាំងសំខាន់ចុងក្រោយមួយរបស់រដ្ឋាភិបាលនៅក្នុងខេត្ត Idlib។
យុទ្ធជនរបស់លោកប្រធានាធិបតី al-Assad បានទទួលបរាជ័យជាបន្តបន្ទាប់ជាមួយពួកឧទ្ទាមរដ្ឋអ៊ីស្លាម ក្នុងពេលប៉ុន្មានថ្ងៃនេះ។
កាលពីសប្តាហ៍មុន ពួករដ្ឋអ៊ីស្លាមបានបង្ខំឲ្យកងទ័ពរដ្ឋាភិបាលដកចេញពីទីក្រុងបុរាណ Palmyra ដែលធ្វើឲ្យវត្ថុសិល្បៈមានតម្លៃប្រៀបមិនបានដែលមានអាយុ ២ ពាន់ឆ្នាំនៅទីនោះអាចមានគ្រោះថ្នាក់ដោយត្រូវពួកឧទ្ទាមបំផ្លិចបំផ្លាញ៕
