អតីតមន្រ្តីរៀបចំផែនការសេដ្ឋកិច្ចកំពូលចិនម្នាក់ ដែលត្រូវបានរងការចោទប្រកាន់ពីការទទួលសំណូក ហើយត្រូវបានកាត់ទោសឱ្យជាប់ពន្ធនាគារអស់មួយជីវិត ហើយកំពុងក្លាយជាឥស្សរៈជនជាន់ខ្ពស់បំផុតក្នុងពេលថ្មីៗនេះ ដែលត្រូវបានចាប់កាត់ទោសដោយយុទ្ធនាការប្រឆាំងអំពើពុករលួយរបស់ចិន។
ទីភ្នាក់ងារព័ត៌មាន Xinhua ផ្លូវការនៃប្រទេសចិន បានរាយការណ៍ថា លោក Liu Tienan ត្រូវបានរកឃើញថាមានទោសពីការទទួលសំណូក៥លាន៨សែនដុល្លារក្នុងអំឡុងពេលដែលលោកធ្វើជាអនុប្រធានគណៈកម្មការអភិវឌ្ឍន៍និងកំណែទម្រង់ជាតិ ដែលជាអង្គការរៀបចំផែនការសេដ្ឋកិច្ចកំពូលរបស់ចិន។
ការចោទប្រកាន់ប្រឆាំងលោក Liu បានលេចចេញឡើងនៅខែធ្នូ ឆ្នាំ២០១២ នៅពេលដែលអ្នកកាសែតម្នាក់នៅឯទស្សនាវដ្តីស៊ើបអង្កេត Caijing បានចុះផ្សាយរឿងនៅលើប្រព័ន្ធ Microblog របស់លោក។
មុនដំបូងលោក Liu បានបដិសេធយ៉ាងខ្លាំងចំពោះការចោទប្រកាន់នេះ។ ក៏ប៉ុន្តែ នៅឯការកាត់ទោសរបស់លោកកាលពីខែកញ្ញា បុរសអាយុ៦០ឆ្នាំរូបនេះ ត្រូវបានគេឃើញសារភាពដោយមានហូរទឹកភ្នែកចំពោះការទទួលសំណូកជាច្រើន រួមមានប្រាក់សុទ្ធ រថយន្តម៉ាក Porsche ហើយនិងផ្ទះវីឡានៅក្នុងទីក្រុងប៉េកាំងផងដែរ៕
