លោកនាយករដ្ឋមន្ត្រីហ៊ុន សែននិងលោកស ខេង រដ្ឋមន្ត្រីមហាផ្ទៃនឹងរៀបចំប្ដឹងលោកសម រង្ស៊ី ទៅតុលាការប្រទេសបារាំងរឿងទំព័រហ្វេសប៊ុករបស់លោកសម រង្ស៊ីប្រធានស្តីទីគណបក្សសង្គ្រោះជាតិសរសេរថា លោកហ៊ុន សែនជាអ្នកសម្លាប់លោកហុក ឡង់ឌី អតីតអគ្គស្នងការនគរបាលជាតិ។ នេះបើតាមបណ្តាញព័ត៌មានក្នុងស្រុកដែលដកស្រង់សម្តីលោកផៃ ស៊ីផានអ្នកនាំពាក្យរដ្ឋាភិបាល។
លោក ហ៊ុន សែន ប្រកាសវិធានការផ្លូវច្បាប់នេះក្នុងកិច្ចប្រជុំគណៈរដ្ឋមន្រ្តីកាលពីថ្ងៃសុក្រម្សិលមិញ។
លោកផៃ ស៊ីផានឲ្យដឹងទៀតថា គម្រោងប្តឹងលោកសម រង្ស៊ីទៅតុលាការប្រទេសបារាំងមានគោលបំណងរកយុត្តិធម៌ជាសកលជូនលោកហ៊ុន សែន។ មុនពេលសម្រេចប្តឹងលោកសម រង្ស៊ីលោក ហ៊ុន សែន បានបបួលលោក សម រង្ស៊ីស្បថដាក់ជីវិតខ្លួនឯង ក្រុមគ្រួសារនិងសាច់ញាតិ ព្រមទាំងមនុស្សជំនិត១០០នាក់ បើថាលោកពិតជាបានរៀបចំគម្រោងសម្លាប់លោកហ៊ុក ឡង់ឌីពិតមែននោះ។ ប៉ុន្តែលោកសម រង្ស៊ីមិនបានទទួលការស្បថនេះទេ។ មេដឹកនាំគណបក្សប្រឆាំងរូបនេះធ្លាប់ចាត់ទុកថា ការស្បថគ្រាន់តែវិធីទាល់ច្រកនិងបែបកូនក្មេងតែប៉ុណ្ណោះ។
ទំព័រហ្វេសប៊ុករបស់លោកសម រង្ស៊ីកាលពីថ្ងៃទី២ ខែមិថុនា សរសេរបែបសន្និដ្ឋាន និងវិភាគថា លោកហ៊ុន សែនជាអ្នកបញ្ជាការសម្លាប់លោកហុក ឡង់ឌី ហើយថា កូនប្រុសរបស់លោកហុក ឡង់ឌី គឺលោកឌី វិជ្ជាដែលជាកូនប្រសាររបស់លោកហ៊ុន សែនដែរនោះ កំពុងរៀបចំផែនការជាមួយលោកស ខេង ដើម្បីរកវិធីសងសឹក ដែលនាំឲ្យលោកស ខេងជាប់ពាក់ព័ន្ធជាមួយលោកហ៊ុន សែនប្តឹងលោកសម រង្ស៊ី។
ទំព័រហ្វេសប៊ុករបស់លោកសម រង្ស៊ីអះអាងថា លោកហ៊ុន សែនរៀបចំឃាតកម្មលោកហុក ឡង់ឌីដោយដោយសារតែលោកហុក ឡង់ឌីដឹងរឿងអាក្រក់របស់លោកហ៊ុន សែនច្រើនពេក។
របាយការណ៍របស់សមត្ថកិច្ចលោកហ៊ុន សែនដែលជាដើមបណ្តឹងអះអាងថា លោកហុក ឡង់ឌីបានស្លាប់ក្នុងករណីធ្លាក់ឧទ្ធម្ភាគចក្រនៅខេត្តស្វាយរៀងដោយសារអាកាសធាតុអាក្រក់ដែលមានភ្លៀងធ្លាក់ខ្លាំង និងរន្ទៈបាញ់ចំថ្ងៃបុណ្យខួបឯករាជ្យជាតិ៩ខែវិច្ឆិកាឆ្នាំ២០០៨៕
