អាជ្ញាធរកម្ពុជាបានស្រង់យកគ្រាប់បែកដែលមិនទាន់ផ្ទុះមួយគ្រាប់ ដែលបានទម្លាក់ពីយន្តហោះចម្បាំងតាំងពីសម័យសង្គ្រាមអាមេរិកាំងនៅវៀតណាម និងកម្ពុជាចេញពីក្នុងទឹកទន្លេកាលពីថ្ងៃព្រហស្បតិ៍ បន្ទាប់ពីអ្នកនេសាទនៅក្នុងខេត្តកណ្តាល បានប្រទះឃើញនៅពេលបង់សំណាញ់ចាប់ត្រី។
លោក ហេង រតនា អគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា បានបញ្ជាក់ប្រាប់វីអូអេថា៖ «គ្រាប់នោះធ្លាក់នៅស្រុកល្វាឯម នៅឃុំល្វាសរគឺនៅក្នុងទឹក។ ធ្លាក់ទៅក្នុងទន្លេត្រាំទឹកប្រហែលជានៅ៥ម៉ែត្រជាង»។
គ្រាប់បែកដែលស្រង់ចេញនោះប្រភេទ Mark 82 ឬ MK82 មានទម្ងន់ជាង២០០គីឡូក្រាមត្រូវបានក្រុមដោះមីននៃមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) ដឹកយកទៅកាត់ក្បាលមុននឹងដឹកយកទៅរក្សាទុកនៅកន្លែងរបស់ខ្លួន។
ការដោះមីនលើកនេះធ្វើឡើងដោយក្រុមពិសេស ដែលមានជំនាញដោះមីនក្រោមទឹកដែលទទួលបានការហ្វឹកហ្វឺនពីសហរដ្ឋអាមេរិក។ នោះគឺជាលើកដំបូងក្នុងការប្រើប្រាស់ជំនាញ និងឧបករណ៍ដែលពួកគេបានសិក្សា។
លោក ហេង រតនា បានបន្ថែមថា៖ «ក្នុងករណីក្រោមទឹកហ្នឹង យើងទើបប្រទះចំណុចជ្រៅអញ្ចឹងវាពីមុនយើងពិបាកយក។ ឥឡូវយើងយកតាមអ្នកជំនាញ គឺងាយស្រួលយកជាង។ វាជាលើកទីមួយរបៀបយកទឹកជ្រៅគ្រាប់ធំអញ្ចឹង»។
មានគ្រាប់បែកជិតបីលានតោនត្រូវបានទម្លាក់ក្នុងប្រទេសកម្ពុជា ក្នុងអំឡុងពេលសង្គ្រាមរបស់សហរដ្ឋអាមេរិកក្នុងប្រទេសវៀតណាម ហើយបានរាលដាលមកដល់ប្រទេសកម្ពុជា ក្នុងទសវត្សរ៍១៩៧០។ មានគ្រាប់បែកមួយចំនួនបានផ្ទុះ ហើយខ្លះទៀតមិនទាន់ផ្ទុះដែលបាននៅរាយប៉ាយលើដី និងក្នុងទឹក។
លោក ហេង រតនា បានបន្ថែមថា៖ «តាមចំនួនទម្លាក់ បើយើងគិតតាមចំនួនទម្លាក់ វាមានជាងពីរលានប្រាំពីរសែនតោន។ បើគិតជាចំនួនគ្រាប់ គឺយើងទើបរកបានប្រមាណបីបួនពាន់គ្រាប់ទេ ដែលយើងឃើញថាអត់ផ្ទុះ»។
កម្ពុជាស្ថិតក្នុងចំណោមប្រទេស ដែលរងគ្រោះខ្លាំងពីគ្រាប់មីន និងយុទ្ធភណ្ឌមិនទាន់ផ្ទុះ។ អស់រយៈពេលជិត២០ឆ្នាំក្រោយពីសង្គ្រាមស៊ីវិលបានបញ្ចប់ ប្រទេសកម្ពុជាបានបោសសម្អាតតំបន់ដែលមានគ្រាប់មីនបានតែមួយភាគបីប៉ុណ្ណោះ៕
