កាលពីថ្ងៃសៅរ៍ សម្តេចប៉ាប Francis បានធ្វើដំណើរតាមយន្តហោះទៅកាន់ក្រុង Philadelphia ដើម្បីផ្តល់ការយកចិត្តទុកដាក់ពេញទំហឹងដល់អ្វីដែលអាជ្ញាធរវិមានវ៉ាទីកង់យល់ឃើញថា ជាក្រុមអ្នកស្តាប់ព្រះអង្គមានបន្ទូលសំខាន់បំផុតក្នុងព្រះរាជទស្សនកិច្ចជាប្រវត្តិសាស្ត្ររបស់ព្រះអង្គក្នុងស.រ.អា.ដែលត្រូវបានគេហៅថាជា ក្រុមគ្រួសារ។
នៅក្រោយការថ្លែងសុន្ទរកថារបស់ព្រះអង្គនៅក្នុងរដ្ឋធានីវ៉ាស៊ីនតោន និងក្នុងបុរី ញូវយ៉កទៅកាន់ក្រុមមេដឹកនាំមានអំណាចខ្លាំងបំផុតក្នុងពិភពលោកដោយព្រះអង្គបានជំរុញពួកគេឱ្យជួយការពារបរិស្ថាន និងជួយដល់ក្រុមជនក្រីក្រមកនោះ សម្តេចប៉ាបបានយាងទៅកាន់ការជួបជុំមហាគ្រួសារពិភពលោក ឬ World Meeting of Families ដែលជាសន្និសីទអន្តរជាតិមួយស្តីពីការអប់រំពីជីវិតគ្រួសារ និងអំពីបញ្ហាសង្គមឯទៀតៗផងដែរ។
អង្គការព្រះវិហារគ្រិស្តសាសនាកាលូតិកបើកការប្រជុំសន្និសីទដូចសន្និសីទនេះរៀងរាល់បីឆ្នាំ ហើយសន្និសីទនៅឆ្នាំនេះប្រព្រឹត្តទៅជាលើកដំបូងក្នុងស.រ.អា.។ការប្រជុំសន្និសីទនេះមានធ្វើនៅពេលមានការផ្លាស់ប្តូរនៅក្នុងសង្គមដោយមានកំណើនការយល់ព្រមរបស់សាធារណជនដល់ការរៀបអាពាហ៌ពិពាហ៌រវាងមនុស្សមានភេទដូចគ្នានៅក្នុងស.រ.អា. និងប្រទេសជាច្រើនទៀត និងមានការប្រឆាំងនឹងការបង្រៀន និងជំនឿខាងសាសនាដែលមានយូរយារមកហើយតាមប្រពៃណី៕
